نبشتہ کار: سکی ساوڑ

من موبائل چار اِت داں بازیں مسکال ءُ کلوھے آھتگ اَت، دو کلوہ ءَ ابید ایدگہ درستیں کلوہ سمل ئیگ اِت اَنت کہ نبیس اِتگ اَت ئِے” ھال کن کجام جاہ ءَ سر بوتگ ئے؟ نوں کیچ ءَ سر ئے یا نا؟ ھال کن تو جواب کنگ ءَ نہ ئے؟ دگہ ھمے وڑیں بازیں کلوھے آھتگ اَت، دہ رند ءَ گیش پون ئِے کرتگ اَت، من سمل ءِ کلوہ ءِ پسہ دات” پھل کن کہ گوں ترا ھال کنگ نہ بوتگ، من سھبی مھلہ کیچ ءَ سر بوتگ آں تو ھال کن”.

من کلوہ روان دات ءُ مھرل ءِ بارو ءَ جیڑگ ءَ شرو بوت آں دریگتے مھرل ءَ مھر ءِ راہ یل مہ کرتین ءُ انگت مھر ءِ منزل ءَ جنزان بوتیں بلکیں منی ناسرجم زند سرجم بوتگ اَت، نہ زان آں پرچا مھرل ءَ پہ وت موالی یے درچت ءُ من ءَ یل کرت؟! پد ءَ من ءَ ھمے ھیال آھت، اگاں مھرل ءِ واستار موالی یے بلے مال ءُ دلوت ئِے وَ ھست، تئی وڑ ءَ لات نہ اِنت، ھمے وھد ءَ من مزنیں گینسارتے در کرت ءُ گوشت” مروچاں مھر پہ کلدار اِنت بلکیں ارواہ ءُ ھون ءَ ھوار نہ اِنت ءُ نہ کہ گوں کول ءُ زبان ءَ بندوک اِنت، من ھمے جیڑگانی چولانی تہ ءَ جنزان اِت آں کہ سمل ءِ پون آھت، من پون چِست کرت داں سمل ءِ گالوار دگہ وڑ آھت من ءَ ھمے سما بوگ ءَ اَت کہ سک ملور اِنت، من جست کرت” ھال کن ترا ھیر اِنت کہ تئی توار جھل ءُ دگہ وڑ اِنت؟”

آئی ءَ گوں اے شیر ءَ منی پسہ دات” وفا کے قیدخانوں میں ہوائیں کب بدلتی ہے؟
بدلتا دل کا حال تو زمانہ کب بدلتی ہے؟”

من کندگے جت ءُ پسہ دات” واہ یار کجام شائری، تو بزاں شائرے ئے ھاں من نہ زانتگ، باریں دگہ شَیرے بہ گوش”.

آئی ءَ گوں نکراھے ءِ اندازگے ءَ پسہ دات” اینچو آڈر مہ کن ، اے منی شَیر نہ اِنت، من اے شائری گاڑی یے ءِ پُشت ءَ دیستگ کہ ھمے وڑ نبیس اِتگ اَت، تو پرچا منی کلوھانی پسہ نہ داتگ اَنت ءُ پون ھم چِست نہ کرتگ؟”

من پسہ دات” پھل کن کہ من دیست لھتیں کلوہ آھتگ اَت بلے چارگ نہ بوتگ اَنت، دومی گپ منی موبائل مدام بے برمش( سائلینٹ) اِنت پمیشکا پون ءِ توار گوشاں نہ کپ اِیت، سیمی گپ من مروچی سک دزگٹ ھم بوتگ آں کہ ترا ھال ءُ اھوال بہ کرتیں”.
آئی ءَ گِلگ بنا کرت ءُ گوشت” تو تربت ءَ شتگ ئے مارا بے ھیال کرتگ، کم از کم کلوھے روان بہ داتیں،مردم اینچو بے مھر نہ بیت کہ تو ئے”.

من پسہ دات” سکی ءَ کہ وپاداری سوگند وارت داں گُڈی ساہ ءَ بے ھیال نہ بیت ءُ نہ دروہ اِیت”.

