سرگوست: گوں من ءَ سمل ءِ اجبیں مھر!بیست ءُ ھشتمی بھر
سرگوست: گوں من ءَ سمل ءِ اجبیں مھر!
نبشتہ کار” سکی ساوڑ
بیست ءُ ھشتمی بھر
سمل ءِ لُنٹانی سر ءَ مھروانیں بچکند تالان اِت اَنت ءُ گوں آیگ ءَ ھوار دست ئِے پمن ءَ شھار دات ءُ گوشت ئِے ” سکی تو چون ئے؟ جوڑ ءُ وش ئے”؟
منی چم ماں آئی ءِ بھشتیں چھرگ ءَ سک اِت اَنت ءُ من پسہ دات” بلکل وش آں، تو بہ دے ھالاں وش ءُ جوڑ بوتگ ئے؟ بلے زالم مروچی تو چم ءِ کَش ئے ماشاءاللہ”.
آئی ءَ پسہ دات” سکی من ترا دوشی گوشت کہ منی توسیپ ءَ اینچو مہ کن کہ من توسیپ ءِ لائک نہ آں پرچاکہ مھرل ءُ تئی دشتار توسیپ ءِ لائک اَنت منی چے بستار”.
ھمے وھد ءَ سمل ءِ دیم تھار بوت ءُ من ءَ گوشت ئِے” بیا گراسی ءَ کمو نند ایں اد ءَ وَ اینچو اوشتگ ءُ دیوان نہ بیت”.
من پسہ دات” تو اوں ماشاءاللہ چَہ منی دشتار ءُ مھرل ءَ کم نہ ئے بلے ھر کَسی وتی مھرے ءُ ھر یکے ءِ مھر وتی جاہ ءَ بروبر اَنت، پرچاکہ مھرل ءَ من ءَ مھر داتگ ءُ پد ءَ ازاب، منی دشتار منی سیاد ءُ وارس اِنت ءُ ماس ءِ دوستیں گھار زھگ اِنت، بلے …..منی گپ سرجم نہ اَت کہ سمل ءَ منی دست چِک اِت ءُ گراسی ءِ نیمگ ءَ روان بوت ءُ گوشت ئِے” بلے من درامدے آں گند ئے”؟
من کندگے جت ءُ پسہ دات” نا سمو اے گپ نہ اِنت کہ تو پمن ءَ درامدے ئے، بلے نوں تو پمن ءَ درامدے نہ ئے انچوش بہ پھم تو منی وتی یے ئے”.
ھمے وھد ءَ سمل ءَ منی دست یل کرت ءُ چَہ وتی بیگ ءِ گِیسگ ءَ ٹشو پیپرے در کرت ءُ پسہ ئِے ” سکی اگاں تو من ءَ وتی بہ پھم اِتیں گڑا اینچو کاڈیاری نہ کرتگ اَت”.
سمل گوں ٹشو پیپر ءَ وتی دیم ءِ ھیدانی پھک کنان اَت ءُ منی پسہ ءِ وداریگ اَت باریں سکی چے گوش اِیت، من پسہ دات” بچار سمو من پیسر ءَ تئی کرّ ءَ وتی سرجمیں گپ کرتگ اَنت، بلے نوں یک گپے اوں پَشت نہ کپتگ کہ چَہ تو چیر ئِے بہ دے آں”.
ما گراسی ءَ درچکے ءِ ساھگ ءَ نشت این ءُ سمل ءَ پہ من ءَ ٹشوپیپرے شھار دات ءُ گوشت ” سکی بلے من ترا اینچو پہ آسانی وتی دست ءَ چَہ روگ ءَ نیل آں”.
وھدے کہ سمل ءَ چوش گوشت گڑا من ھیران بوت آں چے پسہ بہ دے آں!، ھمے وھد ءَ نورشاہ من ءَ یاد آھت واکی اے پہ زور باز کرت کن اَنت، سمل ھم نورشاہ ءِ زھگ اِنت ءُ وتی پِس ءِ مدت ءَ باز کرت کنت، پرچاکہ مروچی ھمیشانی بادشاھی اِنت اے ھرچی بہ کن اَنت کرت کن اَنت، من ٹشو پیپر زرت ءُ وتی ھیدانی پھک ءَ بنا بوت آن ءُ پسہ دات” تو من ءَ یل بہ کن گھتر اِنت پرچاکہ من تئی ھمسپرے بوت نہ کن آں پرچاکہ من شمے پادی پازوارے/ پادی چمپلے نہ آں ، من ءَ پھل کن کہ من وتی گمجتیں زند ءِ تہ ءَ وش آن ءُ ھمے وڑ ءَ وتی چار روچی زند ءَ گوازین آں”.
