شرف شاد ءِ رَجانک کُتگین آزمانک ءِ سر ءَ چمشانکے۔
شرف شاد ءِ رَجانک کُتگین آزمانک ءِ سر ءَ چمشانکے۔۔
آزمانک : بندیگ ءِ پوشاک
آزمانکار : نجیب محفوظ
نبشتہ کار : شاہ منیر بلوچ
(نیم بیل) شرف شاد ءِ رجانکی کتابے کہ آئی ءَ نجیب محفوظ ءِ لَھتیں گِچین ءِ آزمانک بلوچی ءَ رَجانک کُتگ ءُ بلوچی اکیڈمی چاپ ءُ شنگ کُتگ چہ ھمے آزمانکاں یک آزمانکے ءِ نام بندیگ ءِ پوشاک اِنت، نیم بیل کتاب ءِ وانگ ءَ چہ رَند من ءَ ھَمے آزمانک ءَ جیڑگ پرما اِت، اے آزمانک ءِ کِسہ انچو واناک اِنت کہ ترا پہ زور وتی نیمگ ءَ کار ایت باریں چُنت رَند ءَ من اے آزمانک وانتگ ءُ باریں دِگہ چُنت رَند ءَ اے آزمانک ءِ کِسہ ءَ من ءَ گوں وتی چاگرد ءَ دیم ءَ دیم کُتگ۔ من اِد ءَ نجیب محفوظ ءِ کِسہ، پلاٹ، درشانداب، ھیال ءُ گواچنی ءِ سر ءَ گَپ جنگ نہ لوٹ آں، من بلکیں اِد ءَ نجیب محفوظ ءِ ساچشت کاری ءِ سر ءَ گپ جنگ لوٹ آں کہ آئی ساچشت کاری ءِ برورد اِنت کہ ھر وانوک وت ءَ گوں اے آزمانک ءِ کِسہ ءَ ھوار سرپد بیت۔
اے آزمانک ءِ تہ ءَ تھنا یک کِسھے نہ اِنت بلکیں اِد ءَ سَک ءَ باز کِسہ ءَ اَنت کہ مانا کنگ لوٹ اَنت۔ ھَمے چیرتریتگیں کِسہ اَنت کہ ترا پہ جیڑگ لاچار کن اَنت، ھَمے کِسہ ءَ اَنت کہ اے آزمانک ءَ گوں چاگرد ءَ ھم دَپ کنت، ترا ھمے کِسھانی تہ ءَ وتی چاگرد گِندگ ءَ کیت۔ تو مار ئے کہ اِد ءَ نجیب محفوظ مئے چاگرد ءِ سر ءَ گپ کنگ ءَ اِنت۔۔۔۔ اسل ءَ ساچِشت کاری ءِ شاھگانی ھمیش اِنت کہ ھما نبشتہ کار ءِ مواد ھر وانوک ءَ را وتی جند ءِ چاگرد ءِ اکس ءَ پیش بہ دار ایت۔ ھر ھما مزنیں نبشتہ کارے ءِ اِزم ءِ شاھگانی گوں آئی ساچشت کاری ءَ ھمگرنچ اِنت ساچِشت گالانی رِدءُ بند دیگ ءِ نام نہ اِنت بلکیں ساچشت کاری ھما گواچنی ءُ راستی نام اِنت کہ یک نبشتہ کارے درد ءُ گم، گلامی ءُ پدمنتگی، نیزگاری ءُ ازگاری ءَ گوں گالانی دروشم ءَ گواچنی ءِ رنگ ءَ دیم ءَ بیار ایت کہ ھمُک چاگرد ھمے گواچنی ءِ تہ ءَ گندگ ءَ بئیت گُڑا ھمیشی نام ساچِشت ءُ ساچِشت کاری اِنت۔۔۔۔۔وتی جِند ءِ چاگرد ءِ بزگی ءُ گلامی ءِ اکس ءَ پیش بہ دار ایت۔۔ اِد ءَ اے آزمانک ءِ تہ ءَ ھما اکس پیشدارگ بوھگ ءَ اِنت کہ یک چیزے ءِ شوھاز ءُ پد جنگ ءَ ترا دگہ چیزے بیگواہ کنگی اِنت۔ تو نہ زان ئے کہ من چے بیگواہ کنگ ءَ آں بلے اسل ءَ تو بیگواہ بوھگ ءَ ئے۔۔۔
