(رجانک,,بےزبانیں جناور،،خلیل جبران/سلیم قمبرانی)
(رجانک,,بےزبانیں جناور،،خلیل جبران/سلیم قمبرانی)
” بے زبانیں جناور ءِ چمّانی تھا یک کلامے ھست انت کہ آئی ءَ زانتکار سرپد بنت،،
یک بیگاھے من ءَ ھیالے ءَ گور جت- من چہ لوگ ءَ در آتکاں ءُ شھر ءُ بازاراں رھادگ بوتوں- یک ھالیگیں لوگے ءِ کِرّا آتک ءُ اوشتاتوں- آ لوگ ءِ دیوال کپتگ اتنت ءُ چَت زمین ءَ آیگ ءَ ات، لوگ ءِ پیم گُشگا ات کہ چہ مُدتّے ءَ ویران انت ءُ آئی ءَ یک آپتے ءَ گور جتگ- من دیست کہ کُچِکّے ھاک ءِ سرا نشتگ ءُ آئی ءِ لاگریں جون چہ ٹپّ ءَ پُرّ انت ءُ بیماری ءَ آ ھڈّانی پانکلگے ات- آئی ءِ چمّ روایرشت ءِ جھل روانیں روچ ءَ سکّ اتنت-آئی ءِ چمّ زلّت ءِ ساھگاں کورکتگ اتنت- تُرس ءُ نا اُمیتی ایشانی تھا پدّر ات-
من میزان میزان ءَ آئی ءِ نیمگا شُتوں- وتی دل ءَ ھیال کت کہ اگاں من آئی ءِ زبان ءَ ھبر کت بہ کناں گڑا آئی ءَ دلڈڈی دیاں ءُ آئی ءَ ہمدردی ءَ گپت کناں-
وھدے من آئی ءِ کِرّا شُتوں گڑا چہ تُرس ءَ وتی نیم ساھیں زند ءِ تاگت ئےِ جم کُتنت ءُ کوشست ئےِ کرت کہ چہ ادا بہ تچیت بلے بیماری ءَ آئی ءِ پاد بے ساہ کرتگ اتنت ءُ مرگ ءِ بُمپان ات- چہ وتی جاگہ ءَ پاد آتک ئےِ نہ کرت ءُ منی نیمگا چم ئےِ شانک دات ءُ گوں بزّگیں چماّں چارگا لگّت- من گناہ ءَ گوں آئی ءِ بزّگیں چماّں ڈیکّ وارت-منی جذبگ ءِ تھا ھرکتے پیدا بوت- منی مارگ ءُ احساسات بیدار بوتنت- من آئی ءِ نگاہ یک انسانی کلامے ءِ دْروشم ءَ آورت انت ءُ آئی ءِ چمّ گُشگا لگّت انت: منی سر ءَ ھرچے گْوزگا انت آ منی واستا باز انت- برو منی آرام ءِ سرا رھم بْور- من ءَ چہ روچ ءِ برانزاں زند ءِ دماناں زیرگا بِلّ! من آدم ءِ اوبادگ ءِ زُلم ءُ سنگدلی ءَ چہ تتکگ ءُ اے ھاک ءِ سرا کپتگوں کہ چہ آیانی دل ءَ نادِہ نرم انت- اے جنگل ءَ وتا چیر داتگوں کہ انسانی زُلم ءَ چہ کم انت منی کرّا چہ برو کہ تو ھم زمین ءِ سرا ھمایانی وڑین ئے کہ آیانی فیصلہ نیم بُندگ ءُ بے انصاف انت-
من یک کسانکیں جناورے یاں- بلے من انسان ءِ ھزمت کتگ- آئی ءِ لوگ ءَ من یک مخلص ءُ وفادار ءِ وڑا بیتگوں- آئی ءِ مھبت ءُ حفاظت ءِ جاسوسی ءِ فرض ادا کتگ- من آئی ءِ گم ءُ وشی ءَ ھور بوتگاں-آ لوگ ءَ چہ ڈنّ ءَ شتگ گڑا من آ باز یات کتگ ءُ آئی ءِ آیگ ءَ من باز وش بوتگاں- من آئی ءِ سراروک وارتگ انت ءُ آئی ءِ سرآتکگیں ھڈ من وتی واستا نعمت زانتگ انت-
وھدیکہ من پیر بوتگاں- بیماری ءَ منی سرا ارش کت- آئی ءَ من ءَ وتی لوگ ءَ چہ کشّ ات ءُ گلّی ءِ بے رھمیں چکّانی لیبوک ءُ بیمارانی تیر ءِ آماچ ءُ ھروڑیں گند ءِ آماچ بوتوں-
اَے آدم ءِ چکّ! من یک کمزوریں جناوراں بلے منی ءُ تئی ھما برات کہ کمزور انت آئی ءِ ءُ منی تھا ھچ پرک نیست انت-چیاکہ آ ھم تاگت ھلاس بیگا رند نان ءِ یک یک چنڈے ءَ پہ مھتاج بنت ءُ تباہ ءُ بربادی کڈّ ءَ کپنت-من ھما سپاہیگ ءِ مثالاں کہ وتی ورنائی ءَ وتی وتن ءِ واستا جنگ کننت ءُ پیری ءَ کِشت ءُ کِشار کننت ھما وھداں کہ سارتیں موسم شرو بنت ءُ آیانی دست پاد بیکار بنت-گڑا آیاں گلّین انت ءُ آیاں شموش انت-من ھما جنین ءِ وڑا یاں کہ وتی جوانی ءَ جوان دل ءِ واستا سیل ءُ سواد کنت-جن بیت چکّانی گورسی ءَ شپاں بے وابی ءَ گوازین ایت-اگاں پیر بیت انت گڑا آئی ءَ یک سلگتیں چیزے ھیال کنگ بیت ءُ آئی ءَ فراموش کن انت-
“آہ! اَے انسان تو چینچو زالم ءُ باز سنگدل ئے،، آ کچکّ ءِ نگاہ کلام کنگا ات ءُ منی دل سرپد بیگا ات-منی اے ھال ات کہ من کدی اے بے زبانیں جناور ءِ سرا بزگ ورگا اتاں ءُ کدی ھم جنس ءِ ھترناکیں ھیالاں چہ لرزگا اتاں پدا آ کچک ءَ وتی چمّ بند کرت انت گڑا من آ پریشان کنگ شرّ نہ زانت ءُ اودا چہ شتوں-