“رجانک,, نادْراھی،، امرجلیل/جمیل امام”
“رجانک,, نادْراھی،، امرجلیل/جمیل امام”
مردکار ءَ وتی چُکّ پہ ساد بَست ءُ داکتر ءِ گْور ءَ آؤرت-داکتر ھیران بوت-مردکار ءُ آئی ءِ بستگیں چُکّ ءِ نیمگ ءَ چاراِت ئےِ- نادْرواھانی گیشی ءِ سَوَب ءَ داکتر ءَ تھنا اِے گپّ گُشت,,من گنوکانی داکتر نیاں،،
“منی چُکّ گنوک نہ انت، ایشیارا یک بیمّناکیں نادرواھی ءَ گپتگ،، مردکار ءَ درّائینت-
داکتر ءَ گوں نیم چمّی چار اِت ءُ جُست کُت,,دگہ مِھر ءُ دوستی یے گوں کسے ءَ نہ بوتگ،، “انّاں داکتر! نادُرواھی مزنیں بیمّناکین ایت-آئی ءَ را لبزانکی زبان ءَ تو تُرسناکیں نادرواھی گشت کن ئے،، مردکار ءَ پسّہ دات-
“گندگ ءَ جان سلامت انت،، داکتر ءَ درّائینت-آ مردکار ءَ نشتگیں نیمگ ءَ چیرُکائی چار اِت ءُ درّائینت-
“من مردمانی دیم ءَ وتی چکّ ءِ نادرواھی ءَ پدّر کت نہ کناں-بس تو نوں وت بہ پہم-،،
“بس من پہم اِت-گیشتر ورناہ اے پیمیں ردی کننت ءُ پدا ھمے پیمیں تُرسناکیں نادرواھیانی آماچ بنت، تو پکر مکن من آ دگہ نادرواھان چُٹّیناں، پدا سرجمیں جست ءُ پُرس ءَ رند تئی چُکّ ءَ را دارو درمان دیاں-،، داکتر ءَ پسّہ دات-
داکتر کمّے دیر ءَ پد آ دگہ نادراھاں چہ چُٹّ اِت ءُ نوں ھما مردکار ءُ آئی ءِ ورناھیں چکّ ءِ گْور ءَ شُت ءُ جست ءُ پرس ءَ لگّ ات- یکبرے مردکار ءَ اینگو آنگو چار اِت کہ باریں دگہ گوشدروکے نیست-
“ایشی ءِ تھا چیر دیگ ءِ ھبر چے انت- اے چونیں نادرواھی یے؟،، داکتر ءَ درّائینت-
مردکار ءَ گوں ھیرانی ءَ گشت- مرچاں اے نادرواھی سکّ باز انت- “فلماں، سلّیں کتاباں ءُ بْرھنگیں عکسانی چارگاں چہ ھمے وڑیں آسر درکئیت کہ مرچی باندا مئے سرجمیں چاگرد ھمیشانی آماچ انت-،،داکتر ءَ درّائینت-
“انّاں! انّاں! اے پیمیں گپّے نہ انت- منی چکّ ءَ را اے ڈولیں نادرواھی ءَ نہ گپتگ-،،
مردکار ءَ درّائینت-
داکتر ھیران بوت ءُ جست ئےِ کُت:
,,گڑا چے انت تئی چکّ ءَ را؟،،
“منی چُکّ ءَ پکر ءُ سسّا بنا کتگ-،،
زندمان سالتاک 1994