سرگوست: گوں من ءَ سمل ءِ اجبیں مھر!سی ءُ ھپتمی بھر
سرگوست: گوں من ءَ سمل ءِ اجبیں مھر!
نبشتہ کار: سکی ساوڑ
سی ءُ ھپتمی بھر
سمل کہ رھادگ بوت گڑا منی جان ءَ گیشیں ترسے ودی بوت اگاں نورشاہ ھال بہ کنت گڑا من چے پسہ ئِے بہ دے آں؟! اگاں شر شر گپ بہ کنت مردم ھمتے کنت بلے ایشانی کار انچیں کارے کہ کدی شر شر ءَ گپ نہ کن اَنت پرچاکہ ایشاناں شر شریں گپ اِش سوج نہ داتگ ، من زان آں سکی تو نوں زندگ ءَ زندگ کَل کنگ بہ ئے پرچاکہ ایشی ءِ اکس وت ملکموتے، ھمے وھد ءَ بس آھت من سوار بوت آں،بلے ھیال چَہ اکس ءَ ٹگَلگ ءَ نہ اَت، منی دیم پہ دیم ءَ شررنگیں جنکے نشتگ اَت ءُ منی چارگ ءَ اَت، منی کہ چم ئِے کپت اَنت، گڑا دل ءَ گوشت کمو ھیال ءَ گوں ھمیشی ءِ چارگ ءَ بہ ٹگّلیں گھتر اِنت بلے پد ءَ نورشاہ ءِ اکس یاد آھت، سکی ترا پیسری بس نہ اَنت تو ایشی ءِ چارگ بنا کرتگ؟ من کمو بچکند ات ءُ پد ءَ لُنٹانی سر ءَ ھمے بچکند ھوشام بوت، ھیال پد ءَ ماں اکس ءِ نیمگ ءَ شت، چوش مہ بیت نورشاہ ترا بہ لوٹائین اِیت ءُ دگہ جیڑھے ءِ آماچ بہ کنت، پرچاکہ اے مدام گوں ھمے وڑیں جیڑھاں دوچار اِنت، منی چم پد ءَ ماں ھما جنک ءَ کپت اَنت داں انگت آئی ءِ چم ھمے نیمگ ءَ اِت اَنت، من پد ءَ نہ چار اِت، بس ملیر ءَ سر نہ اَت کہ پون ءَ توار جت، من موبائل چار اِت داں نورشاہ ءِ پون اَت، جان ءَ لرزگے زُرت، یکبرے دل ءَ گوشت پون ءَ چست مہ کن بلے پد ءَ چار اِت چش کنگ شریں چیزے نہ اِنت، یکبرے پون ءَ چست کن آں پرچاکہ ھال کنگ الّمی اِنت باریں نورشاہ چے گوش اِیت،اگاں سک جزباتی بوت گڑا مردم پد ءَ پہ وت راھے درگیج اِیت، من پون چست کرت ءُ سلام دات، آئی ءَ والیک کرت ءُ گوشت ” بیٹا تو وش ءُ جوڑ ئے”؟
من کجا وش ءُ جوڑ باں کہ ملکموت ھال کنگ ءَ اِنت، من پسہ دات” جی بلکل سلامتی اِنت واجہ، شما چون اِت؟”
نورشاہ” ما ھم وش ایں، من ءَ گوں تو کارے ھست کمو گپ کنگی اِنت”.
من پسہ دات” جی شر واجہ گپ بہ کن بلے من نوں گاڑی ءَ سوار آں، من وھدے وتی کمرہ ءَ سر باں گڑا ترا وت پونے کن آں”.
