روچگ ءِ بادشاھی! ابدلستار بُگٹی
روچگ ءِ بادشاھی!
بلوچی رجانک: ابدلستار بُگٹی
روچگ زاناں چے ءَ گْوش اَنت؟ اگاں ماں یکیں گالرِدے ءِ تہ ءَ بیان کنگ ءِ جُھد بہ کن ایں گُڑا ایشی ءِ بزانت وتی سر ءَ بادشاھی کنگ ئیگ انت۔ بِہ گِند ئے ماں دنیا ءَ چَہ وتی سر ءَ بادشاھی کنگ ءَ دِگہ داد نیست انت۔
بنی آدم ءُ رستر ءِ بُنکی تپاوت ھمیش انت کہ رستر وتی دزرس ءَ وارت بزاں وھدے کہ شُدیگ بیت گُڑا پہ شکار ءِ شوھاز ءَ جنگل ءِ نیمگ ءَ درکپ ایت ءُ دزرسیں جناور ءَ شکار کنت کہ ھما نزور اِنت۔ وھدے تُنّیگ بیت گُڑا ھرّوچ ھما یکیں آپی کُمبے ءِ نیمگ ءَ روت۔
ھمے پیم ءَ دِگہ جناور ھم وتی دزرس ءَ ور اَنت۔ بزاں آیانی زورگیر آیانی سر ءَ بادشاھی کن اَنت۔ آ وت ماں وت مِڑ اَنت ءُ یکدومیگ ءَ شکار کن اَنت۔
ھمے داب ءَ بنی آدم ھم انچوش اِنت کہ گوں دْرِندھگیں واھشتے ءَ ماں دنیا ءَ رستگ۔ گُڑا بنی آدم ھم وتی دْرِندھگیں واھشت ءِ آسر ءَ دزرس ءِ وازمندگ اِنت۔
البت گوں اِے ابرمی ھیل ءُ رھبنداں نیکراھی برکت ءَ چَہ ھُداوند ءِ نیمگ ءَ بنی آدم ءَ مُدام شَور ءُ سِلاہ رستگ پمیشکا بنی آدم ھم پہ چیزے وھد ءَ گوں وتی دزرس ءَ جنگ ءُ جدل ءِ ھلاسی ءَ کمیں جُھد ھم کنت۔ البت گیشتر بے سوبی ءِ آماچ بیت۔ بنی آدم ھلال ءُ ھرام ءَ بے پرواہ بیت، دِگرانی ھَکّ ءَ پُل ایت ءُ آئی ءِ سر ءَ زُلم ءُ زوراکی کنت چریشی ءَ بنی آدم چہ آدم زاتی ءَ رسترے ءِ دْروشم ءَ بدل بیت۔
بلے رمزان ءِ روچگ ھمے رستری ءِ ھلاسی ءِ نام اِنت ءُ ایشی ءِ بُنکی لوٹ ھمیش اَنت کہ بنی آدم اِے چہ ورگ، آپ ءُ جن ءِ گون ءَ وپسگ ءِ وڑیں ھرسے ئیں کاراں مہ کنت۔ البت اِے سےئیں کار اِبابت ءِ بھر وَ نہ اَنت بلے ایشانی آسر کنگ ءَ بنی آدم وتی واھشتانی واگ دیگ ءِ بودی ءَ سرپد وَ اَلّم بیت۔ وھدے کہ بنی آدم ءَ یکبرے وتی اے واھشتانی واگ دیگ ءِ بودی زانت گُڑا اِے بودیِاں ھرجاہ ءَ کارمرز ھم کُت کنت۔
بزاں وتی جِند ءِ ورگ یلہ کنوکیں مردم دِگر ءِ ھَکّ ءَ چون پُل ایت۔۔۔؟ وتی جِند ءِ آپ ءِ نہ وروکیں مردم دگِر ءِ مال ءُ مڈّی ءِ سر ءَ چی ءَ بدیں چمّے ایر کنت۔ چَہ وتی جِند ءِ جن ءَ دِیر نِندوک دِگر ءِ جن ءَ چون چار ایت؟
پمیشکا وتی واھشتانی واگ دیگ ءِ مانا وتی سر ءَ بادشاھی کنگ ءِ نام اِنت ءُ ایشی ءِ آسر بھشت ءِ دائمی بادشاھی اِنت۔ بے شَک چَہ ایشی ءَ مستریں داد ھُداوند ءَ اڈ نہ کُتگ۔۔۔۔۔