اے آزمانک ءِ کارِست یک بچکے ءِ کارست اِنت کہ آ مدام ریل گاڑی ءِ آیگ ءِ وھد ءَ ساری وت ءَ کیت ءُ تانہ (اسٹیشن) ءَ سر کنت، آئی نام جحشہ اِنت ءُ یک سوداگرے سیگریٹ بھا کنت۔ “درستاں سربوکیں مردم سیگار ءِ سوداگر جحشہ اِت۔ “آئی ءَ گواچنی، ریل ءِ اسٹیشن وتی جنزوکیں نھادی گمان کُت ءُ گوں بے دروریں اشتاپی ءَ اسٹیشن ءِ سر ءَ تر ءُ گرد کناں ءَ وتی ھِیرت ھِیرتُک ءُ جھان گِندیں نگاھاں گِراکانی شکار کُت”۔۔
اگاں کَسے ءَ چہ جحشہ آئی ءِ کار ءِ بابت جُست بہ گپتیں گُڑا جحشہ ءَ الم ءَ وتی نسیب ءِ سر ءَ گِلگ ءُ زاری کُتگ اَت پرچیکہ جحشہ ءَ اگاں جحشہ ءِ دل ءِ واھگ جُست کنگ بہ بیت گُڑا آئی ءَ الم گْوشتگ اَت کہ من ازگاریں مردمے ءِ گاڑی ءِ ڈرائیور بوھگ لوٹ آں۔ کہ زیباھین پوشاک گورا بوتگ اَت، واجہ ءِ ورگاں گوں ورگ وارتگ ات، گرماگ ءُ زمستان ءَ وش ھواھیں جاگھانی سیل ءُ سواد کُتگ اَت۔ آئی مدام وتی دل ءَ جیڑ اِتگ اَت کہ من پہ وت ءَ شریں روزیگ ءِ شوھاز ءَ انچیں کارے گچین کت بہ کن آں کہ من پہ دل وشی، سواد ءُ شادھان ھمگونگ بہ باں۔۔۔۔
بلے آئی ءِ دل ءَ دِگہ لھتیں چیریں واھگ ھم ھست اَت کہ ہماھانی سبب ءَ آ را ڈرئیوری ءِ کار سک ءَ دوست بوت۔
آئی ءَ ھما روچ ءَ چہ ھمے واھگ ءَ دل ءَ داشتگ اَت۔ کہ وھدے آئی ءَ یک مزنیں مردمے ءِ ڈرائیور “الغر” تھانیداری ءِ نوک گوریں کاردار نبویہ ءِ دیم ءَ اوشتگ ءُ گوں آئی ءَ ھمت ءُ وت بیسھی ءَ دوستی ءِ درشان کنگ ءَ دیست ۔ یک رَندے وَ آئی ءَ گَل ءُ شادان دیست ءِ سر ءَ دست ءَ مشان ءَ گوں جنک ءِ ءَ الغر ءِ گْوشتگیں اے گپ ھم اش کُتگ ات۔
“زیت من وتی نام ءِ چَلّہ ءَ تئی لنککاں دیگ ءَ آیگی آں۔”
آئی ءَ دست کہ جنک ءَ پہ ٹھلے بچکند اِت ءُ چہ سرا گُشاں انچو کنزینت بزاں من گیگ ئِے کنگ ءَ آں بلے بن اسل ءَ آئی ءَ لوٹ اِت کہ چہ تیلاں ترپوکیں وتی سیاھیں ملگوراں پیش بہ دار ایت۔۔۔۔ آ ھمے جیڑگانی تہ ءَ اَت کہ ریل گاڑی ءِ ڈگ ڈگانی توار بوت چہ دور ءَ ریل ءِ ڈبا ودی بوان بوت اَت۔ دانکہ آ اسٹیشن ءِ سر ءَ اتک ءُ سر بوت۔ جحشہ گِشادی ءَ مردماں مانچتگیں ڈبھانی نیمگا شُت۔ بلے رسگ ءِ شرت ءَ ھیرانی ءِ آماچ بوت دروازگانی دپ ءَ سلاہ بندیں سپاھیگ اوشتاتگ اِت اَنت درامدیں دروشم گوں دمبُرتگ ءُ درگڑیتگیں نگاھاں دریگاں سَرُک کنگ اِت اَنت کہ چہ مردماں جست ءُ پُرس ءَ پد سرپد بوت کہ اے اِٹلی ءِ ھما جنگی بندیگ اَنت کہ مزنیں کساسے ءَ دژمن ءِ دیم ءَ سلاہ اِش دور داتگ نو بندیگانی کیمپ ءَ برگ بوھگ ءَ اَنت۔۔”
چوناھا جحشہ سگریٹ بھا کنت بَلے جحشہ ھیران اَت ءُ دنزاں گھیتگیں دیماں چاراں اَت اے گپ پکا بوھگ ءَ رَند، اے گُڑیتگیں چم، مُسیبت ءُ واری ءَ کپتگیں دیم ھِچ وڑا آئی سگریٹاں زُرت کُت وتی ھیل ءِ تب ءَ پورا کنگ ءِ توان ءَ نہ دار اَنت۔۔۔
