سرگوست: گوں من ءَ سمل ءِ اجبیں مھر۔سی ءُ ششمی بھر
سرگوست: گوں من ءَ سمل ءِ اجبیں مھر
نبشتہ کار: سکی ساوڑ
سی ءُ ششمی بھر
ما نشت ایں، ویٹر آھت ءُ لِسٹے مے دیم ءَ ایر ئِے کرت، سمل ءَ گوشت” سکی بہ گوش چے ور ئے؟”
من کجا ورگی ات آں، من ھیران اِت آں باریں سمل ءَ من ءَ پرچا لوٹائینتگ؟! من لسٹ ءِ دیم ماں سمل ءِ نیمگ ءَ کرت ءُ پسہ دات” منی دل ھچّ ءَ نہ کش اِیت، بس آپے لوٹائین ایں، تو چوش کن ایشی ءَ یکر کن ءُ وتی گپاں بنا کن باریں جیڑہ چے اِنت؟!”
سمل ءَ نادلکشیں بچکندے وتی بے اوستیں لنٹانی سر ءَ تالان کرت ءُ گوشت” سکی یکبرے مردم چیزے لوٹائین اِیت گڑا پد ءَ وران ءُ گپ کنان کنت”.
من گوشت” ھیر گڑا من آپے ءُ لسی یے ور آں، ترا ھرچی دوست بیت پہ وت بہ لوٹائین”.
سمل ءَ دو کسانیں آپ ءُ دو لسی لوٹائینت، گڑا گپ ءَ بنا بوت” سکی جیڑہ اینچو مزن نہ اِنت کہ تو یا من پریشان بہ بہ ایں، دوشی ماس ءَ گوں پِس ءَ گپ کرتگ گڑا پِس ءَ من ءَ وتی کرّ ءَ لوٹاینت ءُ جست کرت” تئی ماس ءَ اے وڑیں گپے کرتگ اے راستے”؟
“گڑا تو چے گوشت”؟ من گوں اشتاپی یے ءَ جست کرت.
سمل” من یکبرے ھچ گوشت نہ کرت پرچاکہ اولی رند اَت کہ من ءُ پس اے وڑیں چیزے ءِ سر ءَ گپ ءَ ات ایں، من بس بے توار اِت آں، یکدیم ءَ ترسگ ءَ اِت آں پِس ھبر مہ دنت دومی دیم ءَ کمو لج ھم کنگ ءَ اِت آں، منی نیمگ ءَ ھچ پسہ نیاتک گڑا پںس ءَ منی سر وتی امبازاں زرت ءُ گوشت” سمی جان اگاں اے گپ راستے گڑا من ھما وڑ گپ کن آں، اگاں راستے نہ اِنت گڑا ترا موکل اِنت برو آرام کن کہ شپ بے وھد اِنت”.
“گڑا پد ءَ دگہ ھچ گپ نہ بوت”؟ من یکبرے پد ءَ گوں اشتاپی ءَ جست کرت.
سمل ءَ لسی ءِ گلاس چست کرت ءُ پسہ دات” من چار اِت اگاں مروچی من گپ مہ کن آں بوت کنت پد ءَ گپ کنگ مہ بیت گڑا من ھمت کرت ءُ پسہ دات” جی ھو ابا اے گپ راستے، من ءَ سکی دوست بیت پرچاکہ سکیں گریب ءُ ازتداریں بچکے”.
وھدے کہ من چش گوشت گڑا پِس دگہ وڑ بوت ءُ کمو بے تواری ءَ پد گوشت ئِے”منی سمی جان تو من ءَ سک دوست ئے بلے من اد ءَ تئی سانگبندی ءَ کرت نہ کن آں”.
“گڑا تو پد ءَ ھچ نہ گوشت”؟ من گوں ھیرانی ءَ جست کرت.
