منی تگرانءِ سپر

من ھر وھدءَ کہ چہ مشکتءَ موکلاں ملکءَ شتگ آں گڑا منی چکاں منءَ گوشتگ کہ ابا مارا تگران ءَ پہ ترءُ تاب ءَ بہ بر کہ ما تگران نہ دیستگ من چہ وتی دزگٹیانی سوبءَ برے یک نیمونے کتگ بلے اے رند ءَ بہ زاں 2018 وھدیکہ من وتی موکلاں ملک ےَ شت آں گڑا چکاں منءَ باز منت ءُ گوشت کہ اے رند ءَ مارا المی ءَ تگرانءَ بہ بر من گوشت کہ شریں شمارا دو ءُ سے روچ توکءَ ان شاء اللہ تگرانءَ براں من وتی گوھار زاتک سلمان بوھیر گوانکو کت کہ ترا کئی گاڑی گونیں سلمانءَ درائینت کہ نوروز بھرامءِ گاڑی من گون انت من گوشت کہ شریں من نوروز گوانکو کناں مارا تگران ءَ پہ سیل ءَ روگی انت من آ گوانکو کت کہ منءَ تئی گاڑی لوٹ ایت منء چکاں الم کتگ کہ مارا تگرانءَ بہ بر کہ ما تنیگا تگران نہ دیستگ مارا تگرانءَ پیش دار کرپاسی ءُ کوچ ءُ ابدویءَ پیش دار کہ مئے پتءُ پیرکی جاگہ انت نوروزءَ گوشت شریں ناکو باندات من گاڑیءَ گوں ڑیلیور ءَ تئی لوگ ءَ دیم دیاں بلے دو روچءَ گیشتر مہ نند ات کہ منءَ کار است من گوشت شریں ءُ من چکاں گوشت کہ باندات تیار بت کہ تگرانءَ روئیں پہ اے ھال ءَ چک چہ گل ءَ بال بیت انت پرچا کہ آیاں تگران ھچبر نہ دیستگ کہ چونیں جاھے پمیشکا سک شوک ات انت اے دگہ روچ ءَ نوروز ءَ گاڑی منی لوگ ءَ دیم دات ما گاڑیءَ سوار بیتیں دیم پہ تگرانءَ شُت ایں چک چہ گل ءَ بال ات انت من سرجمیں راہ ءَ چکاں جاگھانی نام گوشان کناں کت انت کہ اے کجام کجام جاہ انت ءُ اے جاھانی نام چی انت تاں کہ ما کرپاسیءَ سر بیتیں گرمءَ ما کرپاسیءِ َ شھرءَ داشت سبارگ کت سک گرم ات ءُ ڈکالی سوب ءَ کرپاسی ءِ کورءَ آپ ماں نہ ات پھک ھشک ات دو ءُ سے جاہ نمبگ ات من کانیگءِ جتءُ چکاں آپ زرتءُ کنور کت ماراَ چہ شھراں ترماسے سارتیں آپ گون ات اے بیگاہ ءِ وھدءَ ھلاس بیتاں نی چکانی لنٹ ھشک بیتاں لگ اتاں گوں پریاتءَ کہ ابا زوت کن پد ءَ واتر میتگ روئیں من گوشت کہ شما چہ اودءَ چہ گل ءَ بال بیتگ ات کہ ما سے چار روچءَ نندیں اولی روچیں شمئے نک ھشک انت شما زھم جت گڑا شر تر بھتر ھمیش انت کہ شپ ءَ پیر کور ءَ روئیں وتی سیاد ءُ وارساں چاریں ءُ گِندک کنیں پرچا کہ مارا ءُ شمارا سک دیر انت کہ نہ دیستگ انت ءُ پدا اودءَ لینءُ پنکا ھست پریجءُ سارتیں آپ ھست الم شمارا وش بیت گڑا شپءَ ما پیر کور ءَ شتیں اودءَ مئے سیادءُ وارس چہ مئے آیگ ءَ سک بازوش بوت انت آیاں مارا وان ءُ مھمانی کت یک روچے ما پیر کورءَ مھتل بیتیں پیر کور منءَ سک باز وش بیت بلے منی چکاں وش نہ بیت ءُ آیاں ھین پہ دمان من ءَ گوشت ابا بریں میتگ ءَ ابا بریں میتگ ءَ من چار ات چکاں وش بوگ ءَ نہ انت پہ لاچاریں دلے ء اے دگہ روچ ءَ ما درآتکءُ وتی میتگ ءَ شھراں آتکیں بلے تگران ءِ کور ءُ ڈل ءُ ڈوک ءُ شھرانی مچانی بُرزیں کنٹ کہ بے آپی ءُ ڈکال ءَ سرءَ ھشک ات انت لھتیں مچ بنءَ کپتگ ات ءُ شھر ویران ات انت وتی وھدی وھد ءَ یات کنگ انت ءُ وتی واجھاں توار کنگ ءَ انت شمئے روگ ءَ رند مارا وش نہ بیتگ ءُ ڈکال ءَ مارا پرے ھال ءَ آورتگ شما کجا ات شما کجا بیت انت آ واجھیں میر ءُ واجھانی منگھیں دیوان!!!!
گوش ئے تگران ءِ میتگ ءِ کل ءُ بان ءُ شھر من ءَ ھمے جستءَ کنگءَ انت بلے منی گورءَ پسو نیست ات ءُ من ھیالانی تہءَ ایر کپت آں پدءَ وتی دل ءِ تہءَ گوشت وش ات انت پیشی دور بلوچانی,