نبشتانک : بزّگی ءُ واری، نبشتہ کار : پراز نور
نبشتانک : بزّگی ءُ واری
نبشتہ کار : پراز نور
ھمک نیمگ ءَ نگاھاں شانک دے آں گِند آں وتی بلوچ راج ءَ کہ بزّگ ءُ وار اَنت ، نیم گنوک ءُ نیم سار اَنت، درد ءُ گماں دُچار اَنت،
نیست گموار، نیست درد وار کہ بہ دنت تسلّھے ءُ بہ کنت کُمکُے۔ ھر دؤر ءُ ھر باری ءَ اِے زلم ءُ زوراکی، اِے شپانی بیمّ ناکی ، اِے روچانی در پہ دری پہ بلوچاں ھست۔ ھما کہ مزنیں اُگدھانی سر ءَ نشتگ اَنت، وت ھیش ءُ نوش ءِ تہ ءَ اَنت ءُ راج شدیگ اِنت، راج ءَ کاپرے ءُ کُڈّکے نام ءَ بُوتگ آ ھم ڈِر اِت ءُ ھور ءُ ھار ءَ بُرت۔ واجکار ءُ ھاکم نشتگ اَنت ءُ نِدارہ چار اَنت۔
بلوچ بیچارگ وتی راج ءِ کُمکّ ءَ وت کنگ ءَ اِنت ءُ راج ءَ دِلبڈّی دیگ ءَ اِنت۔
ھست چُشیں ھاکم کہ اُمر ؓ، ابو بکر ؓ، اُسمان ءِ گنی ءُ علی ؓ، اُمر بن ابدل ازیز ءِ وڑیں کِرد بہ کنت ءُ پیش بہ دار اِیت۔
پسّو : انّاں چُشیں ھاکم ھجبر ودی بُوت نہ کنت کہ ایشانی کِرد ءَ بہ کنت ءُ پیش بہ دار اِیت۔
بلوچ ءِ لوگ مان دیگ بوگ ءَ اِنت،
بلوچ لٹّ ءُ کُٹ کنگ بُوگ ءَ اِنت
بلوچ زِندان ءَ بندیگ کنگ بُوگ ءَ اِنت
بلوچ ءِ وانگ پچگرگ بُوگ ءَ اِنت
بلوچ ءِ مال ءُ مڈّی پُلگ بُوگ ءَ اَنت
بلوچ زُلم ءُ زوراکی ءِ آماچ اِنت
بلوچ ءِ اِزّت ءُ ننگ ءِ سر ءَ دست چِست کنگ بُوگ ءَ اِنت
انگت گْوش اَنت کہ بلوچ پرچا زھر اَنت ءُ گپ گوش نہ دار اَنت۔
اِے نیل بومیں زِز، اِے کار ءُ باری سیمسر چہ ما تیوگیں پُلگ بُوتگ اَنت بلے انگت گْوش اَنت شما پرچا گپ گوش نہ دار اِت ؟؟
بلوچ راج چہ کرن ءُ کدیم ءَ ڈالچار کنگ بوگ ءَ اِنت ءُ چہ وتی بُنکّی ھکّاں زِبھر کنگ بُوگ اِنت۔
لین بہ بیت شر آپ
تیل بہ بیت شر گیس
سُھر بہ بیت شر کرومائیٹ
گریفائیٹ بہ بیت شر چاندی
کوھانی تہ ءِ ھزانگ بہ بنت شر اِے بے بھا اِنت زِر
دْرست زُورگ ءُ بھا کنگ بُوتگ اَنت
انگت گْوش اَنت شُما زھر اِت پرچا ؟
منی اِے بزّگی ءُ واری پہ بلوچ ءَ اِنت چی ءَ
بزّگی واری پہ بلوچ ءَ اِنت چی ءَ
اِے آہ ءُ زاری پہ بلوچ ءَ اِنت چی ءَ
اِد ءَ ھکّ ءِ گپ گناہ اِنت او منی پُسّگ
اِے دور نوں باری پہ بلوچ ءَ اِنت چی ءَ
ھر روچ من بندیگ ایں کُوٹی ءَ تھاریں
سیاہ ءُ تھاری پہ بلوچ ءَ اِنت چی ءَ
گلزمین ءِ دلبند ءَ کُشت ءُ کُشاری اِنت
اِے لیب ءُ مداری پہ بلوچ ءَ اِنت چی ءَ
نورؔ انچو سِلاھاں گوں در اتکگ پہ تلاراں
سوکیگ ءُ شِزاری پہ بلوچ ءَ اِنت چی ءَ