لالچی ایں جنین۔ رجانکار: جے ایم آزاد
چہ انگلش ءَ اردو ءُ چہ اردو ءَ بلوچی ءَ ترینگ بوتگ ۔۔
لالچی ایں جنین
زیبائیں سھبے ءَ من انچو کہ چہ واب ءَ پاد اتک اوں یکشل ءَ منی چم چہ بالواں سرباریں زیبائیں گواڑگاں کپت انت، پدا من ءَ کافی ءِ چاڑاں زرت، من کنوری ءَ شت اوں ءُ پیالہ زرت، ءُ نوکی پہ کافی ایر ریچگ ءَ کہ منی دروازگ ءِ ٹِلّو ءَ تور کت، من انچو کہ دروازگ پچ کت، بھمانگ بوت اوں کہ اے چہ کجا؟ آ منی کسانی ءِ دزگھار علیشاء ات۔
من آرا امباز ات ءُ وش اتک کت، آ وتی لھتیں کار ءُ باری جنجالانی سوب ءَ اتکگ ات، نوں من سما کت کہ کافی ورگ ءِ گھتریں وھد انت، لھتیں روچانی یکجائی ءِ تہ ءَ ما بازیں گپ ءُ باوستے کت، چیا کہ ما مزنیں مدّتے ءَ پد دچار کپتگ اتیں، اناگہ علیشا ءَ جست کت کہ ،،مروچاں تو چے کنگ ءَ ئے؟،، تو وَ منی ھب ءُ واھگاں زان ئے، من پسو دات۔
دو شمبے ءِ سھب ءَ مے ورگ گرادی ءِ مقابلہ بندات بوھگی ات، پمشکا ما لھتیں روچ ھواری ءَ گوازینت۔
دو شمبے ءِ سھب ءَ وھدے من تَلّو ءِ سرا شت اوں گڑا باری بندات بوت۔
نیام ءَ ما کلھے دم ءُ دوت کت ءُ پدا مقابلہ بندات کت، انچو کہ مقابلہ ھلاس بوت، من وَ ایوک آسر ءُ مُز ءِ بابت ءَ جیڑگ ءَ ات اوں، ۔
لھتیں ساھتاں پد آسر ءِ جار جنگ بوت، بد بھتی ءَ منی نام سوبمندانی تہ ءَ توار کنگ نہ بوت، من پھک ابکہ ات اوں کہ من چوں بے سوب بوتگ اوں، من وَ ورگ گرادگ ءَ مدام یک لمبر اوں، اے وڑ چوں بیت؟، من پہ زھرکنکی کوکار کت۔۔
من درک بوت اوں پہ تَلّو ءَ ءُ وتی گراستگیں ورگانی ٹپاس کت تاں واکی سک سور انت، نوں من سرپد بوت اوں کہ اے کسے ءَ پہ کزدن جتا واد مان کتگ انت کہ من بے سوب بہ بیں ۔
من چو آس ءِ سر ءِ آپاں لھڑ ورگ ءَ ات اوں، کہ منی گوما کسے چشیں دگا چوں کت کنت۔
من کہ پٹ پول کت تاں من ءَ سرپدی رست کہ منی گراستگیں ورگان ءَ گیشیں واد کے ءَ مان کتگ۔ بزاں کہ اے دگا باز منی درستاں چہ شرتریں ءُ کھنیں دزگھار علیشاء ات۔
من لوگ ءَ شت اوں ءُ آئی ودار ءَ بے چاڑ ءَ ات اوں کہ کدی بئیت انت،.
منی بازیں جست ءُ پلّیسے ءَ پد نوں آئی من ات کہ ،، تئی آ دگہ ھمراھاں من ءَ زر داتگ کہ من تئی ورگاں ھراب بکنیں،، ۔
من پہ کھت ءُ ارمان چہ وتا جست کت کہ من اشرا اودا چیا برت گوں؟ من ایشی لالچی ءَ سرپد ات اوں ، بلے من جیڑتگ ات کہ بلکں نوں کمو تپاوت ءُ گھتری اتکگ، ۔
من گوں ترندیں گالوار ءَ کوکار کت ءُ گشت کہ درا چہ اد ءَ ءُ ھچبر منی دیم ءَ مہ کپ،۔ نوں من ءَ سما بوت کہ لالچ مردم ءَ کور کنت، ءُ لالچی ایں مردم دگرانی پر تاھیریں زند ءِ وشیاں تھل ءُ کُچلیانی وڑالیگ کن انت۔ ھمے وڑا چہ علیشاء ءِ لالچ ءَ من چہ وتی سوب مندی ءَ زبھر بوت اوں ۔۔۔