سپرنامگ(ندرپہ اسحاق رحیمءَ)اولی بھر،گُلزار گچکی
اَے بلوچستان تئی کوھاں پراموش نباں
سپرنامگ(ندرپہ اسحاق رحیمءَ)
اولی بھر
گُلزار گچکی
آپءُ نسیب انسانءَ کدی، چتورءُ چون ءُکجا بارتءُ سرکنت ،کَے زانت۔ ۲۱ نومبر۲۰۲۰ ءِشپءَ ما گوں بیلاں شَور کتگ اَت کہ دومی سُھبءَ بزاں ۲۲ نومبر ءَ کلاتُکءِ کلاتءِ تَرّءُتابءَ رویں ،کلاتءِ ڈرون ویڈیو جوڑ کنیں تنکہ کلاتءِ بارہءَمنی پٹّءُپولی نبشتانکءَ ڈیجیٹائز کت بکنیں، کلاتُکءَ اخترؔ حامد مئے وداریگ اَت ،نورؔخان ءُ مومنؔ ھم جاڑیگ اِتنت کہ دُچارکپیں، مجلس کنیں بلے مئے اِے واھگ مئے کیمرہ مین اُسّامہ ؔغلام اعظم دشتیءِ دزگٹّیءَ سَبَبءَاِشکند بوت، کلاتُکءِ بدلءَ مئے سر بیسیمہءَ کپت۔ کلاتُکءِ کلات، آئیءِ جہ منند، آئیءِ آرکیالوجیکل ءُ راجدپتری اَرِشتءِ پُشدرءَمنی پَٹّءُ پولی نبشتانکءِبابتءَ من واھگداروں کہ گوں جْوانیں ویڈیو، باپُشتی توارءُ پُرتامیں زیمراں جوڑءُ شنگ ئِے بکناں، بلے اِے واھگ پہ اَدارُکی مھتل بوت ءُ ماں شپءَ بیسیمہءَ نوابؔ خان ءِ اوتاکءَ آئیءَ مھمان بوتیں۔ بوت چوش کہ کلاتُکءِ تَرّءُ تابءِ مھتلیءَ پد ھمے نیمروچءَ بجّارؔ بلوچ، میرحملؔ بلوچءُ من ھمنیاد اِتیں، میرحملؔ بلوچءَ گْوشت ،’ضلع کونسل پنجگورءِ گْوستگیں چیئرمین میر علی ؔجان ءِ لوگبانُک ءُ بی۔ این۔ پی لینگلی رھشون میر نزیرؔاحمد بلوچءِ تُرو، بیران بوتگ ، منءَکوہ بُن بازار پنجگورءَپُرسءِ پَتّر لگت دیگی اِنت، کلاکےءَ پددیم پہ پنجگورءَ رھادگ بیں ‘۔ منءُ بجارؔبلوچ ءَ پیسلہ کت کہ ما ھم پُرسءَ رویں بلے پُرسءَ پد دیم پہ کوئٹہءَ رویں۔ کوئٹہءَ بجّارؔ بلوچءِ جنکوےءِ میڈیکل انٹری ٹسٹ بُوَگی اَت، پمئے ھاترءَ آکوئٹہءَ روگ لوٹ اِیت، منءَ ھم زروری کارے ھست، پمشیکا ما پیسلہ کت ، گوں میر حملؔءَ رھادگ بوتیں، مجیدؔصالحءُ غفوردشتیؔ گوں ما ھمسپر بوتنت۔مئے کاروان ماں دو اولاکاں نیمروچءِ کساس ۳ءَ چَہ تربتءَ دیم پہ کوہ بُن بازارپنجگورءَ رھادگ بوت،پنچءُ نیمءَ میتگءَ سربوت۔ کوہ بُن بازار چَہ تربت پنجگور دگّءَ کساس ھشت کلومیٹر بیت۔ اِے کساس ۵۰ لوگانی کسانیں میتگے، چو بلوچانی اِے دگہ میتگاں پدمنتگیںءُپشت کپتگیں دَوارے۔ بازیں لوگ ئِے بے مردُمءُ بند اَت، گِندگءَ ایشیءِ بھرے لڈّاِتگءُ شھرءَ شُتگ،پشت کپتگیں آبادی کِشتءُ کِشارءُ بارڈرٹریڈءَ وتی گُزرانءَ کنت۔اِد ءَ ۲۰۱۷ ءَ پرائمری اسکولے بوجگ بوتگ بلے انگت ساھگءُ ماڑی یے نیست۔
چوش کہ ماچَہ تربتءَ پشت رھادگ بوتگ اِتگیں،کوہ بُنءَ پشت سربوتیں بلے مئے سربوگءَ مردُم ساڑیءُ نشتگ اِتنت،پَتَّر پچ اَت۔ ما واتیاکت مجلس بندات کت ، میرنزیرؔ بلوچءُ مجلسءِ اِے دگہ مڑاھداراں ما را وشّ اَتک کت، چے ھبر گپت۔ کمّودیراں پد میر علیؔ جان بلوچ ھم اَتکءُ ھمنیاد بوت۔ کساس ھشتاد، ھشتادءُ پنچ سالی کماشیں وشّ گپّءُ وشّروھیں واجہ علیؔ جان بلوچ گْوستءِ سیاستکارے، ضیاء الحقءِ زمانگءَضلع کونسل پنجگورءِ چیئرمین اِنت ۔