رودپتر ءِ رُژنائیں تاک۔ 18 نومبر 2020
رودپتر ءِ رُژنائیں تاک
18 نومبر 2020
ابرار سمین
مرچی موسم سک دلکش ءُ زیبدار اَت۔ آزمان ءَ جمبراں مانپوشتگ اَت دیگر ءِ وھداں روزرد ءِ رنگ انچو دلکش ءُ زیبناک اَت کہ ھچ لبزانی تَہ ءَ بیان کنگ نہ بیت۔ چشیں زردی ءُ زیبائی من زمانگاں ڈرائینگ ءِ کتابانی تَہ ءَ دیستگ۔ یک سرد سردیں گْواتے گُوشاں ھلوت کنگ ءَ اَت۔ مرچیگیں دلکشیں ندارگ چارگ ءِ لائک اَت۔
ڈّن ءَ زاھگانی توار اَت من چہ دروازگ ءَ سر کش اِت تہ لھتیں زاھگ کرکٹ لیب ءَ اَت۔
زمانگاں اے لیب جاہ ءَ ما لیب ءَ کت۔ مارا بیٹ نیست اَت گڑا ما گوں دراجیں دارے ءَ لیب ءَ کت۔ یک روچے منی برات ءَ دارے تراشت ءُ پہ من بیٹے جوڑ کت۔ پد ءَ ما گوں ھمے بیٹ ءَ لیب ءَ کت۔ من ءَ انگت ءَ یات اِنت کہ مئے وکٹ دیوال ءِ کِشت اَت اَنت۔ ما بید ء اوور ءَ لیب ءَ کت یک ٹیمے ءَ پنچ یاکہ شش پلیئر اَت اَنت۔ درستاں بیٹنگ ءَ کُت بائدیں درستاں آؤٹ کنگ بوتیں گڑا دومی اننگز بندات ءَ بوت۔
مئے میتگ ءَ سک ریک باز اِنت ھمینچو باز کہ یک دو لوگان ءَ چہ پشت ءَ داں کُنٹاں ریک سوار اِنت۔ لوگ چہ پشت ءَ گوں زمین ءَ ھمراست اَنت۔ انچیں بلا بلائیں ریک کہ سر اِش ماں آزمان ءَ اِنت۔ لیب ءَ رند ما داں عشاء ءِ بانگ ءَ ریکانی سر ءَ نشت ایں۔ کندگ ءُ مسکرائی اَت۔ من ءَ یات اِنت ما ریک رُپت ءُ پٹّے ودی کت پد ءَ ھمے پٹّ ما لِچ کُت ءُ پہ وت پچے جوڑ کت۔
چہ پچ ءَ ابید ایدگہ درائیں لیب جاہ ءَ ریک اَت۔ مرچی اوں ھما لیب جاہ اَت ھما پچ، ھما کش ءُ گْور ءِ ریک ھما کِشت ءِ وکٹ، ھما ساھت دیگر ءِ زردیں رنگ گوں جمبراں اگاں چیزے بدل بوتگ اَت گڑا لیبی، لیب چیاکہ مرچی زاھگ اوور ءِ ھساب ءَ لیب ءَ اَت اَنت۔ پنچ بال ءَ ھشت اسکور درکار اَت۔ لیب سک دل کش اَت۔ بیٹس مین ءَ شاپت چکّائے ءُ پد ءَ چار بال ءُ دو اسکور بوت اے بال اوں بیٹس مین ءَ چکّائے جَت ءُ لیب ھلاس کُت۔
لیب ءِ ھلاس بوھگ ءَ آھاں چہ گل ءَ یک دومی ءَ بگل کُت ءُ پچ ءِ سر ءَ مُچ بوت اَنت۔ ایشانی وشی ءُ کندگ ءِ تَہ من ھما وشی ءُ کندگ گندگ ءَ اَت آں کہ زمانگاں منی لنٹانی سر ءَ بوتگ۔ من یک سارتیں گینّے کش اِت ءُ بُرز ءَ چار اِت تہ روچ بُڈّتگ اَت۔ زردی کم بوتگ اَت۔ دور یک مسیتے ءَ بانگ ءِ توار اَت۔ من دیم پہ مسیت ءَ رادگ بوت آں۔
