( اے رمیز وارتگیں سراں )

﴿ تاج بشیر ﴾

اے رمیز وارتگیں سراں
آسی بْرانزے ءَ گوں بُنگراں

اے ھُشکیں ھلوتاں قرار نیست
تُنّ ، پروشیں گْوانکے ءَ دوار نیست

لُنٹ بنت زدگ گوں ارس ءِ پُرْشتگیں زِہاں
گوں واب نہ گندیں دیدے ءَ اے جنگ چوں کناں
اے رمیز وارتگیں سراں
آسی بْرانزے ءَ گوں بُن گراں
اجب نہ اِنت اجب بہ بیت
روچ ءِ باتن ءَ اوں شپ بہ بیت
بہ شنز اَنت نالگانی نود
سینہ ساوڈ ءِ اوں کپ بہ بیت
درد ءِ جمبرانی داستان ءَ کے بزانت
گدائی زندگی ءِ شاہی شان ءَ کے بزانت
نہ پہم اَنت گوات ءِ نَکشاں تاکے ءِ سرا
اے شائری ءِ گنجیں بوستان ءَ کے بزانت
اے رمیز ءِ وارتگیں سراں
آسی بْرانزے ءَ گوں بُنگراں