تت توام اِسی۔ مجیب مجاہد
تت توام اِسی
……شیر جان شوھاز۔۔۔۔۔۔
2010ءَ مجیب مجاہد وتی کتاب “واتر نباں” ءِ اولی تاکءِ تہا نبشتہ کنت،
“گوستگیں چندے سالاں بلوچی لبزانکءِ شعری تک، یک رنگیں اوشتئے آماچ اِنت، نوکیں شعریات ، نوکیں زبان، نوکیں شعری رنگ ءُ رہبند ءُ نوکیں تجربہ گندگ نئیت ءُ دومی نیما منی وڈیں نوکسربازاں بلوچی شعر لبزانک جدیدیتءِ نامءَ پولنگ بار کتگءُ پرے گپءَ پہر ءُ شان کنت کے من بلوچی شعرے لبزانکءِ بیرک داراں، من ھمے سرپد باں کے جدیدیتءِ نامءَ وتی لبزانکءَ داتگ ءُ انگت ہم اے کاراں دزگٹ ایں۔”
ءُ پدا اے اوں نبشتہ کنت،
“باید ہمیش اِنت کے مئے زانتکاریں شاعر ءُ قلمکار مئے رنگیں نابزانتانی قبلہءَ تچک بکناں داں دیمءِ آیوکیں وہدءَ کس وتی نمازاں شگربءَ مہ وانیت، پرچا دانکہ مئے زانتکاریں واجہ منی رنگیناں راستیں راہءَ دور مَدنت تہ من داں عمری زندی ہمے گپءِ سرا اوشتوک باں کے منی شعر ءُ غزل/نظم ءُ نثر کُلّ بلوچی لبزانکءِ شرتریں نکان انت ءُ بے منیءَ بلوچی لبزانک تُشے اوں دیما گام جت نہ کنت۔”
مجیب Modernist Literature ءِ لوٹءَ “ڈائری”، “وال کلاک”، “پینٹگ” ءُ “ٹیبل” ءِ کارمردءَ چے گیش سرپد بیت۔
آ گشیت “جدیدیت”ءِ گِر و دارءَ ما(بلوچءَ) کدی اوں اے نہ پہم اِتہ کے ما وتی “شعری ربیدگاں” چہ زانتکار نہ اِنت ءُ ما ہر تک ءُ پہناتءَ “ھیّا پہ دہ انت”۔
اے تیوگءَ من چہ مجیبءِ کتابءَ زرتہ ءُ ھمے ھبرانی نیامءَ گپءِ گیشیں گیش ءُ گیواریءِ واستہ من مجیب ءِ نبشتگیں نظمے اوں ایر کناں۔
تت توام اِسی
اے چونیں دنزے
مناں گوں بالادءَ کپّ سندیت
گزل گزل کنت مناماں تاموریں زنگ کدہءَ
من جیڑگاہاں
(نہ دنز ہلیت)
نہ سیاہیانی غبار جَلیت،
نہ تہنا سیاہ آں من ، درچک ءُ پُلّانی جامہ سیاہ اِنت
زمین، زمان، کلکشانءِ زردیں عمامہ سیاہ اِنت
سَریءِ رنگءَ اے کائناتءَ مُجے سرا اِنت
اے دنزءَ ہر کنڈءُ پاسءَ راہ اِنت،
ادار، ادارءَ حواس گشتاں
مُساں من انچو
گشے کے گویاک بَستہ کیفءِ لَدی ایں گُرکءَ،
اے چونیں دَنزے!
ستر بہ شوداں گوں ہفتیں آساں نہ بیت رژنا
من ہچ نگنداں اے سیاہ ءُ پرّامیں ہور شنزءَ
بیا روچءِ درچکءِ گوازءَ پاچ ءُ رَجیں اے دَنزءَ
بگندے رُخشیت ایں رکّاں صحبے گوں راستءُ دُرسی
تت توام اِسی
