در شُت دگہ یکے(گیدی کسّہ)
در شُت دگہ یکے
(گیدی کسّہ)
پولکار:رازق راج
ھست اَت بادشاہ یے ءُ آئیءَ ڈولداریں جنکے ھست اَت۔بادشاہءَ ھمے شرت ایر کت کہ ہرکسءَ منی جنک گپءَ بند کت ،من آئیءَ وتی زامات کناں۔بزاں وتی جنکءَ ئےِ دیاں۔اگاں منی جنکءَ ہرکس ءَرا کہ گپءَ بند کت گڑا من آئیءَمِرگءِ زہاں کناں۔
اے جارءَ پد بازیں عاشقءُ مردمے ءَ بادشاہءِ جنکءِ کرّا کسہ جت کہ آ واب بہ کپ ایتءُ گپءَ بند بہ بیت۔بلے کس سوبین نہ بوت۔پرچا کہ بادشاہءِ جنکءَ دگہ ھچ گپ نہ جت بس ایوک ھمے گپ ئےِ کت کہ “گڑا؟”
بزاں ہرکسءَ کہ گپ جناں کت ایشی ایوک گُشت”گڑا؟” اے ھسابءَ مردمانی گپ ھلاس بوت انت ءُ آ مَرگءِ زِہاں رواں بوت اَنت۔
یک دھکانےءِ چُک سہی بوت کہ بادشاہءَ چشیں شرتے ایر کتگ ءُ آئی جنک ھمک کسہءُ گپءِ ھلاس بوّگءَ پد ایوک ھمے گپءَ کنت کہ”گڑا؟” تہ آئی وتی لانک پہ بادشاہءِ ماڑیءِ سپرءَ بست۔مردماں گُشت کہ نادان مبو۔چہ تو چہ شرترءُ دانائیں مردم بے سوبءُ بادشاہءِ شرتءِ رِدا کُشگ بوتگ اَنت۔تو وَ بے علمءُ کسہ گوشیءُ گپ کنگءِ رپکءَ سرپد نہ ئے۔بلے دھکانءِ چُکءَ کسّی گپ گوش نہ داشتءُ بادشاہءِ ماڑیءَ سر بوت۔دربار لگ اِت۔درائیں مردم پریشان بوت اَنت کہ مرچی دگہ یکے مرگءِ سیمسراں وت اتکگ۔
بادشاہ گوں وتی جنکءَ اتکءُ بادشاہءَ پرمان دات کہ دھکانءِ چک وتی کسہءَ بندات بکن۔گڑا دھکانءِ چُکءَ وتی کسہ بندات کت کہ منی پتءَرا مزنیں ڈگارے بوتگ کہ سرجمءَ کڑب بوتگ۔بادشاہءِ جنکءَ گُشت کہ گڑا؟دھکانءِ چکءَ گُشت کہ گڑا ھمے سالءَ مدگے کپت کہ آئی منی پتءِ سرجمیں کڑب وارت ھلاس کت۔بادشاہءِ جنکءَ گُشت گڑا؟
دھکانءِ چکءَ گُشت کہ گڑا منی پتءَ پیسلہ کت کہ ما اے کُلیں مدگاں گرایں ءُ وتی امبارءَ مان کنیں۔پرچاکہ یکے ایشاں مئے ڈگار وارتگءُ ھلاس کتگ،دومی اے سک پزور انت ورگءَ سک وش انت۔بادشاءِ جنکءَ گُشت گڑا؟دھکانءِ چکءَ گُشت کہ گڑامنءُ منی پتءَ مدگانی گِرگ بندات کتءُ سرجمیں مدگ گپتءُ امبارءَ بند کت انت۔بادشاہءِ جنکءَ گُشت گڑا؟ دھکانءِ چکءَ گُشت کہ گڑا منی پتءَ چارت کہ مدگ وَ سک باز انت، اے ھسابءَ کُل مِر انت ءُ مئے ورگءِ ھم کارءَ نیااَنت۔بادشاہءِجنکءَ گُشت گڑا؟
دھکانءِ چکءَ گُشت کہ گڑا منی پتءَ امبارءِ دروازگءَ انچیں کسانیں ٹُنگے پچ کت کہ اودا ایوک مدگ یک یکءَ دراتک کت بہ کن اَنت۔بادشاہءِ جنکءَ گُشت گڑا؟دھکانءِ چکءَ گُشت کہ گڑا ما چارگءَ ات ایں کہ یک مدگے درشُت۔بادشاہءِ جنکءَ گُشت کہ گڑا؟دھکانءِ چکءَ گُشت کہ گڑا در شُت دگہ یکے۔
انچوش کہ بادشاہءِ جنکءَگُشت گڑا؟تہ دھکانءِ چکءَ ہم گُشت کہ گڑا درشت دگہ یکے۔
بادشاہءِ جنک گڈسرءَ بیزار بوت ءُ گوں کوکار گُشت ئےِ۔ترا زاناں دگہ گپ نیست کہ ایوک ھمے گپءَ کن ئے کہ درشُت دگہ یکے؟
دھکانءِ چکءَ پسو دات کہ ترا زاناں دگہ گپ نیست کہ ایوک ھمے گپءَ کن ئے کہ گڑا؟بادشاہءِ جنکءَ ھچ نہ گُشتءُ دیوانءِ نشتگیں دُرستیں مردماں کوکار کت کہ دھکانءِ چُکءَ جنک کٹ ات۔ھمے ھسابءَ بادشاہ لاچار بوت ءُ وتی جنک ئےِ گوں دھکانءِ چکءَ سُور دات۔