لچہ: تھنائی وتارا شوھاز ایت
لچہ: تھنائی وتارا شوھاز ایت
شائر: آرِپ سئید کیلکُوری
شائر: آرِپ سئید کیلکُوری
اُمیت ءِ بھاریں ھوشام ءَ
دردانی ابیتکیں نیادی یے
ارواہ ءِ سکین ءَ دنت روچے
شپ کشین اُمیتانی بانگواہ
پہ تو تئی چراگیں گُل برمشے
پہ من تئی زھیری ارمان اَنت
ارمانیں چراگ ءِ بستار ءَ
ھوشامی سباھاں شینک بستگ
کانچانی اُمیت ءِ دلبند ءَ
ھاکانی چِراگاں دزموشتگ
نیادانی زھیر ءِ چکاسے
کورانی پتاران بار داتگ
کابیلیں ھیال ءِ بندگاہ ءَ
کرکینکیں تیاب ءِ سرریچ ءَ
چولانی میار اَنت ارس ءِ جُڑ
چمانی ھسار ءَ سر گْوستگ
اُمیتے سھاری سرگواتے
سنگ پُروشیں زمین ءِ دلبند ءَ
ارسانی چِڑکہ ساز ءَ اَنت
ھُشکاؤگیں ڈیھ ءِ ڈل دیماں
باریں پہ کئی نوں شوھاز ءَ
کرنیگیں مُساپِر دمبُرتگ
ریکانی مجاں گوں اندیم اِنت
منزل چہ نگاھاں سرگْوستگ
سھڑینگ ءَ کوھیں دردانی
تھنائی وتارا شوھازیت
تھنائی وتارا شوھازیت