بند وارت جَمبر لُڑ کننت ارسانی لَڑی
بلوچی دستونک
شائر: منظور بسمل
بند وارت جَمبر، لُڑ کننت ارسانی لَڑی
اے منی ھال اِنت بے ترا لاڑی لیلڑی
چو اگول گَردیں، وانڈہ ءُ باروٹی مُدی
مارا بّڈا اِنت بے گْومیں زند ءِ گودَڑی
کئے بزانت باریں، سر کپیت گیدی ءَ کدی؟
سانکلیں وَھد ءِ دست ءُ پاد جول کادیں کڑی
دوچی ئیں گیرے، بُنجناں اوتاگاں دلی
سُوچن ءُ بندیک کناں لنکک ماں اَڑی
شکّلیں وَردوچکاں نہ کنت پِربَند پَربِہی
اشی ءَ چون اِنت ، وارت دِل ءِ سیر ءَ گَلگڑی
یک گْورے ھون ءِ شَھجُویں واب ءُ واھگی
یک سرے سوداگِر سر اَنت مال ءُ گَنتڑی
میسک ءُ دانیچ ءُ گوں کُنرتاکاں مِھلبی
وھد ھما وش اَت آمگیں پَنّ ءُ آمَڑی
مِنّ اَنت پہ یکے دومی ءِ ایرجیگی پَدی
ھچ تب ءَ نئیت اے مانمْیاتکان ءَ چے “وڑی”؟
راست پدّر بیت، گْوات بارت دْروگ ءَ کاگدی
وش نہ اِنت بسمل واب ءَ ھم گیشیں پُپسَڑی
1 اگست 2021