سرسستگیں امروز ءِ ھسابائیں من ءُ تو
اکبر علی اکبر
غزل
سرسستگیں امروز ءِ ھسابائیں من ءُ تو
انگت ھم ھما وھدیگیں دابائیں من ءُ تو
پشت کپتگ دگہ چے مئے ھونانی رگام ءَ
کہ زنگی ئیں پستولے ءَ گابائیں من ءُ تو
سرمست ءُ ھلاھوشی ءِ کیفانی تہا گار
یک دومی ءِ لنٹانی شرابائیں من ءُ تو
دنیا ءِ نگاھانی زِر ءَ انگر ءُ آسیں
مئے چماں بچاریت چو گلابائیں من ءُ تو
پادانی ھم چیر ءَ زمین چہ مئے دراتکگ
بے سُدّی ءِ ھوشام جتیں وابائیں من ءُ تو
اکبر چوں رسیت مارا وفاھانی بہشتے
یک سنگ ءِ بُتے زرتگ توابائیں من ءُ تو