زندگی ءِ واب۔ آزمانک۔ اصغر زہیر
آزمانک
زندگی ءِ واب
آئیءِ پتءَ آ گوں بزگی وانینتگ ات،دگرانی ڈگاراں شریکی ئےِ کتگ اتءُ وتی لاپءَ سنگے بستگ ات ئےِءُ آئیءِ وانگءِ ھرچءُ درچ ئےِ کش اتگ ات انت.گوں ہمے اوستءُ امیتءَ کہ چُک وان ایتءُ مزنیں مردمے بیتءُ آئیءِ برورد پدا واتر بنت، مئے بزگیءِ روچ اوں آسر بنت.
چُکءَ اوں پتءِ سِتکءُ بھیسہ برجاہ داشتگ ات آں.وتی دلءُ جان گوں وانگءَ داتگ ات آں. آئیءَ جہدءُ جپا کشی کتگ اتءُ ہمک چکاس ءَ گوں شریں نمبراں سوب مند بوتگ ات.
آئیءِ دو واب ات انت،یکے ہمے اوست کہ پتءَ داشتگ ات کہ آ وان ایتءُ جوانیں انسانءُ مزنیں اپسرے بیتءُ وتی پتءِ کوپءَ سُبک کنتءُ چہ وھدءِ دستاں آئیءِ بزگیءَ پچ گیپت ءُ آئیءِ زندءِ روچاں شادمانی ءِ مستاگے کاریت.ءُ دنیاءَ ہمے پیشداریت کہ گریب اوں ونت کنتءُ یک مزنیں مردمے بوت کنت.
دومی واب آئیءِ وتی زندگیءِ بابتءَ ات کہ آ گوں وتی کسانیءِ دشتارءَ سور کنتءُ اے زندءِ ویرانیں ڈگارءَ آبادی ءُ پُل ءُ بھارانی یک نہ سستگیں درچے بندات کنت.
آ نوں شانزدمی تبکءَ سربوتگ ات،آئیءَ وتی یونیورسٹیءِ زندءَ گوں ہچ وڑیں جنکاں نزیکی ءُ سنگتی نہ کت کہ بلکن سمین سرپد بیتءُ دلءَ کار ایت.پرچاکہ آ دوئیں ھوریءَ رُستگءُ مزن بوتگ ات انت .
آ شانزدمی ءِ چکاسءَ اوں سوب مند بوتگ اتءُ باز شادانءُ وشھال ات.آئیءِ پتءِ دپ اوں آلکو بُرگءَ ات کہ نوں چُک مزنیں اپسرے بیتءُ مئے زندءِ ھشکءُ ویرانگیں ڈگار آبادءُ شاد بنت.
آ اوں واب گندگءَ ات کہ گوں وتی کسانیءِ دشتارءَ آئیءِ سور بوتگءُزندءِ گلباگءَ بھارگارہ انت،یک مزنیں گلابے رُستگءُ گلابءِ کشءَ وڑ وڑءُ تھر تھریں پُل رُستگ انت.کوشءُ سرگوات آہاناں گوں شادمانیءِ سوت ءَ ناچ دئیگءَ انت،برے آئیءَ واب دیست کہ آ گوں سمینءَ چو انڈیا ءِ پلمی جنکاں دست ماں دست انتءُ سبزگءُ کوہاں ناچءُ شادمانیءَ اَنت، وش وشیں سوت گشگءُ لُڈگءَ انت.
وانگءِ ھلاسیءَ پد،آئیءَ پہ نوکریءَ دستءُ پاد جنگ بنا کت.ہمک کارگسءُ واجہانی پتر لگت دات انتءُ وتی سی وی ءُ کاگدءُ وانگی بودناکیءِ ثبوت پیش داشت انت.بلے ہمک روچ گوں ھشکیں لُنٹءُ گیمرتگیں دیمءَ واتر لوگءَ اتک.
آئیءِ اے جہد داں دیراں برجاہ مان ات،اینچو جہد آئیءَ وتی وانگءِ شانزدہیں سالاں نہ کتگ ات کہ دو ہمنچو جہد آ پہ نوکریءِ شوہازءَ کنگءَ ات.
آ چہ اے گپءَ شموشکار ات کہ گریب ءِ چُک ستر وانندہءُ بودناک بہ بیت بلے آ است انت گریبءِ چُک …..گوں آئیءَ آ رؤشت دارگ نہ بنت چوکہ یک مزنیں مردمےءِ چُک انت. گڈیءَ آئیءَ دم بُرتءُ چٹ ناامیت بوت.آءُ آئیءِ پتءِ دیستگیں واب مانا دئیگءَ نہ ات انت.