سمل” تو کمو سبر ،من گپ ءَ آں ترا سرجمیں کسہ ءَ گوش آں، پِس ءَ کہ چشیں پسھے دات ، من یکبرے سک دگہ وڑ بوت آں، من نہ زانگ ءَ اِت آں چے بہ گوش آں؟! تو وَ سرپد ئے پِس ءِ گوما گپ کنگ سک گران اِنت بلے من چار اِت منی زندگی ءِ مسلہ اِنت ، من یکبرے پد ءَ ھمت کرت ءُ جست کرت” ابا سکی ھرابیں بچکے نہ اِنت کہ تو رازی مہ بہ ئے، پرچاکہ من سکی ءَ شریں وڑے ءَ زان آں، اگاں تو رازی نہ ئے گڑا پرچا رازی نہ ئے وجہ چے اِنت”؟
وھدے کہ من اینچو جست ءُ پد ءَ چوش گوشت، ھمے وھد ءَ پِس سک دگہ وڑ بوت ءُ گوشت ” تو مروچی سک مزن بوتگ ئے کہ من ءَ اے وڑیں جست ءَ ئے، تو منی زھگ ئے ترا من رودینتگ ءُ مزن کرتگ،من ءَ تئی زندگی دست ء وت زوال کنگی نہ اِنت، من کہ پہ تو ھرچ پیسلھے کن آں گڑا آ پیسلہ تئی زندگی ءِ پیسلہ اِنت، سکی شر اِنت یا ھراب بلے من آئی ءَ نہ زان آں، من ءَ پہ تو اجاز(منی پِس ءِ برازھک اِنت) دوست اِنت من تئی سانگ ءَ ھمود ءَ کنگ ءَ تیار آں، بلے گوں درامدے ءَ من ھچ وڑ ءَ تیار نہ آں”.
ما گپ ءَ ات ایں کہ ماس آھت ءُ مے کَش ءَ نشت، من کمو وش بوت آں شر اِنت کہ ماس آھتگ، ایوک ءَ گوں پِس ءَ گپ کنگ نہ بیت، من وتی سر ماس ءِ کوپگ ءَ ایر کرت ءُ گریوگ ءَ شرو بوت آن ءُ گوشت” اما منی پِس ھچ وڑ ءَ رازی بوگ ءَ نہ اِنت ءُ ھمے گوشگ ءَ اِنت ” سکی درامدے من ءَ پہ تو دوست نہ بیت، تئی سور ءَ گوں اجاز ءَ کن آں، بلے من ءَ اے ھچ وڑ ءَ دوست نہ بیت، تو منی پِس ءَ را بہ گوش چوش مہ کن “.
منی چمانی ارس یلہ اِت اَنت ءُ ھیسکارگ ءَ اِت آں،ماس ءَ من ءَ گوشت” سمی جان تو مہ گریو کہ من ءَ گریوگ گیپت، گڑا ماس ءَ منی پِس ءَ را گوشت” نورشاہ اگاں سمی جان ءَ سکی دوست بیت گڑا تو پرچاکہ رازی نہ ئے؟ باید اِنت ما سمی ءَ آئی ءِ زند ءِ پیسلہ ءَ وت کنگ ءَ بل ایں”.
ماس ءِ گپاں پِس ءَ برانز گپت ءُ گوشت” تو ھم سمی ءِ وڑیں ناسرپدے ئے، من ءَ زاناں سمی دوست نہ اِنت یا من نہ زان آں کہ سمی وتی زند ءِ پیسلہ ءَ وت بہ کنت؟ من ھم آئی ءَ آزادی داتگ بلے من زانگ ءَ آں کہ سمی ناسرپدی کنگ ءَ اِنت، تو انگت آئی ءِ پلاہ مُرزی ءَ کنگ ءَ ئے”؟
ماس بزگ دگہ وڑ بوت ءُ من ءَ گوشت ئِے ” سمی جان تئی پِس اگاں یک پیسلھے کنت آ تئی وشھالی ءِ واستا کنت، باید اِنت تو ھم اینچو زِد مہ کن”.