آئی ءَ پون کٹ کرت، منی جان ءَ پورا ھیدے ءَ مانشانت، کلام ءَ شر جت سکی، پکا تو گوں ازگاریں جنکانی دوستی ءَ وتی جند ءَ برباد کنائین ئے، گوں ترس ءُ لرزیں بالاد ءَ ھمے روچ ءَ ریمبو ھوٹل ءَ نہ شت آں ڈارک کمرہ ءَ آھت آں، آپے وارت، بلے جیڑگ ءَ اِت آں، نورشاہ ءَ پون بہ کن آں یا نا، داں پون ءَ توار کرت، من موبائل چار اِت داں سمل ءِ پون اَت، من پون چست کرت، آئی ءَ گوشت” ھال کن ترا پِس ءَ ھال کرتگ یا نا؟”
من پسہ دات” ھو نیم ساھتے ءَ پیسر پون ئِے کرتگ بلے من راہ ءَ اِت آں پمیشکا گپ کنگ نہ بوت، سمو گپے بہ گوش آں، من ءَ گوں تئی پس ءَ گپ کنگ سک ترس اِیت کہ جند ءَ ھبر مہ دنت”.
سمل ءَ کندگے جت ءُ گوشت”سکی تو چو پرچا ترسگ ءَ ئے ؟ ترا منی پِس ھچ کرت نہ کنت ،اگاں ترا ھرچی بوت من تئی زمہ دار آں”.
من ھم کندگے جت ءُ گوشت” پولاد پولاد ءَ وارت نہ کنت، شما وت ماں وت ٹھ اِت بلے منی واستا اللہ ءِ جند اِنت، اگاں تئی پِس جیڑھے بہ کنت پد ءَ تو چے کرت کن ئے؟”
سمل” من زان آں منی پِس ترا کُشت نہ کنت پرچاکہ منی پِس کُشوکے(قاتلے) نہ اِنت کہ تو چش بہ ترس ئے، دگہ ترا ھرچیز ئِے کرت من ترا پیشدار آں کہ من چے کرت کن آں، دگہ بہ گوش”.؟
من وتی دل ءَ گوشت، چَہ تئی پِس ءِ اکس ءَ زانگ بیت کہ کاتلے مپت ءَ من ءَ پرچا تسلاہ دے آں؟، من کندگے جت ءُ پسہ دات” مہ کُش اِیت دگہ ھیر اِنت، من پمیشکا ترسگ ءَ بوتگ آں کہ ساہ ءَ کبز مہ کنت پرچاکہ گوں اے ساہ ءَ ھزاراں واھگ ءُ اوست بندوک اِنت”.
سمل ءَ ھم کند اِت ءُ جست کرت” ھمے واھگانی تہ ءَ من گون آں یا نا”؟
من پسہ دات” تو وَ اولی لمبر ءَ ئے شررنگ ھچ پریشان مہ بو انچوش کہ تئی پِس رازی بہ بیت”.
سمل” ھیر بیت، انوں ماس من ءَ توار ءَ اِنت پد ءَ ھال کن ایں”.
سمل ءَ پون کٹ کرت، من وتی چمپل پادا کرت اَنت ءُ چَہ پدیانک( سیڑیاں) ایر کپگ ءَ اِت آں کہ نورشاہ ءِ پون آھت، گوں نورشاہ ءِ لمبر ءِ گِندگ سرجمیں جان ءِ واک شت، من ھشک ءُ ھیران اِت آں کہ چے بہ کن آں!؟ من واتر کرت ، پون چست کرت ءُ دروت گوشت، دراھباتی ءَ پد آئی ءَ گوشت” تو کمرہ ءَ سر بوت ئے گڑا گپ بہ کن آں”؟
من لھم لھم ءَ پسہ دات” جی ھو واجہ تو وتی گپاں بہ گوش”.
نورشاہ” سمی ءَ گوما تئی ءُ وتی بارو ءَ گپ کرتگ کہ من گوں سکی بکش ءَ آروس کنگ لوٹ آں اے گپ راستے”؟
منی زبان گُنگ اَت کہ چے پسہ بہ دے آں!؟ من چار اِت گپ داں اد ءَ سر اِنت ، الم پسہ دیگی اِنت، گڑا من ھمت کرت ءُپسہ دات” واجہ من گوں تو وتی ءُ سمی ءِ سرجمیں گپاں کن آں، من سرجمیں گپانی کنگ ءَ بنا بوت آں داں نورشاہ ءَ گوشت” تو من ءَ بس ھمے بہ گوش تو ءُ سمی دوئیں آروس ءَ تیار اِت یا نا؟ آدگہ گپاں من پد ءَ گوشدار آں”
من پسہ دات” واجہ اگاں سمی ءَ شمارا اے گپ گوشتگ گڑا الم اے گپ راستے”.
