؛؛؛؛؛؛؛؛؛؛ لبز ءُُ بزانت ؛؛؛؛؛؛؛؛؛؛؛

زانتکار گُش اَنت کہ لبز ہالیگیں رَزان اَنت ۔ آیانی تہا بزانت مان کنگ مَے کار اِنت۔ لبز یکّے بیت بلے ہر چیز ءِ بزانت جتا جتا بنت۔وتی وتی زانش ءُُ پہم ءِ بستار ءَ،چو کہ شائر ءِ نزّ ءَ دل ءِ بزانت دگرے ءُُ ایم بی بی ایس ڈاکٹر ءِ نزّءَ دگرے۔مات ءِ گورا زہگ ءِ بزانت دگرے ءُُ پت ءِ گورا دگرے، سیاست دان ءِ واستہ اُولس ءِ بزانت دگرے ءُُ روتاک نویسوک ءِ واستہ دگرے۔
ہمے بابت ءَ تاریخ ءَ یک باز پُر کیپئں کسہ ے بندوک اِنت ۔
گُشنت کہ گوستگیں زمانگ ءَ وہدے ایشیا ءِتہا بدھ ازمءِ ٹکّ ءُُ بولک برجم اَت۔
برما ءِ سیمسراں بودیانی یک میتگے آباد اَت۔پرنگیاں پگر کت کہ ما پرچہ اے میتگ ءَ دزگیر مکنیں۔
پمشکا پرنگیاں میتگ چپ ءُُ چاگرد ءَ اَنگر کت۔ میتگ ءِ مردم ہیران اِتنت کہ اے مردم میتگ ءَ چہ ڈنّ پرچہ اُوشتاتگاں توک ءَ پرچہ نیاینت۔
میتگ ءِ بزرگاں وتی دو مردم ڈنّ ءَ روان دات کہ گوں اِشاں گپ ءُُ تران بکن اَنت۔آ تچک ءَ کماندار ءِ
گورا شت اَنتءُُ گُشت ے ؛ واجہ ما شمئے کجام کار ءَ آتک کنیں ءُُ شما چے لوٹ ئے ۔؛
کماندار ءَ درائینت ؛ ما شمئے میتگ ءِ دزگیر کنگا آتکگیں۔؛
؛ دزگیر کنگ ءِ متلب چی اِنت ۔؛؛ بودیاں درائینت ۔
کماندار ءَ پسّو دات کہ ما اے میتگ ءَ وتی کنگ لوٹیں۔؛ بودیاں گُشت بلے بلے گپ اِش اِنت، شما مارا اجازت بدیئے ما وتی پیریناں چہ جست گریں ءُُ شمارا پدا رندترا کائیں ءُُ سرجمیں ہالاں دئیں۔
چیزے ساہت ءَ رند آ پدا واتر بوتاں۔آیاں گُشت ؛؛ واجہ انو باز دیر بیتگ شما باندا میتگ ءَدزگیر کت کن اِت۔؛؛
دومی روچ ءَ پرنگیانی سپاہیگاں دیست کہ میتگ ءِ مردماں وتی وتی ڈکْ ءُُ گرنچ سرا اَنت ءُُ میتگ ءَ چہ ڈنّ رؤگا اَنت۔ وہدے درستیں مردم گون وتی اُرد ءُُ ساماناں میتگ ءَ چہ ڈنّ در کپتاں،تہ گڈی مردم ءَ کماندار گُشت ۔؛؛ واجہ نوں شما میتگ ءَ دزگیر کت کن ئے۔؛
اسلا بودیانی گورا جنگ ءُُ جدل ءِ ہچ ہیال نیست اَت آیانی نزّ ءَ اے لبز، بزانت ءَ چہ ہالیگ اِتنت۔

،، ممتاز مفتی،،
بلوچی رجانک لیاقت امین