انچوکہ یک ناسرجمیں وابےءِ پرشگ گران انت کہ تو آ وابءَ گندگءَ ئےءُ اناگتءَ گُڑئے یاکہ کسے ترا چہ واب ءَ پاد کنت،گڑا آ ساہتءَ تئی سرا چہ پیمیں نہ وشیءِ چاڑ مان شان انتءُ پہ یک ساہتے تئی سجئیں توانائی ھلاس بنتءُ توہمے گشئے کہ دریگتیں اے واب سرجم بوت ایںءُ نوں من پاد بیاتکیناں.
ہمے پیمءَ زندگیءِ بابتءَ آگاہیءَ دیستگیں وابءِ سرجم نہ بوہگءَ انسان چہ توکءَ چِہ وڑیں چستءُ ایر ماریتءُ چونیں جاورءُ کیپیتانی آماچ بیت.اے گپءَ ہما مردم زانت کہ آئیءِ سراہمے جاورگوستگ انت.
بلے آ ہمتی ئیں مردمے ات ءُ وتارا چہ پرشتءُ پروشیءَ دارگءَ ات.پہ ہمے اوستءَ کہ اگں نوکری نہ رسیت گڑا چے؟ سمین وَ است انت آ منی شادانیءُ وشیانی سبب جوڑ بوت کنت. پرچاکہ آ منا زانتءُ من آئیءَ….
آئیءِ پت نوں کماش بوتگ اتءُ کاریءُ کٹّی نہ ات.
آئیءَ چاراِت کہ لوگءِ مستریں چُک من آںءُ لوگءِ سجئیں ڈُبہ منی سرا انت.گڑا آئیءَ وتی کسانیءِ سنگت کہ سیٹ دلبودءِ گاڑیاں گون اتءُ بار کشی کنگءَ ات.گوں ہمائی نزیکی کتءُ آئیءِ سنگتءَ سیٹ دلبودءَ گوں دزبندی کتءُ آ وتی ہمراہیءَ کارءَ برت گوں.آئیءَ زوت گاڑیءِ الائینگ دربرتءُ راہءُ رنداں چہ آژنائیءُ سرپدیءَ پد، سیٹ ءَ آئیءَ را جتا گاڑیءُ دگہ بچکے دات.نوں آئیءِ کار ہمیش ات کہ آ ایرانءِ سیمسرءَ بہ رؤتءُ بار بہ بند ایتءُ بئیت.بار گیشتر ڈیزلءُ پٹرولءُ انچیں چیز اتنت.
آئیءَ اے کارءِ توکءَ دل داتءُزوت پہ وت شریں نام ئےِ کمائینتءُ اے کارءَ زر اوں مان ات.یک انچیں روچے اتک کہ آ اے کاروان ءِ شرترءُ زرنگ تریں ڈرائیور دراتک.آئیءَ سجئیں رِپکءُ ہنر گوں شیواریءَ دربرتگ ات آں.آئیءِ بار مدام گوں سوب مندیءَ اتکگ ات انت،نیکہ چو آ دگراں گاڑی چپی بوتگ اتءُ نیکہ گرگ بوتگ ات.
آئیءِ گورا زر پیداک اتءُ لوگ اوں شریں وڑے ءَ آسودگ بوہگءَ ات.بلے آئیءِ زندگیءِ واب یکبرے پدا پرشت کہ سمین ءِ پتءَ اے گشتءُ آئیءِ ھبربندی سست کہ ما ہمے اوست بستگ ات کہ آ یک شریں اپیسرے درکئیتءُ پہ مئے چُکءَ جوانءُ وشھالیءِ مستاگے بیت.بلے نوں چہ آئیءِ نالائکیءَ آ اینچو وانگءَ پد اوں ڈرائیورے دراتک.
گوں چشیں بارکشءُ بے بانداتیں مردمے ءَ من ہچ وڑءَ سانگبندی نہ کناں.چریشیءَ پد اے دوئیں کہولانی درنیام ءَ نہ وشیءُ ناچاکی ودی بوتءُ آ چہ توکءَ سک پرشتءُ پروشءِ آماچ بوت.انچوکہ بیرے زمینءَ بہ کپیت،انچو کہ زمین چنڈے بہ بیت.
اے وئیلءِ سبب اے دراتک کہ آئیءِ سر ماں نشہءَ کپتءُ وتارا زوال کنگءِ راہءَ درشت.
سیٹءَ چہ کارءَ کش اتءُ آ سک باز نہ گیگ بوت.بلے آئیءِ سنگتءَ سک باز جہد کتءُ آ پدا چتءُ یکجاہ کتءُ سیٹ ءَ را اے دلجمیءُ سدکی دات کہ آ پہ وتی سنگتءَ ہرچ دابیں ذمہ واری وتی سرا زوریت.
سیٹءَ آ پدا کارءَ داشت.بلے آئیءَ چیروکائی ءُکم کمءَوتی نشہ برجاہ داشت ءُ ہمے جہد کت کہ کس سرپد مہ بیت.