نورشاہ” شر، تو چوش کن باندا سُوارگ ءَ منی گِس ءَ بیا، گڑا دیم پہ دیم ءَ من ءُ تو گپ کن ایں گھتر اِنت”.
کلام ءَ شر جت من گوں تو پون ءَ گپ ءَ ترسگ ءَ آں بلے تو من ءَ وتی گس ءَ لوٹائینگ ءَ ئے کہ بیا دیم پہ دیم ءَ گپ کن ایں، نوں سکی اللہ ءَ ترا نواہ اِتگ،من پسہ دات” واجہ تو من ءَ یک ءُ روچ ءَ موہ بہ دے من دزھور باں الم کایاں، بوت کنت یکشمبے ءِ روچ ءَ بیایاں”.
نورشاہ” شر بیٹا، بلے تئی سی وی من دو سے جاہ ءَ داتگ الم تئی کار بیت وت ءَ زھنی ھوالہ تیار بہ کن”.
من وتی دل ءَ گوشت، سی وی ءَ سوچ کہ ساہ ءِ مسلہ اِنت ترا سی وی ءِ گم پِر، من پسہ دات ” جی شر واجہ شمے لک منت”.
نورشاہ ءَ اللہ آپز کرت ءُ پون کٹ کرت، وھدے من ھیال کرت داں جان ھید مچیل اَت، انگت اللہ ءِ شکر اَت کہ نورشاہ جزباتی نہ اَت ءُ شر شر گپ ءَ اَت، من سمل ءَ کلوھے دات” اگاں تو دزھورک ئے گڑا پونے بہ کن کارے ھست”.
من دیم پہ ریمبو ھوٹل ءَ شت آں چاھے لوٹائینت دانکہ کمو مجگ بہ سھڑ اِیت من چاہ ھلاس نہ کرتگ اِت آں کہ سمل ءِ پون آھت” من پون چست کرت، دروت ءُ دراھباتی ءَ پد من گوشت” انوں منی ءُ تئی پِس ءِ گپ بوت، بلے تئی پِس گوشگ ءَ اِنت تو باندا سوارگ ءَ گِس ءَ بیا دیم پہ دیم ءَ شمے بارو ءَ گپ کن ایں، بلے باندا منی آیگ نہ بیت پرچاکہ دزگٹ آں، گڑا یکشمبے ءِ روچ ءَ ان شاءاللہ کایاں، تو چش کن وتی ماس ءُ آسپ ءَ وڑ بہ کن شر”.
سمل ” تو باندا بیاتکین ئے شرتر اَت، اگاں آھت نہ کن ئے گڑا یکشمبے ءَ الم بیا، من تناوا وتی جھد ءَ برجاہ دار آں، ان شاءاللہ کامیابی مئیگ اِنت، دگہ ھال کن چے کنگ ءَ ئے”؟
من ریمبو ھوٹل ءَ چاھے ورگ ءَ آں اگاں ور ئے بیا”.
ما داں دیر ءَ گپ ءُ دیوان کرت، بلے ھمروچ مے ھال ءُ اھوال برجاہ اَت، سمل ءَ وتی ماس راہ ءَ آؤرتگ اَت بلے براس ئِے شریں وڑے ءَ رازی نہ اَت ات ،یکشمبے ءِ شپ ءَ من نورشاہ ھال کرت ءُ گوشت” واجہ من باندا سوارگ ءَ ان شاءاللہ شمے گِس ءَ کایاں”.
آئی ءَ پسہ دات” جوان اِنت بیٹا بیا ، ما تئی ودار ایں”.
اللہ رھم ھمے ودار دگہ کزاھے ءَ درو مہ دنت گرک اِنت،دومی روچ ءِ یازدہ ءَ من چَہ کائدآباد ءَ در آھت آں دیم پہ ڈپینس ءَ رھادگ بوت آں.
روان اِنت