وائے وتن ۔۔۔ مجید عاجز

سنج جَڑَکّیں روزرد اَنت کُہسار تئی
گْواڑگ بوئیں کَوش دُنیں آتار تئی
پُلّ گُلابیں جیگ گُل ءُ گُلزار تئی
وائے وتن ، وائے پہ ہشکیں دار تئی

لیلو لیلیں گْوانزگ شیکّ اَنت لولیاں
شنک ءُ سَدَکّہ ، جی ءُ جان ءُ کَولیاں
شِیر شلان اَنت بینگ زِکّیں بولیاں
ہِنّی رولہ ، ہون شُبینیں شار تئی
وائے وتن ، وائے پہ ہشکیں دار تئی

شیزار اَنت گْیابان سروداں کُوکُویں
نازین اَنت مہناز کہیباں آہُویں
سَنگَرتہ ہوشام بُلوراں شہجُویں
چنکان اَنت نوکاپ نہنگیں ہار تئی
وائے وتن ، وائے پہ ہُشکیں دار تئی

کَتریں شیپ ءُ جنّت زیدیں ڈاک ءُ ڈنّ
دلکشّ اَنت چو دلدار ءِ لُنٹانی پَنّ
وائے منی الماس تِلاہیں وائے وتن
نود سِکالک اِنت دانیچکیں گیوار تئی
وائے وتن ، وائے پہ ہشکیں دار تئی

شَہپگِریں دہکان ءُ شپانک ءُ شاہوکار
شُنچان اَنت ہیدانی شُلُنچاں شَہکِردار
شَہگُشتِن ، شَہکُرتِن ، شَہدانکیں ندکار
پیر ءُ عاجز ، شاہیں شَہگُپتار تئی
وائے وتن ، وائے پہ ہشکیں دار تئی