اِے نیادءَ میر علیؔ جانءَ وتی وھدءِ سیاسی چستءُ ایرءُ واکیاتانی بازیں کسّے آؤرت۔ کوہ بُنءَ گْوات سارت کشّگءَ اَت ، گْوپش نرم نرمءَپاداں گران ایردیان اَت۔ ما سارتیءِ گَلّینگءُ دمسارتیءَپہ وتارا سبزچاہءِمَیارکت۔ شَرّوکیں مجلسےءَ پد ما کہ موکل لوٹ اِت، دیوان ءَ باھند کت کہ اِے چون بوت کنت کہ شُما اِنچُکیں پندے بُرّاِتگ اَتکگ اِت، نوں ساھت دیم پہ شپءَ لیٹ اِتگ اَنت، ما شُمارا روگءَ نیلیں۔بلے ما وتی دیمتری سپرءِ ھال دات اَنت، میر حملؔ بلوچ ءَ ھم گْوشت کہ تربت داں پنجگور آ پیشیگی ژندءُ ژول کنوکیں ھپت کلاکی سپر نہ اِنت ، دو ءُ نیم ساھتاں مردُم سربیت، لوگ مئے وتیگ اِنت، ما چَہ شُما موکل لوٹیں تنکہ سُھبءَ دگہ کارءُ چلوپگے کت بکنیں۔ مئے مھمانداراں پہ نادلکشیّ مارا موکل کت، ورناھے مئے رھبرءُ رھشون کت کہ ما راہءَ گارمکنیں ،گِسَر مبیں، کہ آھگءَ ما لوگءِ درگیجگءَ ردی کتگ اَت ،مئے سردگہ نیمگےءَ کپتگ اَت ۔اِے دگّ کہ کوہ بُن ءَ رؤت ، چِہ تربت پنجگور کراسءَ دیم پہ پرومؔءَ رؤت ، زمباد گاڑیاں اَنچوش پُروشتگ کہ پہ کسانیں اولاکاں رؤگ بلاھیں جنجالے۔
ما کراسءَ میر حملؔ بلوچ کساس ھپتءُ نیمءَ اجازت کت ، آءُ عبیدؔداداللہ دیم پہ کیچءَ ،ما دیم پہ شالکوٹءَ دات۔داں پنجگورءِ سربُوگءَ ما دودِلگ اِتیں کہ شپءَ پنجگورءَ بہ جَلّیں یا کہ شالکوٹءَ برویں؟ مئے بیلی ایڈیشنل سیشن جج پنجگور واجہ امجدؔ دشتیءَ پمّا ریسٹ ھائوسءَ گَندَلءُ نانءِ بندوبست کتگ اَت بلے مئے گڑءُمنجی گیشّگءِ پیمءَ نہ اَت ۔ ھمے گڑءُ منجیءَ اسسٹنٹ کمشنر واجہ برکتؔ بلوچءِ کال اَتک کہ،’ شُما کجاسراِت ؟، من شمئے وداریگ اوں۔‘ چوش کہ ما چرائیءِ کالءَ کَلھے پیش اناگتیں پیسلھے کتگ اَت کہ شپءَ پنجگورءَ نہ جَل ایں، شالکوٹءَ رویں، ما چرائیءَ پَھِلی لوٹ اِت، اولاک تیلءُ میٹ کت رھادگ بوتیں ۔ پنجگورءَ پٹرولءِنیادلیٹرے ۸۰ کلداراَت ۔اِدءَ موسُم وشّ اَت، مزنیں سارتیءُ گْوپش نہ گواہ اِت۔ ھمے ساھتاں کہ ما اولاکءَ تیلءُ میٹ کنگءَ اِتیں، مجیدؔ صالحءَ اوست ویلفیئر آرگنائیزیشنءِانفارمیشن سکریٹری عبدوستؔ نورءَ را کالے کتگ اِت کہ ما پنجگورءَ ایں،عبدوستؔءَ ھُجّت کت کہ شپءَ منءَ مھمانداریءِ موھے بدیئت ، من شمئے نیمگءَ پیداکوں، من شُمارا روگءَ نیلیں، شپءَ شُما منی مھمان اِت، بلے چوش کہ مئے نیتءُ ارادہ شالکوٹ ئیگ اَ ت ، ما واھگدار اِتیں کہ سپرگوں سپرءَ بہ بیت پمیشکا ما چرائی پَھِلی لوٹ اِت۔ عبدوستؔ نورءَ وار وار کال کت کہ بداراِت، من پیداکوں بلے ما جَلَّگءِ وڑانہ یتیں، رھادگ بوتیں۔ من گوں عبدوستؔ نورءَ ھجبر دُچار نہ کپتگوں بلے چرائیءِڈّڈّیءَ پدّر بُوَگءَ اَت کہ آ مھمانداریں ورناھے، ھاوند مھماندارءُ میارجَلّاں وت بساٹات ،بلوچی مھمانداریءِ ربیّت دائم پزّورءُ تْونگر بات۔ چوناھیگا مھمانداری ءَ لگور بُوگ زندءِ پڑءَ جنگجاھےءَ لگور بُوگءَ کمّتریں شگانے نہ اِنت، اگاں کسے اِے شگانءِ گرانیں بارءَ سگّ اِت کنت گڑا ۔۔۔۔
(روان اِنت)
