بلوچی لبزانک ءِ سد سال ءُ شاہ محمد مری ءِ گسد گْواریں تران
بلوچی لبزانک ءِ سد سال ءُ شاہ محمد مری ءِ گسد گْواریں تران
۔۔۔۔۔۔۔۔
شاہ جہان قادر
آرٹس کونسل کراچی ءِ نیمگ ءَ برجم داشتگیں مراگشءَ ” بلوچی زبان ءُ لبزانک ءِ سدسال” ءِ بُنگپ ءِ سرءَ کتگیں واجہ شاہ محمد مری ءِ گپ ءُ ترانانی ویڈیو کلپ ءِ پچ کنگ ءَ ساری دل ءَ امیتانی دَھلے تُرْکّتگ ات کہ مرچی منا الم بلوچی لبزانک ءِ پنیامیں تک ءُ پہناتانی باروءَ سرپدی ے رسیت۔بلوچی زبان ءِ ساچشتی آپریچ ءِ بابت ءَ دری دنیا پہ دلجمی آژناگ کنئگ بیت۔بلوچی شائری، گِدارءُ آزمانک ءِ مِک کتگیں بیرکانی دنز چَنڈگ بنت ءُ دنیا ءَ ایشانی چیر ترّتگیں نکش پیشدارگ بنت۔بلے_____!
استاد شاہ محمد مری ءَ گوں وتی تامداریں دانکاں مراگش ءِ مردم پہ گْومے مُلما کتگ اتنت۔ہچ شکے نیست کہ بلوچ ءُ بلوچستان ءِ بابت ءَ واجہ ءِ مالومداری سربِری ءُ سرسری نہ انت بلکہ پراہ ءُ شاہگان ءُ پُر اسر اَنت۔واجہ وھدے کہ بلوچستان ءِ سرءَ گپ جنئگ ءَ بِنا کنت گڑا اے دُورسریں پندءَ کلہے ” سوشلزم” ءِ کہور ءِ چیرءَ ہم دمے بالا کنت۔” فیمنزم” ءِ ھونکیں چمگ ءِ سرءَ ہم آپسرکنت۔اے روچ ءَ ہم آئی ءَ وتی مگیمی سُنت برجاہ داشتگ ات۔آئی ءَ بلوچ ءِ ٹَک ءُ تمنی زند ءُ گزران ءُ چاگردی راہ ءُ رھبندانی پرّیچگ ءَ لبزانی جوانیں بورتاچی ے کت۔گوں سرداری مُھیماں ہمگرنچیں شائرانی بستارءِ بابت ءَ ہورت ہورت ءَ ھیال درشانی کت۔بلے ہجکہی ءِ گپ ایش انت کہ آئی ءِ گیشتر زور بس Oral بزاں سَرزبانی لبزانک ءِ سرءَ ات۔آئی ءِ اے ھبرءَ من ہچ سر کِچ نہ وارت کہ مرچی ہم بلوچی لبزانک ءِ پنجاہ در سد Oral انت۔( اگہ شما سر کِچّ وارت منا الم ھال بدئے ات گوں ).واجہ وتی بے مُلّیں گشتانک ءِ تہا راجدپتر، سیاست، بامردی، گہگیری، چاگرد، سوشلزم، فیمنزم ءُ دگہ بے کساس بُنگپاں پہ کرارے گْوپان ات ءُ سِچکانیں گپتارانی سھر ءَ تالان کنان ات____ بلے___ بلوچی غزل ءَ پنجاہ ءِ دھکّ ءَ بگرداں 2020 ءَ چینچو رنگ مٹاتگ؟ بلوچی آزمانک ءِ لس بُنگپ چی اِنت؟ ناول مرچی کجا سر انت ءُ بلوچی ءِ تہا نگدکاری/شرگداری ءِ روایت ءِ داب ءُ دروشم چی اَنت؟ اے رنگیں جستانی واستا وتی گشتانک ءِ تہا پورا ” نو انٹری زون ” ءِ بورڈے جتگ ات ئےِ۔انچو گمان بیت کہ مئے دیدگیں زانوگرءَ پیسلہ کتگ ات کہ بلوچ ءِ نبشتہی لبزانک چیردیئگی انت___ مان نیارگی انت___ چہ وت سِندگی انت۔
