*بلوچی بنرھبند ۔ گال تھر*

#بلوچی
#بلوچی_بنرھبند
#کازی_ریھان

*4۔ کارگال*

*______________________________________________

بنکارگال : وکار گال ۔ زوکارگال ۔ گُشکارگال ۔پاسگال : روان ۔سرجم ۔ گْوستاری ۔گمانی ۔ بانداتی ۔ پَدی کارگال
_______________________________________________*

ھما گال کہ کارانی دْرانگازی کن اَنت ۔
کارگالانی چار تَھر اَنت ۔

*3.1۔بنکارگال:* کارگال کہ آیانی گُڈی ءَ ‘ گ ‘ گون اِنت بنکار گال گْوشگ بَہ اَنت ۔
بنکارگال ءِ سئے تھر اَنت ۔

*3.1.1۔بنکارگا ل /وکارگال :* ھما کارگال کہ پہ کسے ءِ وتی کرتگیں کاراں کارمردبَہ اَنت۔
درور : تچگ ۔ نندگ ۔ جَنگ ءُ دگہ ۔

*3.1.2۔زوکارگال :*ھما کارگال کہ کسے ءِ واھگ یا زور ءِ سر ءَ چَہ دگرے ءَ گرگ بیتگیں کارانی دْرانگازی کن اَنت ۔
درور :تاچینگ ۔ نندارینگ ۔جَنائینگ ءُ دگہ ۔

*3.1.3۔گُشگار گال :* ھماکار گال کہ کسے ءِ گُشگ ءِ پد ءَ بیتگیں کاراں سَھرا کن اَنت ۔
درور :تاچائینگ ۔ نندائینگ ۔ جنائینگ ءُ دگہ ۔
لھتے کارگالانی زوکارگالی ءُ گُشکارگالی دْروشم یک اَنت ۔

*3.2۔پاسگال :* ھما کارگال کہ جتائیں پاس ءُ زمانگ ءِ دْرانگازی کن اَنت ۔
پاسگالانی پنچ تَھر اَنت ۔

*3.2.1۔روان :* کارگال کہ پہ برجاہ ءُ روانیں زمانگ ءَ کارمرد بَہ اَنت ۔کارے کہ نہ کُٹ اِتگ ءُ زمانگے ءَ بیگ ءَ اِنت ۔
درور : تچان ۔نندان ۔ جنان ءُ دگہ ۔

*3.2.2۔سرجم :*کارگال کہ پہ سرجمیں زمانگے ءَ کارمرد بَہ اَنت ۔
درور :تتک ۔نشت ۔ جَت ءُ دگہ ۔

*3.3.3۔گْوستاری :* کارگال کہ پہ گْوستگیں زمانگ ءَ کارمردبَہ اَنت ۔ایشانی گُڈی ءَ گیشتر’تگ’ کارمرد بیت ۔
درور:تتکگ ۔ نشتگ ۔ جَتگ ءُ دگہ ۔

*3.3.4۔گمانی :*ھما کارگال کہ پہ گمانی زمانگ ءَ کارمَرد بَہ اَنت ۔ کارے کہ ما گمان کن اِیں آیوکیں پاساں بیت بلے ما دلجمی گْوشت نہ کن اِیں یا ما واھگ دار اِیں کہ دْریگتے چوش بیتیں ۔لھتے پہ نزانتکاری ایشاں گوں ” اِنت ” نبشتہ کن اَنت ، چوش کہ ” روت اِنت ، کنت اِنت ” کہ رد اَنت ۔اے کارگال پہ گوستگیں نہ بیتگیں کاراں ھم کارمرد بَہ اَنت ءُ آیوکیں ھما کاراں ھم کہ ناسرجمیں واھگانی دْرانگازی کن اَنت ۔
درور: تتکیں ۔ نشتیں ۔ جتیں ءُ دگہ ۔

*3.3.5۔بانداتی :* ھما کارگال کہ پہ بانداتی زمانگ ءِ گپاں کارمرد بَہ اَنت ۔
درور: رَس اِت، تَچ ۔ نند ۔ جنت ءُ دگہ ۔

*3.1۔پدی کار گال:*

ھما کارگال کہ گستائی ءَ آیانی بزانت ناسرجم اَنت یا دگر اَنت ءُ گوں نامگالاں ھمگرنچ بیگ ءَ پدجتائیں بزانت دئے اَنت ۔

درور:شوانگ داراں تَل کنگ ءَ اِنت یا شوانگ دار اں تَل دیگ ءَ اِنت ۔

اے گالرد ءَ ‘ تل ‘ ءَ پد ‘ کنگ’ یا ‘دیگ’ ءِ کارگال کارمرد بیتگ اَنت ۔ چوناھیا ‘کنگ ‘ ءَ گستائی ءَ برجمیں بزانت نیست ءُ ’ دیگ ‘گوں تل ءَ ھمگرنچ بیگ ءَ پد وتی بزانت ءَ مَٹ کنگ ءَ اِنت ۔