(فرعون! تو کُجائے،، ڈاکٹر سمی پرواز)

“ڈاکٹرصاحب….ڈاکٹرصاحب، منا زوت بچار کہ من مُرتاں،،
زیبُک گِرّان گِرانءَ او/پی/ڈی ءِ کمرہ ءَ پُترت ءُ گشت ئےِ… آئیءِ دست ءُ پاد لرزان اِنت، چمّ گشئے دراتکگ انت ءُ دیم ئےِشونز ءُ سیاہ تراِتگ اَت,, ھاں باریں چونیں ترا سہی وَ تو چُکّ پیش داشت سلامت اِنت-نوں تراچوں بوت؟ من وتی وتی اسٹیھتو اسکوپ چست کت ءُ دیم پہ آئی ءَ شُتاں ماسی ءُ نرس ءَ آئی ءَ را واپینت ءُ من آئی ءِ نبض ءُ بلڈ پریشر چارگ ءَ لگّتاں آئی ءِ بلڈ پریشر سکّ جہل ات ءُ دل ئےِدریک دریک کنگ ءَ ات-,, منی سر سکّ درداِنت ءُ دل دَرھگا اِنت،، زیبُک ءَ پہ تلوسگ سر اِنگُر آنگُر جت ءُ گُشت…..
,, نرس، ایشی ءَ وارڈ ءَ واپین، کینولا پاس بکاں ڈریپے جلدی بجن، ءُ ھاں، دو پونسٹان ءِ گولی بدئے،،
من نرس ءَ سرءُسوج کت ءُ پدا آدگہ مریضان دلگوش بوتاں-نادراھانی را آ کہ سُست تِربوت گڑا من وارڈ ءِ نیمگا شُتاں-
,, باریں وتی سیاد زیبُک ءِ ھال ءَ بکن،، من کندِت ءُ چہ ماسی ءَ جست کت-آوھدی سکّ بےکارات-انّوں جوڑ تر انت ماسی ءَ پہ اپسوز-
مادوئیں وارڈ ءِ کمرہ ءَ پُترت ایں-
,, ڈاکٹرصاحب! نوں اے نادراہ ءِ بی/پی ءُ نبض ” نورمل،، انت ءُ تپ ئےِ ھم سِستگ،، نرس ءَ منا دیست گڑا گوں من گشت ئےِ ھو! زیبُک، بگش تو چون ئے،، من اسٹیھتو اسکوپ زُرت ءُ آئی ءَ چارگ ءَ لگت آں-,, وشّاں…. بلے…؟ زیبُک ءَ پہ پکر گشگ ءِ کوشست کت-
“بلےچے زیبک،، من زیبک ءَ دیما سرا یک بے پسئیں جست ءِ نبشتہ ءَ دیست، گڑا چہ آئی ءَ جست کت-,, ایشی ءَ جست مکن…. بی بی ڈاکٹر … من ترا گُشتیں منا جست بکن،، ماسی ءَ وتی سیاد ءِ دل ءِ درد وتی دل ءَ مارِت ءُ گوں من گُشت-,, چے گپّےزیبک توچیا چو ملُورئے … ،،
من پہ پکر ماسی ءُ زیبک مردک چارتاں-,, ھچ گپّے نہ انت ڈاکٹرصاحب،،زیبک ءَ پہ ھبر ءِ چیر دئیگا گوں من چمّ دُزِت ءُ گشت-ماسی تو ھچ مگُش لوگ ءِ اوں اِشکُن انت،، زیبک ءَ پہ تُرس ماسی ءَ گُشت-,, ھو…. ھو لوگ ءُ جاگہاں گوش پر بلے ھچ گشت ءُ نہ کن انت…. ھو ناں ایشاں عقل ءُ زانت است،، ماسی ءَ پہ کواسی گوں زیبک ءَ گشت….
“بلےمن ءَ وتی یکیں دانک ءَ گوں وتی بی بی ڈاکٹر ءَ کناں…،، “ڈاکٹرصاحب زان ئے، زیبک ءِ ھال ھمے بی بی ءُ واجہاں کتگ ھر وھد ءَ واجہ ءُ بانکی ھمنچوش زلم ءُ زوراکی کن انت
چوں… باریں…. چےزلم ءُ زوراکی کتگ ماسی…. واجہ ءُ بانکاں شمئےسرا…. من پہ ھبےماسی ءُ زیبک ءَ جست کت-,, ھرروچ… ءُ ھرڈولیں…. بلے…. مروچی حدّ بوت… ماسی ءَ وتی دوئیں دست زیبک ءکوپگ ءِ سرا گوں نرمی ءَ ایرکت انت ءُ گُشت- “بانک سلطاتوں ءَ سد مُرگ زیبک ءَ داتگ کہ ایشاں بُزور ءُ بپاچ ءُ پوست بجن…،، ماسی ءَ پہ الوت گوں من گشت-,, سد مُرگ… یک پاریگی…،، من پہ ھبکّی ماسی ءَ جست کت-
“ھو.. سدمرگ یک پاریگی… آ اوں زگریں روچ ءِ سرا “گُڈی پسّو ماسی ءِ بدل ءَ زیبُک ءَ دات- ھو…. زیبک ءَ گڈّی گپ ءَ منا پگر ءُ ھیالانی دگہ دنیایے ءَ دَور دات-
زیبُک ءَ گُشت….,, بانک سلطاتون ءَ گوں من گشت بچار زیبک! منی اے مُرگانی ھیال ءَ بدار…. اے تگرد ءَ آ چُنڈ یکیں ساھگ ءَ پچ بکن ءُ اے مُرگاں ایرکن… وت ساھگ ءَ نندئے کہ منی نازاکیں مُرگ عذاب بنت-