سرگوست: گوں من ءَ سمل ءِ اجبیں مھر!سی ءُ ھشتمی بھر
سرگوست: گوں من ءَ سمل ءِ اجبیں مھر!
نبشتہ کار: سکی ساوڑ
سی ءُ ھشتمی بھر
من بس ءَ سوار اِت آں بلے سک پریشان اِت آں باریں نورشاہ من ءَ چونیں پسھے دنت؟ باید اِنت من پریشان مہ بوتیں پرچاکہ ھبرسندی ءِ گپ بندات بوگ ءَ اَت ءُ پمن ءَ باز وشی ءِ گپے اَت بلے نورشاہ ءِ اکس ءَ من ءَ چَہ سرجمیں وشیاں زبھر کرتگ اَت، ھر وھد کہ اکس ءِ ترانگاں کپت آں گڑا درستیں وشی گوں اوستانی بچکنداں ایرموش بوتگ اِت اَنت، سرجمیں راہ ءَ برے جیڑان اِت آن ءُ برے گوں سمل ءَ کلوہ ءِ سر ءَ ھمدیوان اِت آں، ھمے کلوھانی تہ ءَ سمل ءَ گوشت” سکی مروچی من باز وش آں کہ تو پہ ھبرسندی ءَ پیداک ئے ءُ تو منی کھول ءَ را ھم دوست ئے، آ ترا الم زاماس کن اَنت”.
من پسہ دات” وشی ءِ روچ مروچی نہ اَنت، وشیانی روچ ھما بنت کہ من ءُ تو زند ءِ ھمسپر بہ بہ ایں، پرچاکہ انگت ھبرسندی ءِ گپ نہ بوتگ ءُ مھر ءِ سپر روان اِنت”.
سمل” بلے من ءَ وتی اللہ ءِ سر ءَ بیسہ اِنت ءُ آ روچ مروچی ءَ پد بندات بنت”.
من ” ان شاءاللہ، شر اِنت، من گڑا نوں شمے گِس ءَ سر بوگ ءَ آں، بلے من زان آں تو وتی پِس ءَ بہ گند ئے منی کرّ ءَ نیا ئے گند ئے؟”
سمل” تو بیا من کمو تئی دیوان ءَ کایاں، باز نشت نہ کن آں کہ پس ءِ کرّ ءَ ترس اِیت”.
من ” ھاھاھاھاھا ھمینچو باز اِنت، دگہ ھال کن تئی پِس ءُ آسپ ساڑی اَنت یا نا؟”
سمل” پس ساڑی نہ اِنت بلے ما آدگہ درست ساڑی ایں”.
من چَہ بس ءَ ایر کپت آں، رکشایے زُرت ءُ نورشاہ ءِ گِس ءِ مزن در ءِ دپ ءَ ایر کپت آں، مزن در ٹُک اِت ، پاسبان ءَ در پچ کرت ءُ جست کرت” تو کے ئے ءُ کے ءَ لوٹ ئے”؟
یکبرے دل ءَ گوشت کہ پاسبان ءَ را بہ گوش من نورشاہ ءِ آیوکیں زاماس آں ھاھاھاھاھا بلے پد ءَ اکس ءَ زبان گُنگ کرت ءُ من پسہ دات ” من سکی بکش آں، واجہ نورشاہ ءِ مھمانے آں، واجہ ءَ من ءَ لوٹائینتگ “.
آئی ءَ در بند کرت ءُ دمانے ءَ پد در ئِے پچ کرت داں آسپ منی چماں کپت کہ بچکندگ ءَ اَت،من ءَ وش آھت ئِے گوشت ، امباز اِت ءُ گوشت ئِے” سکی بکش پھل کن ترا پاسبان ءَ نہ زانتگ، بیا لوگ ءِ تہ ءَ رو ایں”.
منی چم سمل ءِ شوھازگ ءَ اِت اَنت بلے ڈن ءِ نیمگ ءَ گندگ بوگ ءَ نہ اَت، ما مزن بان ( ھال) ءِ تہ ءَ شت ایں، داں ھمے وھد ءَ سمل ءُ آئی ءِ ماس مزن بان ءِ تہ ءَ منی وداریگ اِت اَنت ، سمل ءِ لُنٹانی سر ءَ بچکندے تالان اَت ءُ ھمے زانگ بوگ ءَ اَت کہ آ سک وش اَت، سمل ءِ ماس ءَ گوشت” بپا پہ ھیر منی زھگ”.
من ماس ءِ دست چُکّ ات اَنت ءُ گوشت” اما شمے مھر ھست بات اَنت”.
سمل ءَ ھم وتی دست شھار دات ءُ گوشت” سکی گوں دل ءِ جھلانکی ءَ وش آھت ئے( موسٹ ویلکم).”
