شَھر ءِ سرءَ بالیں کپودر
شھر ءِ سرا بالیں کپودر
آ چہ دراھیں کپودراں گسر بوتگ ات-یک کپ ءَ تھنا پشت کپتگ ات-کپودر ءِ یل بوھگ ءِ بازیں سْوب اتنت، بلے مستریں سْوب آئی ءِ “ورنائی،، ات آئی ءِ مات ءُ پت، آئیارا وتی ھمراہ کنگ ءَ تیار نہ بوت انت-
آدگہ گپے ات کہ آئی ءَ وتی مات ءِ ھمرائی ءَ روچے پتے دیست ءُ اے رندی کہ آئی ءِ مات ءَ آئیارا ساپ جواب دات ءُ وتی ھمراہ نہ بوھگ ءِ ھاترا گر ءُ نہر دات گڑا کپودر ءَ وتی مات ءِ سرا سکّ بد اتک ءُ مات ءِ ھمراہ ھما سیاھیں ءُ مستیں کپودر ءِ سرا ھم کہ اے دراھیں وھد ءَ آ آئی ءِ مات ءِ لِٹک ءَ بستگ ات ءُ آئی ءَ کپودر ءِ مات شرّی ءَ گپّ ءَ ھم نہ اشت ءُ وتی بانزلاں بال ئےِ دات ءُ دیم پہ روچ برکت ءَ مزنیں شھر ءِ نیمگ ءَ راہ گپت-
آ سکّ زھر ءَ پُر ات-چہ دراھیں سیادی ءُ سانگبندیان دلپروش ات-آئی ءِ کُہت در نیاھگ ءَ ات-بلے… بلے آئی ءَ وتی مات ءِ جتائی سک تور ات-آ سک تکانسر ءُ بژنیگ ات-آئی ءَ وتی نزوریں بانزل زور پر داتنت ءُ کپودرانی رم ءِ پشت ءَ کپت-آ دُرہ وش بال اتنت ءُ مزنیں شھر ءِ راہ ءَ ھم بلد اتنت اے چہ دراھیناں کستر ات ءُ مزنیں شھر ءِ راہ ءَ ھم سرپد نہ ات پمیشکا آ چہ دراھیں کپودراں گسر بوتگ ات-یک کپ ءُ تھنا پشت کپتگ ات-
پراھیں آزمان ءِ دلبند ءَ آ دلوارگ ات-آئی ءَ را سک بیّم آھگ ءَ ات-آ ھیران ات چوں بہ کنت؟ چے بہ کنت؟
اے اوّلی برات کہ آئی ءِ مات ءَ آ یل داتگ ات ءُ آ دریں ڈیھ ءَ ایوک ءَ پشت کپتگ ات-آئی ءَ وتی مُچیں چمّ شانک داتنت تاں دیست ئےِ کہ کپودرانی رم دیری گار بوتگ ات-آزمان ءِ دیما، گوات ءِ سرا آھانی پدے ھم نہ گواھگ ءَ ات-نوں وَ آ دلپٹّ بوت-بازیں سفر ءَ آئی ءِ بانزل ھلاس کتگ اتنت ءُ آئی ءِ ھمّت ءُ ھاٹیگ جواب دیگ ءَ ات کہ اناگہ آئی ءِ چم بانے ءِ سرا نشتگیں وتی عمر ءِ کپودرے ءِ سرا کپت انت-آ ھم تھنا ءُ گسر ات بلکیں آئیارا ھم مات ءُ پت ءَ یل داتگ ات ءُ پدا آ ھمے,, دومی جنس،، ءِ درآمدیں کپودر ءِ کرّ ءَ بان ءِ سرا ات-شرّرنگ ءُ درآمدیں کپودر آئیارا گنوک کنگ ءَ ات-ھژم دیگ ءَ ات وتی نیمگ ءَ برگ ءَ ات-آئی ءَ ھیال کت کہ راستی آ “ورنا،، بوتگ… جوان… وتی مستر ات-ءُ نوں کہ شررنگیں ءُ مادگیں کپودر کہ آئی ءِ وت نزیک ءَ اتکگ ات وت سرا وت دیوان ءُ مجلس ءَ کپتگ ات آ بے سدّ بوھان ات، بے فکر ءُ ھمے بے سدّی ءُ بے فکری ءِ تھا وھدے آئی ءَ وتی بگل ءَ اتکگیں شررنگیں کپودر ءِ بالاد چارِت گڑا آئی ءَ وتی دراھیں رگانی تھا آس ءُ انگر تچگ ءَ دیست ءُ پدا ھمے درآمدیں کپودر ءِ سوب ءَ آئیارا ھال رست کہ اے وھدی آ مزنیں شھر ءِ کرّ ءَ انت ءُ ساھتے ساری آ مزنیں شھر ءِ نزیک ءَ بال ءَ بوتگ گڑا آ گنداتر گل بوت..
گنداتر بے فکر بوت-آئی ءَ ھیال کت کہ زند ھمے شرّرنگیں کپودر ءِ امبازان انت- ھمیشی نزیکی من ءَ ابدمان کت کنت- تاھیر دات کنت-زند بخشاھیت ءُ اے بان، بان ءِ نوک نوک ءُ چیز باید انت مئے لوگ بہ بیت-نوں جتائی ءِ دراج بریں پند کشّگ نہ بیت… نوں تچ ءُ تاگ نہ لوٹیت ءُ آئی ءَ چُرت جت کہ باید انت کہ آ وتارا شرّرنگیں کپودر ءِ چماّنی تھا ایر بہ دنت ءُ آئی ارواہ ءِ تھا ایربئیت-گوں ھمے نیّت ءَ وھدے آئی ءَ وتارا شرّرنگیں کپودر ءِ نزیک ءَ آؤرت گڑا یک اناگہ آ جہہ سرّاِت.. آ ھیران بوت.. اولی برا آئی ءِ چمّ شر رنگیں کپودر ءِ بالاد ءَ چہ چست بوتگ اتنت ءُ آئی ءِ چماّں اڑیتگ اتنت-اولی رند ءَ آئی ءَ وتی شررنگ ءِ چم پہ ھُب ءُ واھگ چارتگ اتنت ءُ پدا آ پشت ءَ کنز اِت… آئی ءِ ورنائی پوڑے بوت آپ ءَ کپت، شرّرنگیں کپودر ءِ چمّ، درآمدیں کپودر ءِ چمّ، آئی ءِ دلبر ءِ چم سرجم ءَ آئی ءِ مات ءِ چمّ اتنت، ھما ترپگ، ھما مھر ءُ طلب، ھما بے سدّی ءُ ھما پہ مستیں ءُ سیاھیں کپودر ءَ ھدوناکی-اے شرّرنگیں کپودر ءِ چمّ آئی ءِ مات ءِ چمانی جند اتنت-آ پچ لرزت، شرّرنگیں کپودر آئیارا گنوک کنگ ءَ ات، ھژم دیگ ءَ ات، وتی نیمگ ءَ برگ ءَ ات، آئی ءِ باتن ءَ ھوار بوھگ ءَ ات-بلے… آئی ءِ مستیں چم….
آئی وتی ارواہ قید کت-دل دپ ءَ آؤرت، چم بُنٹ اتنت ءُ پدا شھر ءِ سرا بالیں کپودرانی رم ءِ تھا ھوار بوھگ ءِ ھاترا بال ئےِ کت-آئیارا شھر ءَ رسگی ات-رم ءَ گوار بوھگی ات ءُ مات شوھاز کنگی ات-
ھنیف شریف