یکبرے پدا آئیءِ زندگیءَ تاب وارتءُ سنگتءَ آ گوں وتی تروزتک کہ نام ئےِ یاسمین ات،گوں آئیءَ سانگ کنائینتءُ دو پرشتگیں بالاد یکجاہ کت انت..پرشتگیں پمشکہ کہ آ دوئینانی دشتار شتگ ات انت.
برے برے انسان انچو بے وس بیت کہ آ گوں زندگیءَ سُہل کنگءَ ابید دگہ راہ نہ گندیت.آئیءَ ہم ہمت کتءُ زندگیءِ بابتءَ وتی ونتگیں پلسپہ کاربستءُ گوں زندگیءَ سُہل ءُ تران کتءُ وتارا ہمائیءِ دستاں دات.
یکبرے زندگیءِ اولاک پدا وتی راہءَ رہوار بوتءُ آ برے لوگءُ برے کارءُ بار کشیءَ دزگٹ بوت.
گش انت بے کاری زہنی نادراہی یے،پرچاکہ انسان وھدیکہ کہ بے کار بیت آ ایوکءَ نندیتءُ سک جیڑیتءُکم مارشتیءُ دگہ بازیں زہنی نادراہیانی آماچ بیت.کار پہ زہنءَ یک ملمائیءِ سببے ءُ پہ زندگی ءِ روچانی تیلانک دئیگءَ یک نیمونے…
یاسمین رنگءَ چہ سمین ءَ اگں شرتر نہ ات گڑا بدتر اوں نہ ات.آئیءِ گوستگیں دشتار ءَ آ ناوانندگیءِ شگانءَ یلہ داتگ ات.
یاسمینءَ اوں وتارا چِتگءُ یکجاہ کتگ اتءُ وتی زندگی آئیءِ دستاں داتگ ات.
آ گوں ایمنی زندءِ مہریءَ جماز اِت انت.
باندا سھب مہلہ آئیءَ پہ بار کشیءَ روگی ات،آ اوں ایوکءَ،پرچاکہ آئیءِ بچک نادراہ ات،اے بار آئی ءَچہ اودءَزورگءُتچکءَدگہ میتگےءَبرگی ات .شپءَ آئیءَ کہ گوں یاسمینءَ تیمچہ کت گڑا آئیءَ آ مہ کن کت.
“پرچا جان؟”
“کورءَ آپ آؤرتگ”
“منا نہ ترس ایت”
“ترا من زاناں نہ ترس ایت بلے منا تو دل نہ بئے کہ تچوکیں کورءَ مان بہ دیئے”
“من زندگیءِ بازیں کور مان داتگ انت”
“آ زندگیءِ کور بوتگ انتءُ اے……
“مرچی شپ منا انکار مہ کن کہ دوریں راہےءَ روگءَ آں”
“پدا کائے،اے چمگے نہ انت کہ ہُش ایت”
“چمگے نہ انت بلے تو زان ئے من بیدء …. ہچ جاگہ نہ رواں”
“تچوکیں کورءَ مان دئیگ شر نہ انت کہ آئیءَ بازیں بوچءُ ڈنگر گون انت”
گڑا آئیءَ وتی دست واتر کش اتگ ات.ءُ پدا جیڑاں جیڑانءَ واب کپتگ ات کہ سھبءَ مہلہ پاد آہگی انت.
آ سھبءَ پدا وتی مدامی کارءَ شتگ ات ءُ آئیءَ بار گون اتءُ گورکشکی کنڈءُ بینٹاں پہ سرمستی جنانءُ پیداک اتءُ سجئیں راہءَ آئیءِ زہن ءُ ھیال گوں یاسمین ءِ وشیں لذتءُ تامان ات انت کہ گوستگیں شپءَ آ چراہاں زبہر بوتگ ات.یکءُ دو جاگہ ءَ آئیءَ گِڈاتگ ات ہم بلے اوشتگی نہ ات کہ دگہ گپتءُ گیرے مہ بیتءُ آئی ءَاے بارہمودءَ رسینگی ات کہ آہانی ہمے ھسابءَسودابوتگ ات۔
آئیءِ گاڑی دنز دیان اتءُ آ گوں ھیالاں وش گپیءَ ات کہ آئیءِ گاڑیءَ یک بلاہیں کپنڈے وارت ءُ لیٹ ورانءَ کنڈےءَ شتءُ کپت.آئیءِ گاڑیءِ دیمءَ سنگے اتکگ ات کہ آئیءَ سما نہ کتگ ات.
دو روچ گوستگ ات کہ آئیءِ ہچ ھالءُسوج نیست ات.آئیءِ جون ہما کنڈءَ کپتگ اتءُ مگسگ آئیءِ سرا بالءَ ات انت.
انچوکہ آ وتی زندگیءِ روچاں پہ ورگءِ شوہازءَ چو ہمے مگسکاں بال بوتگ ات.
اصغرزہیر