میرو ءِ جنازہ چتور بوت۔ آزمانکار: عالیہ شاہ
میرو ءِ جنازہ چتور بوت
آزمانک
عالیہ شاہ
من چہ پکنک ءَ واتر کتگ ات ءُ اتکگ اتاں ءُ سنگت وتی لوگانی نیمگا شُت اَنت۔ ہما روچ ءَ پد چیزے روچ منی کُنٹ باز ایوک ءُ ابیتک اَت، منی دست گُشئے ہچ ءَ نہ رست، من باز ودار ہم کنگ ءَ اَتاں بلے من ہچ نہ زانت کہ گوں من چوش چیا بوہگا اِنت، ءُ میرو ءِ ہم ہچ ھال ءُ سوج ئِے نیست ات۔۔۔!
دل ءَ گُشت مروچی میرو ءِ میتگ ءَ بُرو باریں ھال ئے بگر۔۔۔
من وتی سواری زُرت ءُ دیم پہ ڈَل ءِ بازار ءَ رہادگ بوتاں۔۔۔
باریں بیمار اِنت ہینچو روچ اِنت نہ ھال کنت نہ کسے ھال دنت۔ اے بچک چوشیں بچکے وَ نہ بوتگ کہ اوتاگ ءَ مئیت۔۔۔
اناگتا پُشتا چہ ہارن ءِ توار بوت، شیران وتی ھیالانی دنیا ءَ چہ واتر بوت ءُ چاراِت ئِے کہ دَگ ءِ نیاما بوتگ، پردگے گاڑی یے بہ جنت۔۔۔
میرو ءُ شیران سکیں دوستیں سنگت اتنت، میرو ءِ اِینچو روچ ءِ گاری پہ شیران ءَ مزنین جیڑہے ات۔ بازیں وسوساں گوں شیران ءَ وتی راہ گِپت ءُ میرو ءِ میتگ ءَ وتا پہ زور سر کُت۔۔۔
شیران ءَ اَنچو سما بوہگا ات کہ ڈَل ءِ بازار ءَ اولی برا اتکگ ات۔
ہر نیمگا چماں شنک دنت، مردم است، بلے نیست ءَ ھساب انت۔ زہگ سرجمیں چو چورہانی وڑا زار جنئگ ءُ گِریوگا اَتنت۔ پیر زال ءُ ناکو دِرتگیں سریگاں گُک دئیگا اَتنت۔ کسان سالیں جنیں چُک درست پْرشتگیں ءُ لِپتگیں درپ ءُ دارگاں چنئگ ءُ نزّ آرہگا اتنت۔ شیران ءَ وتی دل ءِ سرا دست اِیر کُت ءُ یک کماشے ءِ کِرا شُت ءُ میرو ءِ جست ئِے کُت،
”ناکو دْروت!
وش ءُ جوڑ ئے؟ اے ڈَل ءِ بازار نہ اِنت؟
ناکو ءَ پسّہ دات
“سلامتی سر است اِنت ساہگ نیست، ھو ڈَل ءِ بازار ہمیش بوتگ۔”
شیران ءَ پدا جست کت!
“گڑا میرو ءِ لوگ کجام بوتگ؟ پیسرا اِدِا مزنین باغے بوتگ میرو ءِ لوگ منی ھیال ءَ ہمودا بوتگ، بلے اِدا گُشئے آس کپتگ، درست سُتکگ ءُ پُر اَنت، لوگ نیست، چے بوتگ اِدا ءُ کہ کائیا کتگ انت؟
واجہ شمئے کُمک ءِ واستہ کسے اتکگ اِدا؟
ناکو ءِ پسّہ باز دردیگ اَت!
“ھو منی چُک اِدا آس نہ کپتگ، آس دور دیگ ءُ مان دارگ بوتگ، کمک ءَ اَتکگ اَنت ہرچی کہ سر اَتکگ وتی ہرجان جت انت ءُ مان داشت انت ئِے، ہرچی کہ جوڑُکیں مردیں چُک است ات وتی پاداں گوں بُرتنت اِش، مارا گرم ءُ جلیں روچ ءِ سرا پہ مرگ ءِ واستہ دور اِش داتگ۔۔۔
اے ہبرانی اِشکنگ ءَ گوں شیران ءِ چمانی دیما سیاہی یے ءَ مان شانت۔۔۔ آئی نُک ہُشک بوت، آئی دپ ءُ دل میرو ءِ جست ءَ ہچ وڑا ساڑی نہ بوہگا اتنت، بلے شیران ءَ جست کت،
“ناکو گُڑا میرو؟” شیران ءِ دل سکّ دِریکگا ات کہ باریں ناکو چے پسّہ دنت۔۔۔!
کماش ءَ باز ھیرانی ءِ گوما شیران چاریت ءُ جست کُت
“منی چُک تو کئے زاناں؟
تو ہچ سرپد نہ ئے؟
میرو وَ زالمانی ٹولی ءَ اولی روچ ءَ جت کُشت، آئی ءِ برات ہم جنئگ بوت اَنت۔۔۔ پیریں پِت وتی گوما بُرتگ ئِے، تنیگا یلہ نہ کتگ ئِے۔۔۔ مئے کِرا چوشیں مردم ءُ مسترے نیست کہ مئے ہڈّانی پد ءَ بہ جنت کسےِ۔۔۔ اِدا چہ بُرو میرو ءِ جست ءَ گوں کسّ ءَ مہ کن۔۔۔”
شیران ءِ ساہ بند بوہگا اَت گُشئے آئی ءَ را زند ءُ زاہری قبر کنگ بوہگا ات۔ اے گپّانی اشکنگ ءَ پد شیران ءَ وتی دل ءَ جیڑ اِت۔۔۔
“میرو شہید بوت؟
کس سرپد نہ بوتگ؟
کس نیمگ ئے نہ شُتگ؟
میرو ءِ جنازہ باریں چتور بوتگ؟
باریں سر ءُ چمّ کنگ بوتگ؟
تئی سرجمیں میتگ سُتکگ ءُ پُر انت تو نوں واتر نہ کنئے۔۔۔؟
میرو منی پسّہاں کئے دَنت نّوں؟؟