من وتی لنٹانی سر ءَ مھروانیں بچکندے تالان کرت ءُ پسہ دات” شمے مھروانی مدام انچوش بات”.
ما سُپاسِٹانی سر ءَ نشت ایں، سمل ءَ آپ آؤرت ءُ دات، اے روچ ءَ سمل انچوش گَل ءُ شاد اَت پورا بال کنگ ءَ اَت، ما وشیں وڑے ءَ دیوان اِت ایں بلے اکس منی چمانی دیم ءَ چو ملکموت ءَ اوشتاتگ اَت، یکبرے دل ءَ ھمے پرمان کرت کہ سمل ءَ بہ گوش، باید اِنت شما اے اکس ءَ نورشاہ ءِ جند ءِ کمرہ ءِ تہ ءَ بہ ٹَنگ ات گھتر اِنت بلے پد ءَ ھچ گوشت نہ کرت، وھدے کہ ما کند اِت گڑا چمانی دیم ءِ اکس ءَ وشیانی کندگ زوال کرت اَنت، دیوان سک وش روگ ءَ اَت کہ گاڑی یے ھارنے ءَ توار کرت ءُ سمل ءَ گوشت” پِس آتک”.
سمل پاد آھت ءُ شُت، دمانے ءَ پد نورشاہ مزن بان ءِ تہ ءَ آھت داں منی جان ءِ واک شت، یکدیم ءَ اکس اَت ءُ دومی نیمگ ءَ اکس ءِ مالک، آئی ءَ من ءَ دیست ءُ کمو بچکند اِت، منی کر ءَ آھت ءُ دروت ئِے گوشت”.
من دراھباتی گوشت ، آئی ءَ کہ من ءَ امباز اِت ھمے وھد ءَ من ءَ ھمے سما بوگ ءَ اَت، پورا من ملکموت ءِ امبازانی باھوٹ بوگ ءَ آں، آئی ءَ من ءَ چَہ وتی امبازاں آجو کرت، ھمے وھد ءَ من ءَ ھمے سما بوت یکبرے پد ءَ من ءَ زندگ بوگ ءِ موہ رسگ ءَ اِنت، ما نشت ایں، گپ ءُ دیوان بندات بوت، سمل چَہ چُل ءَ در آھت ، پریج ءَ آپ ئِے در کرت ءُ نورشاہ ءَ را دات ، نورشاہ ءَ گوشت” آسپ تو بہ رو چَہ گاڑی ءَ ورگاں در کن کہ سُبارگ ءِ وھد اِنت”.
آسپ شت، ما یکبرے پد ءَ دنیاداری گپ ءَ بنا بوت ایں، داں سُبارگ وڑ بوت، آسپ ءَ توار جت” ابا نان ایر اَنت، بیا اِت”.
ما پاد آھت ایں، ورگجاہ ءَ شت ایں، داں سرجمیں ورگ ایر اِت اَنت، سمل ، آئی ءِ ماس ءُ آسپ نشتگ اِت اَنت، ما ھم نشت ایں، ورگ بندات بوت، ھیال باز جاہ ءَ روان اَنت، یکروچے کیت من مھمانے نا بلکیں ھمے گِس ءِ یک باسکے باں، پد ءَ سرجمیں ترس ھلاس بنت، نا اے اکس ترسناک بیت ءُ نا نورشاہ، ھمے وھد ءَ چم ماں سمل ءَ کپت اَنت داں آ نیم چمی من ءَ چارگ ءَ اَت ، من کہ چار ات آئی ءِ لنٹانی سر ءَ مھروانیں بچکندے تالان بوت، من ھم بچکند ءِ پسہ دیگ ءِ جھد کرت بلے نورشاہ منی کَش ءَ نشتگ اَت، من سمل نہ چار اِت ءُ ھیال دگہ نیمگے کرت.