جحشہ ءِ سر ءَ ابیتکی ءَ مانشانت کہ آ وتی سگریٹانی پیتی ءَ بڈ ءَ بہ جنت ءُ بہ روت۔ آئی آیانی سر ءَ زھر ءُ نہ وشی ءِ نگاہے جت ءُ پیسلہ کُت کہ وتی پُشت ءَ مان بہ دنت بہ روت۔ بلے آئی ءَ فرانگی گالوارے ءَ توار اش کُت کہ آئی ءَ اربی ءَ گْوشتگ اَت “سیگار”۔
جحشہ ءَ یک سپاھی ءِ توار کنت، بلے جحشہ آ را لنککانی سر ءَ دیگ ءِ اشار ءَ کنت ءُ وت پہ ترس ءُ لرز چہ سپاھیگاں انچوش دور اوشت ایت کہ سپاھیگانی دست تا آئی گور ءَ مہ رَس اَنت۔ ھمد ءَ یک سپاھیگ ءِ وتی کوٹ ءَ کَش ایت آئی نیمگ ءَ ٹال کنت ءُ گْوش ایت بہ زور منی زّر اِش اَنت۔۔۔
جحشہ یک سگریٹے چہ پیتی کَش ایت دنت ئِے بلے سپاھی زھر گِپت ءُ گْوش ایت ” بس یکے” کساس دہ سگریٹ وَ بِدے، بلے جحشہ پدا وت ءَ را پُشت ءَ کش ایت۔ پدا سپاھیگ گْوش ایت اگاں دہ سگریٹ دات نہ کن ئے!! نو یا ھشت وَ بِدے۔۔۔بلے جحشہ ھِچ وڑا تیار نہ بیت ءُ سگریٹ ئِے نہ دنت۔ گُڈی ءَ سپاھیگ پہ یک ڈپی ءَ رازی بیت ءُ کوٹ ءَ دَنت۔ پدا یکے وتی پاد ءِ پینٹ ءَ (پتلون) کَشی دَنت، یکے وتی بوٹاں دنت، انچوش تاکہ جحشہ ءَ ھما اِٹلی ءِ بندیگیں سپاھیگانی دروشم ءَ بیت نو کہ ریل پہ روگ ءَ ساڑی بیت ھما سپاھیگ کہ اِے بندیگانی مستر اَنت ھما سپاھیگ جحشہ توار کنت بیا سوار بی رواں بلے جحشہ پہ سوار بوھگ تیار نہ بیت پرچہ کہ جحشہ بندیگیں سپاھی یے نہ اِنت آ پہ ھمے ھاترا سوار نہ بیت۔ جحشہ ءَ کہ گپ نہ زور ایت ھما سپاھی ءِ گپاں گْوش نہ دار ایت گِڑا سپاھی جحشہ ءَ تیرے جنت ءُ کُش ایت۔۔۔۔۔۔۔۔۔
اے آزمانک ءِ کارست ترا گواچنی ءِ نیمگ ءَ بارت ءُ سر کنت۔ تو ھمے سرپد بئے کہ من ھمے کارست ءِ بھرے آں یا کہ تو ھمے کارست ءِ گواچنی ءَ گوں وتی چمان گندگ ءَ ئے۔۔
اسل جحشہ ءَ کوٹ ءُ پتلون ءُ بوٹ ھمے ھاتر ءَ زُرت اَنت کہ من وتی دوستدار ءِ دیم ءَ گور ءَ ئِے بہ کن ءِ پرچیکہ آ وت یک نیز گار ءُ سوداگرے اَت۔ آئی گور ءَ چُشیں کوٹ ءُ بوٹ نیست اَت کہ آئی ءَ گور ءَ بہ کُتیں اَنت۔۔
بزگی ءُ نیزگاری وت یک موتے ھمے واست ءَ اے آزمانک ءِ کسہ گوں مئے چاگِرد ءَ وڑ نا وڑے ءَ ھمگرنچ اِنت اے آزمانک ءِ تہ ءَ ھما اکس گندگ بوھگ ءَ اِنت کہ مرچی مئے چاگرد ءَ پہ دو کلکدار ءَ برات وتی برات ءَ کُشگ ءَ اِنت، آ ھمے سرپد بیت کہ برات ءِ کُشگ ءَ چے منی نیزگاری ھلاس بیت بلے نیزگاری آ را پدا موت ءِ دپ ءَ بارت۔
یک مزنیں واھگے دومی مزنیں واھگ ءَ کُش ایت۔۔۔