سمل گوں ھیرانیں نگاھے ءَ من ءَ چارگ ءَ اَت ءُ پسہ ئِے دات” سکی من ھیران آں تو پرچا وت ءَ را پریشان کرتگ؟!اے دو روچی زند ءَ باید اِنت مردم گوں وشھالی ءَ بہ گوازین اِیت بلے من نہ زان آں تو پرچا وت ءَ را دست ء وت اے وڑ کرتگ”!.
من پسہ دات” مئے چاگرد کہ وشھال نہ اِنت گڑا من چوں وشھال بوت کن آں؟! پرچاکہ بدمنتگیں چاگرد مدام بے سریں جیڑھانی آماچ بنت، پدمنتگیں چاگرد ءِ تہ ءَ کَس وتی پیسلہ ءَ کرت نہ کنت اگاں پیسلہ کرت بہ کنت گڑا آئی ءَ را الم چَہ ساہ ءَ سرگوزگ کپ اِیت”.
سمل ءَ گوں ھیرانی ءَ من ءَ جُست کرت” سکی ترا مروچی چون اِنت، من دگہ گپے کن آن ءُ تو دگہ پسوے دے ئے؟!
من وتی بے اوستیں لُنٹانی سر ءَ بچکندے تالان کرت ءُ پسہ دات” منی جند کہ دگہ وڑ اِنت الم پسہ دگہ وڑ بنت، دگہ ھال کن چون اِنت شمے وانگ؟”
سمل” وانگ شر اِنت بلے لھتیں وھد اِنت کہ وانگ شریں وڑے ءَ بوت کنگ ءَ نہ اِنت”.
من جست کرت” پرچاکہ وانگ بوت کنگ ءَ نہ اِنت زاناں جیڑھے ھست گڑا بہ گوش؟”
سمل” جیڑہ دگہ نیست، بس جیڑہ ھمیش اِنت کہ باریں تو پرچا اینچو اڑی کنگ ءَ ئے؟”
من ءَ سک کندگ ءَ گپت ءُ من پسہ دات” من ءُ جیڑہ؟! منی واستا ھچ پریشان مہ بو، وتی وانگ ءَ پہ منی واستا ھراب مہ کن ، بلے من نہ زان آں پرچا تو گوں گنوکی ءَ گوں من ءَ اینچو مھر کنگ ءَ ئے؟ من کجام کردے ءِ مالکے آں کہ تو پمن ءَ بہ جیڑ ئے؟!.
سمل ءَ پسہ دات” سکی من زان آں تو گریبے ئے، تئی کرّ ءَ مال ءُ دولت نیست، تو در مزھبے ئے، منی ءُ تئی سور پہ مشکلے بہ بیت ھاں بلے پہ آسانی نہ بیت، سکی مزنیں گپ اِیش اِنت مھر پہ زَر چارگ نہ بیت، مھر پہ مزھب چارگ نہ بیت، من ءَ کہ گوں تو مھر اِنت دگہ ترا چے بہ گوش آں کہ من ءَ گوں تو پرچا مھر اِنت؟ من ءَ گوں تو پمیشکا مھر اِنت کہ تو شریں مردمے ئے”.
من بے توار اِت آن ءُ چم ماں آئی ءِ چھرگ ءَ سک اِت اَنت، من ءَ چوناھا مدام وتی سر ءَ بد آھتگ اَت کہ سکی اگاں ترا زر ءُ مال بوتیں یا ترا شریں کردے بوتیں گڑا ترا کَسے ءَ نہ دروہ اِتگ اَت، بلے مروچی تئی بھت ءَ یک انچیں ھمسپرے پیداک اِنت کہ آئی ءَ را چَہ زر ءُ مال ءَ گیش گوں تئی جند ءَ مھر اِنت، بوت کنت سمل ءِ ھمراھی پہ تو نوکیں زندے بوت بہ کنت، سکی مروچی گوں سمل ءَ مھر ءِ درشان ءَ بہ کن گھتر اِنت چوش مہ بیت کہ وھد چَہ تئی دست ءَ بہ گوز اِیت، من وتی لُنٹ پہ مھر ءِ درشانی ءَ سُرینت اَنت کہ سمل ءَ گوش آں ، سمل مروچی ءَ پد تو داں گُڈی ساہ ءَ منی زند ءِ ھمسپر ئے بلے ھمے وھد ءَ جھندم اِنت نورشاہ ءِ اکس یاد آھت ءُ من ملور بوت آں، پرچاکہ اے اکسے نہ اَت پورا ملکموتے اَت، ھچ نہ زانگ ءَ اِت آں کہ چَہ اے اکس ءَ وت ءَ را چوں آجو بہ کن آں؟! پرچاکہ مھر ءِ دیم ءَ بازیں اڑ ءُ جنجالے ودی بوان اَت، من پسہ دات”تئی گپ بے درور اَنت بلے تو من ءَ انگت کمو وھد بہ دے پرچاکہ اے کسانیں جیڑھے نہ اِنت کہ مردم اینچو زوت پیسلہ کرت بہ کنت”.
