سـَـــمـــــــيــــــــن
په وتی نازَليں و شـَكـَليں جـَـنِك سمين جان ءِ نام ءَ !

گِـين ءِ بهر ءَ شكليں سـاه پَـر تـرا ما شات باں
داں زَمانگ بيت و هست انت گوں ترا ما يات باں

پُلّ ! سَمين انت هَستياں ماں بو و شَرّ رنگی زبان
ما وا « دپتان » مهردليں جان ، زِر ءِ هُلّ ءِ زات باں

نير ءِ دريا باں مَه اوژناگ ، هم تَهاريں ماں شپ ءَ
مَؤج ءَ باں من تَلوسوكيں، هستی په بُندات باں

تو وا شهرانی جَنِك ئے،ٹـَهل و سَد نازيں«سمين»
شـَـرتـريـں ساز ماں زمان ءَ ، مهر ترا من دات باں

تو جهان ءِ بو و رنگ ئے ، تو جهان ءِ زيب و ٹــاه
تو وا مـهـر ءِ مــارگ ئے و من چه تــو آبــات باں

نازلينيں تو جـَنِـك ئے شَكليں هم شَـهد تـَبيں
هم گـُـلانی پَهر بات ئے ، من په تو سَوگات باں

تئی كمال ءِ ندری آں من مهر و روچ ءِ بادشاه
تئی په بود ءَ من زراں و پر تو و « آزات » ءَ باں

دَؤر ءِ سَكّی گُں تئی جُهد زانت ءِ گوں آسان بيت
هم اُميت ءِ توشگاں تئی هم گـُل ءِ زريات باں

چـو پَری ءَ « انجليچكا » تئی په نازانی بَر ءَ
پر اميتيں مات انت دوستيں ما وا «نور»ءِ زات باں

« تـَهل » چو جَؤرانی وا تام انت بينَگ ءِ مَٹ و بدل
من تئی زند ءِ همك روچ ، وشّيانی پات باں

كريم بلوچ تـَهل
12/04/08

* – آزات ؛ سمين ءِ برات ءِ نام انت .
** – انجليكا ولاديميرونا ؛ چكانی مات ءِ نام انت .
*** – نور ؛ كدخدا نورمحمد ، چكانی پيرك ءِ نام انت .