بــیــا او مــریـد ، بــیــا او مـریـد ، بــیــا او مرید دیوانگیں
بــیــا بــیــا کـہ دیــوانـے کـنـوں ، مــولانگ و مستانگیں
ســوتـکـگ تــرا عـشـق ءِ زراب ، مـا را غماں کرتگ کباب
تــو ھـــانـل ءِ درداں زرئـے ، مــا پــہ وطــن جـانـانـگـیـں
چـــاکــر تــئـی دوست ءَ پـلـت ، چـمـا دگہ ڈنـگاں وطن
تــو سـر پـہ شـیـدائی شـتـئے ، مــا پـیـھـنـاں زنداگیں
تـو ھـانـل ءَ اِشت و شـتـئے ، ماڑی ءَ مـیـریں چـــاکــر ءِ
مــا ھـانـل ءِ مـلـک ءَ نــدوں ، جـَـؤریں بــــدان دلمانگیں

اِشـتـے وطـن پـہ مـکـہ ءَ ، لـوچـیـں مـلنگـاں گوں شتے
مـئے مـکـّہ و ماس اِنـت وطـن ، نـیـلوں وطـن شاھانگیں
پــردیـس تــو مـاں مکہ ءَ ، شـیـئـراں زھـیـرنـالیں جتئے
مــا کـپـتـہ زنـــدان ءِ تـھـا ، شـیـئـراں جـنـوں رنــدانگیں
ھــجــر ءِ چــہ درد و دوریاں ، بـنـد بـنـد وتـی داغ داتگے
مـئے بـنـد و بـنـداں سوھتگنت ، جوریں بدان مستانگیں
تـــو زرتــہ کــچــکـول و عـصـا ، کــوڑیں جـھـاں داتگ یلہ
درکـپـتـگـوں ســربازی ءَ ، مــا پــہ پــــڑا مــردانــگــیــں
فــرق ھــچ نہ اِنت مــیــگ و تـئـی ، درد ءَ و زرد ءِ آچشءَ
تــو ھـانـل ءِ عـشـق ءَ گـنـوک ، مـــا پہ وطــن دیــوانگیں
ماں شیئرو عشقءِ دپتراں، دانکہ جھان ھست اِنت توئے
مــا ھـــم جـھـان ءَ یــات بـــوں ، مں مجلساں پروانگیں
پُـلـیّـں مـرید ، پُـلـیّـں مـرید ، بـیــا گــوں فقیری باطن ءَ
گــوشدار شیئراں شکّلیں ، گوشتگ نـصـیـر دیر زانگیں
میر گـلـخــان نـصـیـر
پہ باسک ءَ دیما یارؤک کریم بلوچ۔ تھل