عبدالقدوس قاضی زادہءِ آزمانک : کسی کار نہ انت ۔
آزمانک :کسّی کار نہ اِنت۔
چاکر سکّیں گریبیں مردے ات- آ وتی روچاں پہ مشکل گْوازینگ ءَ اَت چوشیں روچ باز کم ات کہ دو وھد ئے ورگ ئےِ پہ لاپ ءِ سیر ءَ بہ رستیں-
یک روچے چاکر گوں وتی گم ءُ پگراں گلائیش ات-سرئےِ جھل ات ءُ روگ ءَ ات- کہ یک اناگہ چمّ ئےِ ے پہ بُن ءَ کپتگیں کُوٹیں کلدارے ءَ کپت اَنت اشتاپے ءَ گوں جھل بوت ءُ کلدارئےِ چت-سکّ بازگَل بوت-چماّن ئےِ دو روک مان بوت-چہ گل ءَ پادئےِ زمین ءَ چست بوت انت اِنگر ءُ آنگر ئےِ چارِت کلدارئےِ چُکّ اِت ءُ چماّن ئےِ داشت ءُ کیسّگ ئےِ کت ءُ اِشتاپ اِشتاپ ءَ روگ ءَ لگّت-کہ اناگہ پاد ئےِ میھ بو اَنت-ءُ اوشتات دل ءَ جیڑگ ءَ لگّیت-کہ اے کلدارءَ کجا بہ کناں-کہ کس ئےِ مہ گندیت ئےِ-دل ءَ گشت ئےِ کہ اگں کس ئے منی کیسّگ ءَ بچاریت گڑا گندیت ئےِ-لانک ئےِ کناں کہ گھتر اِنت- کلدار ئےِ چہ کیسگ ءَ کشّت ءُ لانک ئےِ کت ءُ راہ گپت-گزلے ءَ شت ءُ پدا پگر ءَ لگّیت کہ لانک ءَ ھم زاھر بیت-نیپّگ ئےِ کناں شرّ تراِنت-چہ لانک ئےِ درکتءُ نپیّگ ئے توک ئےِ گوازینت-ءُ دُور ئےِ راہ دات ءُ روگا لگّت-بلے دوگام ئےنہ جت پدا اوشتات پگرئےِ کت-کہ اگں کسے منی نپیگ ءَ بہ پٹّیت گڑا گند ایت ئےِ-کل ئےِ کناں ءُ باندا کشّاں ءُ بران ئےِ نپّیگ ءَ ئےِ-کش ات کل ئےِ کت-بلے دل ءَ بگائی پیش داشت کہ بنا کنئے کہ چوش بکن ئے-اگں کسے تئی پداں گراں بکنت گڑا کشّ ایت ءُ بارت ئےِ-چہ کل ءَ درکت بلے ھیران بوت-کہ ایشی ءَ چوں بکناں-دست ئےِ سرا کت انت-تاں دیراں پگرئےِ کت دل ئےِ گشت کہ دگہ ھچ راہ ءُ درنیست-ابیدئے نُکّ جنگ ءَ نکّ ئےِ جنان ءُ وران ئےِ کہ ھچ کس ئےِ نہ گندیت-انگر ءُ آنگرئےِ چارِت ءُ زوت زوت ءَ کلدارئےِ چہ کلّ ءَ کشت دپ ئےِ کت پہ ھزار رُزوائی نک ئےِ جت- کلدار ءَ نک ککّران کت بلے ایر شت گٹّ ئےِ سک درد بوت بلے سک گل ات کہ کلدار ءَ نوں کس دیّت نہ کنت-نوں دل ءَ جزم ات کہ اے کلدار پہ اَبد منی بوت شپ کہ آخری پاس ءَ رست چاکر ءِ لاپ ءَ دردے شروبوت-درد ساھت ءُ دمان گیش بوان بوت-درد انچو زیات بوت-کہ اوپار ءَ چہ ڈنّ ات-چاکر ءَ لاپءِ درد ءَ پریات شروکت-تاں سباہ ءَ چاکر لیٹ لیٹ وارت-چاکر ءِ لاپ گوات گپت-ھمسائیگاں چاکر ءِ پریات اِشکت انت-چاکر ءِ ھال ءِ گرگا لوگ ئےِ اتک انت-چاکر سک بےتاھیر ات- چاکر اش نادراہ جاہ ءَ برت-ڈاکٹر ءَ ایکسرے کت ءُ چارت ڈاکٹر ءَ گشت کہ چاکر ءِ لاپ ءَ یک چیزے مان انت بُرّءُابریں لوٹیت اشی ءَ دگہ ھچ علاج نیست ابید برءُبریں ءَ اے در کنگ لوٹیت چاکر دل ءَ جیڑگ ءَ لگ ایت ءُ گشت ئےِ ڈاکٹر ٹک ءَ زانت کہ منی لاپ ءَ کلدارے مان-چش بیت کہ من ءَ کلدار ءِ نکّءَ جنگا دیستگ- ڈاکٹر من لاپ ءَ دِریت ءُ کلدار ءَ کشّیت ءُ بارت-
چاکر ءَ درّائینت ڈاکٹر صاحب! منی لاپ ءَ ھچ ماں نیست-اے یک کلدارے کہ ماں وارتگ-منی لاپ ءَ مہ در ءُ کلدار ءَ مہ کشّ-نہ بیت کہ ڈاکٹر پسّو بدنت ھمسائگ ءَ درّائینت-اڑے شومّ تو کلدار پرچی وارتگ-تو نزان ئے کہ ابید ءِ لاپ ءِ بُرّگا اے درنئیت ءُ ایشی یے درکنگ لازم انت-انچو نہ انت ڈاکٹر؟
ڈاکٹر ءَ گشت تو راست گشئے اے کلدار ءِ کشگ لازمی انت-چاکر ءَ پہ زھر درّائینت ڈاکٹر صاحب منی گناہ چی انت کہ منی لاپ ءِ کلدار ءَ کشّ ات-ڈاکٹر ءَ گوں بچکندگے ءَ گشت- اگں کلدار ءَ مہ کش ئے تئی بچکّ مشکل انت- تئی جند مِریت-چاکر ءِ دیم ءِ رنگ بدل بوت ءُ گشت ئےِ ڈاکٹر صاحب تو چونیں گپّ جنئے- پہ یک کلدارے ورگا من مراں-دل ءَ جیڑگ لگّیت ءُ پگرئےِ کت ءُ کوکارئےِ گشت-کہ مئے میتگ ءِ واجہ بشیر ءَ پنجاہ لکّ کلدار چہ سرکار ءَ رسیت- کہ میتگ ءِ مردمان آپ ءُ نل بہ دنت بلے آئی دراھیں کلدار وارت انت ھچ ئےِ نہ بوت ءُ نہ مرت-سالے ءَ گیش انت کہ انگت زندگ انت- ءُ من پہ یک کلدارے ءِ ورگا مراں-ڈاکٹر ءَ چاکر ءِ سرا دست ایرمُشت-کہ تو راست گشئے-بلے بشیر ءَ ھر وھد ءَ کلدار وارتگ ءُ آ ورگ ئےِ زانت-بلے تو ورگ ئےِ نہ زانئے-ڈاکٹر ءَ لوٹت کہ دگہ گپ بجنت-چاکر ءِ لاپ ءَ دردے چست بوت پریات کت-ابّو منی لاپ-چاکر لیٹ لیٹ ورگا لگّت- ڈاکٹر نرس ھکّل دات انت بگریت چاکر ءَ کہ جندئےِ مرت زوت برت ئےِ ماں تھیٹر ءَ کہ برّءُبرین کناں-نرس چاکر چار بڈّ کت دیم پہ تھیٹر ءَ برت-چاکر درداں چہ نا تاھیر ات بلے پہ کوکارئےِ گشت-منا مہ برّ ات- من نہ مراں من ءَ ھچ نہ بیت-چاکر چہ دستاں درلگشیت-دست ئےِ مان لاپ ءَ اتنت جندئےِ دو کلکوچ ات- تچان ات-ءُ کوکارکناں ات-من نہ مراں-اے یکّیں کلدار منا نہ کشّیت- اگں پہ کلدار ءِ ورگا مردم بہ مرتیں- گڑا واجہ بشیر دیری مرتگ ات-
عبدالقدوس قاضی زادہ
ماھتاک بلوچی زند 2005
٭٭٭٭٭٭٭٭٭٭
گوں طارق پشّوکانی ءِ منتواری ءَ
٭٭٭٭٭٭٭٭٭٭
گوں طارق پشّوکانی ءِ منتواری ءَ