سِیر ءِ پانزدہ سال ءَ رند ۔ نبشتہ کار: ابدلستار بُگٹی
ایشی ءِ سِیر ءَ پانزدہ سال سرجم بیتگ ءُ مرچی گْوش ایت کہ تو پہ من ھچ نہ کُتگ
نبشتہ کار: ابدلستار بُگٹی
یک زالے ءَ وتی مرد ءَ گْوشت کہ تو من ءَ ھچ داد ءُ آسراتی نہ دے ئے ءُ منی ھچ وڑیں واھشتے پیلو نہ کن ئے۔ دیم ءَ گِلگ کنان ءَ گْوش ایت داں روچ مرچیگ ءَ تو پہ من زاناں چے کُتگ۔۔۔۔؟
گُڑا مرد ھبکّہ بوت ءُ ھیال ئِے کُت زاناں من پَک پہ وتی زال ءَ ھچ نہ کُتگ!! سیر ءَ دہ پانزدہ سال گْوستگ مرچی زاناں چی ءَ گِلگدار اِنت کہ من پہ آئی ھچ نہ کُتگ۔۔۔!
گُڑا آ شُت گوں وتی سنگتے ءَ دیم پہ دیم بوت ءُ سنگت ءَ شور ءُ سلاہ ئِِے کُت۔ سنگت ءَ گوشت کہ وتی جن ءَ جُست بہ کن کہ چے لوٹ ایت، ھر چیزے کہ آ لوٹ ایت گُڑا سامان ءِ لَڑ ءَ تیار بہ کنت۔
گُڑا مرد ءِ جن ءَ وتی واھشت ءِ ھساب ءَ سامان ءِ لَڑ تیار کت ءُ وتی مرد ءَ دات، بزاں کساس دہ، یازدہ سامان ءِ لَڑے دات ئِے۔
البت جن وَ سرپد اَت کہ پہ اِے دْراھیں سامانانی بھا زُورگ ءَ واک ئِے نہ کنت کہ مرد ءِ پگار چو شَر نہ اَت۔ وتی مرد ءَ گْوشت ئِے “من ءَ اِے دْراہ سامان ءِ پکار اِنت”
گُڑا مرد ءَ درّائینت “زاناں ایشاں ابید ھم چیزے ھست؟”
گُڑا گْوشت ئِے “اِنّا من ءَ بس ھمے لَڑ ءِ سامانانی پکار اِنت”
گُڑا مرد ءَ جُست گپت “زاناں چَہ اِے دوازدھیں ساماناں ترا کُجام چیز گیشتر درکار انت؟”
درّائینت ئِے “دروستاں پیسر ءُ گیشتر من ءَ گُدشودی ءِ واشِنگ مشین ءِ پکار اِنت کہ من گوں دستاں گّدشودی کُت نہ کن آں”
مرد ءَ گْوشت “شَر انت ما اول سر ءَ واشِنگ مشینے بھار زور ایں، زاناں دِگہ چیزے ھم پکار انت؟”
جن ءَ پسّو دات “من ءَ مائیکرو ویوّے ھم لوٹ ایت ، پہ من ورگ ءِ گرم کنگ سک گِران اِنت”
مرد ءَ تسلہ دات ءُ گْوشت “شَر انت اِے یک دو ءُ سَے!! من اھد کن آں کہ پہ تو اِے دْراھیں ساماناں یک یکی ءَ گِرآں۔۔۔۔ زاناں تو دِگہ ھچ چیزے نہ لوٹ ئے؟”
جن ءَ درّائینت ” اِنّا۔۔۔”
لھتیں وھدے گْوست، آئی ءَ وتی جن ءِ گون ءَ دزھُورکی ءِ وھد کمیں کُت چریشی ءَ آئی ءِ ھیال ءُ دلگوش گوں جن ءَ کم بوت چی ءَ کہ آئی ءَ وتی گیشترّیں وھد گوں وتی کار ءُ ہار ءَ دات، اگاں پش ءَ ھشت ادار ءَ کار ءَ اَت گُڑا رند ءَ چاردہ ادار پوریاگِری ءَ دزگٹّ بوت۔ انچو سما بوت کہ سَک باز پوریاگِری کنگ ءَ انت۔ پیش ءَ وتی لوگ ءَ آتکگ ات ءُ جن ءِ کاراں کُمک ئِے کُتگ اَت بلے نی اِے دْراہ ھم یلہ ئِے کُتگ ات اَنت۔
لھتیں روچے ءَ رَند جن ءَ جُست گپت “تو مرچاں من ءَ وھد نہ دئے ءُ تو ھما پیسری ئیں وڑ ءَ نہ ئے”
گُڑا مرد ءَ پسّو دات “من ھمے تچ تاگ ءَ آں کہ گیش ءَ چہ گیش زَر کمائین آں کہ تئی چیزاں یک یکی ءَ پہ تو بہ گِر آں”
چہ درستاں پیش واشِنگ مشین ئِے گپت ءُ لھتیں روچ ءَ پد مائیکرو ویوّے ھم زُرت ئِے۔ بزاں ھر چیزے کہ لَڑ ءَ نبشتہ ءَ اَت دْراھاں یک یکی ءَ گِرگ ءَ اَت۔
گُڑا آئی ءِ زال ءَ مار اِت منی زِند ءَ لھتیں چیز کم بُوان اَنت ءُ نی من ءَ ھما ساری ئیں چیز گِندگ نہ بنت۔ پیسر ءَ وھدے کہ لوگ ءَ بیاتک انت گُڑا من ءَ مھر ءُ دلبڈی ئِے داتگ اَت، گوں من نِند ءُ نیاد ئِے کُتگ اَت، ما سھل ءُ سوات ءَ شُتگ اتیں، آئی ءِ موکل ءَ ما پارک ءَ تر ءُ تابے گُتگ اَت۔ بلے نی سرجمیں روچ ءَ کار کنت ءُ شپ ءِ نیم ءَ ژند ءُ پندی ءَ کیت ءُ تچک ءَ وپس ایت۔
سُھب ءَ بام رنگ ءَ پاد کیت ءُ کارجاہ ءَ روت ءُ نی من ءَ ھچ وھد ھم نہ دنت ءُ ناں کہ گوں وتی زھگاں لیب ءَ بیت۔ نی منی ٹَوکانی دلگوش ءَ وھد ھم نیست اِنت ئِے۔ نی منی مرد چَہ اود ءَ ورگ وارت ءُ کیت۔
گُڑا زانت ئِے کہ اِے وَ منی زِند ءَ یک تاوانے، بِہ گِند ئے منی گور ءَ ھر چیز وَ ھست بلے منی مھروانیں مرد گوں من ھوار نہ اِنت۔ گُڑا پد ءَ لَڑے نبشتگ ئِے کہ من ءَ تئی وھد ھم لوٹ ایت، من ءَ تئی مھر ءُ دلبڈی لوٹ ایت ءُ تو گوں من گپ ءُ تْران بہ کن۔۔۔
آسر: بزاں برے برے ما ھمِکر بے ھیال بہ ایں کہ ھر چیزے کہ مارا رسگ ءَ اِنت گُڑا نہ زان ایں کہ اِے کُجام چیز ءِ بدل اِنت۔ وھدیکہ ما زبھر ئِے بَہ ایں گُڑا ما ھما چیز ءِ بستار ءَ سرپد بَہ ایں
اگاں شُمارا نبشتانک وش لگ اِت گُڑا پہ بنی آدم ءِ رھشُونی ءَ دیم ءَ ھم روان ئِے بہ کن اِت۔