آئی ءَ گوں ارمانیں گالوارے ءَ پسہ دات” نہ زان آں کدی تو پمن ءَ مھروان بہ ئے، سکی بلے من تئی پسہ ءِ وداریگ آں پلیز نا مہ کن”.

من کندگے جت ءُ جُست کرت” کجام پسہ؟ ”

آئی ءَ گوں بھمانیں گالوارے ءَ گوشت” اررررر تو سرپد نہ ئے کہ کجام پسہ دیگی اِنت؟ واکی تو بے مھر ءُ سنگدلیں مردمے ئے”.

مب کندگ اِت ءُ پسہ دات” من بے مھر ءُ سنگدلیں مردم بوتین اِت آں گڑا مروچی اے ازابانی تہ ءَ چو مار ءِ وڑ ءَ پیچ ءُ تاب نہ وارتگ اَت، ھیر تئی پسہ ءَ من ھمود ءَ کراچی ءَ کایاں دیان، وت ءَ را ھچ پریشان مہ کن”.

بلے تو کدی واتر کا ئے؟ من ءَ ھچ آرام بوگ ءَ نہ اِنت، تو یک ءُ دو روچ ءَ منی پسہ ءَ بہ دے پلیز” .

من پسہ دات” اشتاپیں پاد ماں پلاراں اڑ اَنت، الّم ترا پسھے رس اِیت “.

بلے منی پسہ No مہ بیت شر”.

من ءَ مھرل یاد آھت کہ آ ھم اولسر ءَ گوں من ھمے وڑ مھروان اَت بلے پد ءَ …….. من ءَ سمل ءِ سر ءَ تُشّے بروسا بوگ ءَ نہ اَت، من پسہ دات” اگاں یک انسانے یکبرے رَدی یے کنت باید اِنت پد ءَ ھما رَدی ءَ دوبر مہ کنت”.
آ یکبرے ھیران بوت ءُ کمو بے تواری ءَ پد من ءَ جُست ئِے کرت” چونیں رَدی؟ مھر وَ رَدی یے نہ اِنت بلکیں دو دل ءُ دو زند ءِ یکجاھی ءِ نام اِنت”.

من مزنیں کندگے جت ءُ پسہ دات” آ دگہ وھد بوتگ اَنت کہ پہ مھر ءِ نام ءَ جانانی دیمھونی ءَ کَس چَک ءُ پد نہ بوتگ، ھر وھد کَولانی پاسداری اِش کرتگ، بلے اے دَور ءَ مھر کار شری ءِ نام اِنت ءُ وتی مکسد ءِ یاری اِنت”.

سکی من تئی ھبراں ھچ سرپد بوگ ءَ نہ آں، اگاں ترا دگہ یکے ءَ دوکہ داتگ یا دلرنج ئِے کرتگ گڑا آئی ءِ زمہ وار من نہ آں، بلے منی سر ءَ بروسا بہ کن من ترا کدی دوکہ نہ دے آں، اے منی گوں ترا ءُ ھدا ءَ سوگند اِنت” آئی ھمے وڑ گوشت ءُ بے توار بوت”.

من کمو کند اِت ءُ پسہ دات” ھیر پد ءَ گپ کن ایں پرچاکہ نوں مگرب بوگ ءَ اِنت، من ءَ کوہ ءِ مراد ءِ سجدہ ءَ روگی اِنت کہ سالے بیت کہ کوہ ء مراد نہ دیستگ”.
آئی ءَ جلدی پسہ دات” تو زگری یے ئے؟”

من پسہ دات” ھچ شَک نیست”.

آ کمو دگہ وڑ بوت ءُ پسہ ئِے دات” گڑا من ءَ پرچا تو ھال نہ داتگ”؟

من کندگے جت ءُ پسہ دات” تو جُست نہ کرتگ، من ھم ھال نہ داتگ، بلے نوں تو سرپد بوت ئے پکا”؟

آئی ءَ لھمیں پسھے دات” ھو”.

من گوشت” پلال وش اِنت گڑا، من پون کَٹ کرت”.

روان اِنت