ما ورگ وارت ، پد ءَ مزن بان ءِ تہ ءَ آھت ءُ نشت ایں، جان ءَ گیش لرزگے زرت باریں نورشاہ چونیں گپے بندات کنت!، سمل ءِ ماس، براس، پِس منی کش ءَ نشتگ اِت اَنت بلے سمو بیگواہ اَت، من زانت کہ نوں نئیت، داں نورشاہ ءِ توار منی گوشاں کپت کہ گوشت ئِے” سکی بکش تو وت سرپد ئے کہ ما ترا اد ءَ پرچا لوٹائینتگ؟ سانگ ءُ سانگبندی یک کسانیں پیسلھے نہ اِنت کہ مردم ڈارک ھما پیسلہ ءِ نیمگ ءَ روت، اگاں یکے مردمے سانگ ءُ سانگبندی کنگ لوٹ اِیت، آ وتی مردمے بہ بیت یا درامدے بلے آئی ءِ پُشپد( بیک گراونڈ) ءِ زانگ المی اِنت، پیسر ءَ ما ترا بس ھمے زانتگ تو نادراھجاہ ءَ یک اسسٹینٹے ءِ دروشم ءَ کار ءَ ئے بلے مروچی تو یک انچیں کارے ءَ آھتگ ئے کہ تئی زانگ المی اِنت، تو کے ئے ؟ کجا نشتگ ئے؟ تئی زات ءُ زُریات چے اِنت؟”
من گُنگ اِت آں، بس گپانی گوشدارگ ءَ اِت آں، بلے اے جُستاں من ءَ دگہ وڑ کرتگ اَت، پرچاکہ اے انچیں جُست اِت اَنت کہ اے جُستانی پسہ نزیکی ءَ سوچ گنتر دُور کنگ ءَ اِت اَنت، من پسہ دات” واجہ تئی بے دَروریں گپ انت کہ بے زانگ ءَ کَس سانگ ءُ سانگبندی کرت نہ کنت،من یک بزگرے ءِ زھگے آں، من چَہ مال ءُ مڈی ءَ زبھر آں، من ھزدار ءِ دمگ گریشگ ءَ نشتگ آں کہ ھود ءَ نا نیٹورک ھست ءُ نا دگہ آسراتی یے بزاں کہ درستیں آسراتیاں زبھر اِنت،انوں من نادراھجاہ ءَ پہ ھشت ھزار ءَ کار ءَ آں، تو وت سرپد ئے،. زات ءَ بلوچے آں، مارا ساجدی گوش اَنت “.
نورشاہ یکبرے بے توار بوت ءُ پد ءَ گوشت ” سکی بکش بیٹا اے دَور ءَ اگاں زَر ءُ مال نہ بوت گڑا کس کسیگی نہ بیت ءُ کَس کسے ءَ را وتیگ نہ کنت، ترا مالوم اِنت اے گس ءِ تہ ءَ تو نشتگ ئے اے گس ءِ نھاد چینچک اِنت؟! اے گِس ءِ نھاد مروچی پنچ کروڑ ءَ بُرز اِنت، ھشتاد لک منی سواری ءِ گاڑی اِنت، بیست دکان مارکیٹ ءَ منی چلگ ءَ اِنت، بیست پَلاٹ ءَ گیش منی کر ءَ ھست، دگہ یک گِسے جوھر ءَ منی ھست پہ کرایہ ءَ داتگ، بلے ترا نہ گسے ھست ءُ نہ نوکری ءُ روزگارے، بوت کنت تو منی گپاں پوہ بوت ئے”.
من بژنی بچکندے وتی لُنٹانی سر ءَ تالان کرت ءُ پسہ دات” جی ھو واجہ اے دَور زَر ءِ گلام اِنت پمیشکا مھر پہ زَر بھا اِنت، مروچاں زَر ءَ مھر بھا کرتگ، من پھلی لوٹ آں کہ من وتی بستار بے ھیال کرتگ ، اُمیت اِنت چد ءُ پد اے رَدی چَہ من ءَ نہ بیت، اللہ ترا تئی مال ءُ مڈیاں مراد بہ دنت”.
نہ زان آں پرچا اے وھد ءَ اکس ءِ ترس چَہ منی مجگ ءَ بیگواہ اَت، من ءَ نورشاہ ءِ گپاں سک تَور اِت کہ آ زَر ءِ شان ءَ اَت، آئی ءَ را اے سرپدی نیست اَت کہ اے مال ءُ مڈی منی کماتگیں زَر نہ اَنت، یکبرے من گوشت کہ آئی ءَ را گوش آں، تئی پگار اگاں بہ بیت چَہ لک ءَ گیش نہ بیت بلے اے پنچ کروڑ والا گس ءُ ھشتاد لکی گاڑی تو چَہ کجا آؤرتگ، من شر سرپد آں بلے ھچ نہ گوشت، نورشاہ ءَ وتی دیم بہ من ءَ کرت کہ سک دیم تھار ءَ اَت ءُ گوشت ئِے” مروچاں مھر ءِ جند نیست، ترا گوں منی زھگ ءَ مھر نہ اِنت بلکیں گوں منی زَراں مھر اِنت”.
آئی ءَ کہ چش گوشت گڑا سمل ءِ ماس ءَ گوشت” نورشاہ باید اِنت تو اے وڑیں گپ گوں سکی ءَ مہ کن ئے پرچاکہ اول سر ءَ سمی ءَ سکی گوشتگ گوں من ءَ آروس بہ کن بلے سکی رازی نہ بوتگ”.
من گوشت” واجہ پھل کن کہ من دگہ گپ کرت نہ کن آں، اگاں تو موکل دات کرت کن ئے گڑا من رو آں کہ من ءَ جناہ ھسپتال ءَ کارے ھست”.
روان اِنت