سمل” ھیر من ترا انگت دہ روچ دے آں تو وتی پیسلہ ءَ بہ کن بلے من ءَ ،، نا،، ھچ دوست نہ بیت”.
من کندگے جت ءُ پسہ دات” ھیر بیت بلے تو اینچو کنجوسی مہ کن من تئی مھمان آں بلے بھتاور تو پہ گپ منی نُک ھشک کرتگ، نہ گوش ئے کینٹین ءَ چاہ ءُ آپے بہ وارین آن ئِے “.
سمو ءَ کند اِت ءُ پسہ دات” من پہ تو زھیر کرتگ ءُ پد ءَ مئے جیڑہ مزن اِنت پمیشکا من بے ھیال کرتگ، بلے من ءَ آپ ءُ جوس گوں تئی دیگ ءَ اِش بے ھیال بوتگ آں، سمل ءَ چَہ وتی بیگ ءَ آپ ءُ جوس کَش اِت اَنت ءُ دیم ءَ ایر ئِے کرت اَنت، ایش اَنت بلے پکا گرم بوتگ اَنت”.
من آپانی بوتل پچ کرت ءُ پسہ دات” نا انگت، گرم نہ اَنت، تو ربڑ ءِ گلاس گپتگ یا نا؟”
سمل” نا من نہ گپت، گلاس ءَ چون کن ئے، بوتل ءَ دپ ءَ کن”.
من بوتل ءِ دپ پچ کرت ءُ ماں سمل ءَ شھار دات ءُ گوشت” بہ زور تو بور گڑا من رَند ءَ ور آں”.
سمل ءَ پسہ دات” نا تو یکبرے بور ، من پد ءَ ور آں”
من کندگے جت ءُ جست کرت ” تو بزاں ناز نہ کن ئے ءُ منی گُڈاں ھم ور ئے”؟
سمل ءَ کند اِت ءُ پسہ دات” وھدے کہ یکے ءَ را گوں دومی ءَ مھر بہ بیت گڑا آ جاہ ءَ ناز ھلاس بیت سکی، پمیشکا تئی گُڈی پمن ءَ مھر اَنت”.
(ھمے وھد ءَ من ءَ مھرل ءِ کسھے یاد آھت کہ یک شپے مھرل ءَ من ءَ جُست کرت” سکی اگاں ترا گوں من مھر ھست گڑا من ترا مروچی چکاس آں”.
من پسہ دات” پہ تو سر کربان اِنت جگر بہ چکاس “.
آئی ءَ وتی دیم ءِ گلاس زرت، آپ ئِے مان کرت ءُ پد ءَ تُکّے ماں ھمے گلاس ءِ تہ ءَ جت ءُ گوشت ئِے” سکی اے گلاس ءِ آپاں بہ ور اگاں ترا گوں من مھر ھست”.
من پسہ دات” مھرل تو من ءَ سک دوست ئے ءُ من اے آپاں ور آں بلے من ءَ درد بیت کہ تو آپانی تہ ءَ تُکّ جتگ، نہ زان ئے کہ آپ ءِ تُکّ جَنگ سک گناہ اِنت”؟
من گلاس ءِ آپ وارت اَنت ءُ مھرل ءَ پسہ دات” من بس ترا چکاس اِتگ، دگہ وھد ءَ آپانی تہ ءَ تُک نہ جن آں”.)
من زانگ ءَ اِت آں کہ مھر چی یے؟ پمیشکا گُڈّیانی ورگ پہ سمل ءَ مزنیں جیڑھے نہ اَت، من پسہ دات” تئی مھر ھست بات اَنت”.
ما آپ ءُ جوس وارت گڑا سمل ءَ من ءَ جُست کرت” سکی تو مروچی من ءَ الم مھرل ءِ بارو ءَ بہ گوش کہ آ کے اِنت؟”
من پسہ دات” آ منی ارواہ ءِ گُڈی چیدگ اِنت ءُ من مھرل ءِ کسہ ءَ بنا بوت اَنت”.
روان اِنت