من گنتر ھیسکارگے جت ءُ پسہ دات” اما من زھگے نہ آں کہ وتی پیسلہ ءَ کرت مہ کن آں، من اے پیسلہ گوں شریں جیڑگے ءَ پد کرتگ، اگاں شما منی سانگ گوں سکی ءَ نہ کرت من وتکشی کن آں بلے دگہ کسے ءَ گوں سور نہ کن آں”.
من سک گریوت ءُ پد ءَ وتکشی ءِ گپ ءَ آواناں سک دگہ وڑ کرت، پورا آسے ءَ را آپ پِریچ ئے پِس ھمے وڑ بوت، سک ھیران اَت، کمو بے تواری ءَ پد پِس ءَ منی سر ماں امبازاں زرت ءُ ھمے گوشت ئِے ” تو کہ اینچو زِد کنگ ءَ ئے گڑا ما گوں سکی ءَ وت گپ کن ایں”.
من سمل ءِ گپ اِشکرت اَنت ءُ بوتل دپ ءَ کرت داں بوتل ھالیگ اَت، من ویٹر توارجت ءُ گوشت” آپے بیار، آ آپ ءِ رند ءَ شت، گوں سمل ءِ اے گپانی اشکنگ ءَ من ءَ نورشاہ ءِ اکس یاد آھت، من ءَ تھاریں کوٹی یاد آھت اَنت، سکی تو گوں اے اِشک ءَ دگہ ازابے ءَ مہ کپ ئے، پیسر ءَ مھرل ءِ جتائی ءَترا وتی ارجان جتگ نوں سمل ءِ جیڑہ ترا تھاریں کوٹیانی یا تیاب ءِ لمب ءَ تئی جون ءَ تلامب مہ دنت، ویٹر ءَ بوتل ءِ آپ آؤرت اَنت من بوتل دپ ءَ کرت ءُ پسہ دات” سمل تو ماشاءاللہ مزنیں ھمتے کرتگ بلے ھمے وتکشی ءِ گپ ءَ تئی پس پروش داتگ، باریں تئی پس من ءَ کجا ءُ کدی لوٹائین اِیت؟”
سمل ءَ پسہ دات” چش زانگ نہ بیت کہ کدی ترا ھال بہ کنت اگاں بہ لوٹائین اِیت گڑا گِس ءَ لوٹائین اِیت پرچاکہ گس ءَ درست ساڑی اَنت، دیم پہ دیم ءَ درستیں گپاں کنت”.
من دل ءُ ناکشی پسہ دات” جوان، من تیار آں، تئی ھیال ءَ تئی کھول رازی بیت یا نا”؟
سمل ءَ کمو بچکند اِت ءُ پسہ دات” سکی جان دنیا ءِ تہ ءَ ھچ ناممکن نہ اِنت بس ھمت لوٹ اِیت ان شاءاللہ ما سوبمند بہ ایں”.
من پسہ دات” ان شاءاللہ سوبمندی مئیگ اِنت سملی”.
آئی ءَ گوشت ” ان شاءاللہ بلے تو بے ھمتی مہ کن،”.
من بچکند اِت ءُ پسہ دات” تئی وڑیں بھشتی ھُورانی ھمراھداری ءَ کے بے ھمت بوت کرت کنت”؟
آئی ءَ ھم بچکند اِت ءُ پسہ دات” تو اینچو توسیپ مہ کن کہ من ءَ لج کنت”.
من پسہ دات” تو توسیپ ءِ لائک ئے لج پری”.
ما دوئیناں کند اِت ءُ من گوشت” سمو منی ھیال ءَ نوں وھد شتگ بہ رو ایں گھتر اِنت”.
ما چَہ بلوچستان سجی ءَ در آھت ایں، سمل ءَ گوشت” سکی باریں کسمت گوما چون کنت؟”
من کند اِت ءُ پسہ دات” کسمت وتیگاں کنت ترا گوں کسمت ءِ کاراں ھچ کار نیست کربان آں”.
سمل ءَ کندگے جت ، رکشایے زرت ءُ رھادگ بوت.
روان اِنت