چَرّ ءُ بیرہ کنئگ ءُ جنگی کسہ ءُ جنگی تب ءُ مئیل ءِ سرءَ دیوان دِرّی کنئگ پہ گوشداروکانی مُشکول کنئگ ءَ جوانیں اِزمے بلے لبزانک شناسی انگہ دگہ کارے۔
اگہ کسے ترا تئی لبزانک ءِ باروءَ جست بکنت ءُ تئی پسہ ہمے بہ بیت کہ ما نیم جاگیرداریں ٹَکّ ءُ تمنی چاگردے ءِ تہا نشتگ ایں ءُ پہ جنگ ءَ تُکشوک ایں۔مئے کرءَ شائرءِ مانا مرچی ہم دان پِنڈیں پہلوان ءُ اگازی اِنت__ گڑا اے رنگیں درشانانی سر ءَ چہ گَل ءَ بگلُکی جنئگی نہ انت بلکہ جیڑگی انت کہ ما دنیاءَ وتی بابتءَ چونیں کلوہے سر کنئگ ءَ ایں۔
چو چون بوت کنت کہ گپ لبزانک ءِ بوہگ ءَ بہ بیت، شیرزالیں جنگول گل بی بی ءِ کسہ کنئگ بہ بیت بلے کلم واھندیں بانل دشتیاری، گوہر ملک ءُ مہلب نصیر ءَ مردم دل ءَ بہ بارت! گپ جنوک اگہ تھنا راجکار ءُ راجدپتر نبیسے بہ بیت وَ ھیر ___ بلے سوہوئیں سوشلسٹے ءُ ” سمّو راج ” ءِ دردواریں فیمنسٹے چوں اے رنگ ءَ کت کنت؟
گپ زبان ءِ بوہگ ءَ بہ بیت۔لوٹ ہمیش انت کہ ھبر چہ سد سال ساری ءَ گرگ بہ بیت۔ ھبر کنوک گوں انگریز ءُ بلوچانی جنگی داستاناں دیوان ءَ وشنود بکنت بلے بیست ءُ سی ءِ دھکّ ءِ سید ملنگ شاہ ءِ شائری ءَ شمشکار بہ بیت؟ ہما ملنگ شاہ کہ بلوچی زبان اولی رندءَ گوں غزلءَ پجہ آروک کنائینت ئےِ۔
مولانا خیر محمد ندوی ءِ رہدربریں کرد چوں چہ چماں اندیم بوت کنت؟ کسے پہ راجدپترنبیسیءَ ند ءَ چست بکنت، ہر وڑیں کس مہ لیک ے بہ بیت بلے گل خان نصیر ءَ سرگْوز کت نہ کنت۔بلوچستان ءِ تہا سوشلزم ءُ پروگریسو جُنزانی ھبر بہ بیت ءُ عنقا ءُ آزات ڈالچار کنئگ بہ بنت گڑا آ ندکار، ند کارے نہ بلکہ ریپکارے لیکگ لوٹیت ءُ ادا ھبر تچک ءَ تچک لبزانک ءِ بوہگ ءَ انت بلے چریشاں کسے گْواہ نہ کنت۔زانت ءُ زانگ اے ھبر ءَ ایر برت نہ کنت کہ لبزانک ءِ پَتّر ءِ سرءَ زبان ءِ کوہ تراشیں فرہاد ءُ گریشگ گولیں قیس، سیدہاشمی ءَ مردم بیھال بکنت۔عطاءَ بگرداں منیرءَ، کریم ءَ بگرداں اے آرداد ءَ، سدانی ھساب ءَ نام اَنت۔اگہ درست یکیں سہت ءَ گیر آرگ نہ بنت بلے چندے نام وَ باید انت مردم ءِ ھیالانی سرشماں شہم بکنت۔
گوں مزن منگہیں شاہ محمد مری ءَ دزبندی انت کہ بلوچی زبان ءَ نوں ھپتاد سال انت کہ پہرہ ءَ بگرداں کراچی ءَ، گوادر ءَ بگرداں راجن پور ءَ نبشتہ کنئگ بوہگ ءَ انت۔اگہ آ بلوچی ءِ نبشتاری لبزانک ءَ مان نیاریت گڑا مان نیارگ ءِ سَوَباں درنگاز بکنت ءُ مان آرگ ءِ کچ ءُ کئیلاں ہم بگیشینیت۔من جزماں نہ تھنا مئے وڑیں نودربر بلکہ پھتہ کاریں نبشتہ کنوک ءُ ھزمتکار ہم آئی ءِ دُریں گپتاراں وش اتک کننت۔