دستونک………..شائر: سید ھاشمی 

وشّاتک ئے جی بات اِنت ترا مجلس ءِ گُلپوش
گوں پْریشتگاں هاوند کتگ گالاں منی دلگوش

انچا وت ءَ سوچ اَنت وت ءَ بْریج اَنت هسدّیگ
گالانی مَراگاهاں نہ بیت باج بَری چوش

بے سوبی ءِ تُرس ءَ کت اَنت کَستانی ابیلی
شَهگْوشتنیں شَهماتاں واب گِپتہ کلاگٌوش

کاینت پمّنی مجلس ءُ دیواناں امیری
آریپیں شکر گال ، پہ شیمّوش پہ دلموش

زٌوربُردی ءِ شُوم جنگانی ٹَپّ آزگ اَنت انگت
مَچّ اِت پَد ءَ گڈّ کرتگیں مچّانی سر ءَ کٌوش

نوک کیسّگ ءُ کَم کیسّگ ءُ دَر کیسّگ ءُ اوستیگ
زر جوش ءُ هبر جوش ءُ کَپر جوش ءُ سَپر جوش

باهوٹی ءَ نهنگام ءِ نہ رَوت زِرد ءِ تهاری
رَهدربریں بامانی گُلیں چادرے مانپوش

کسّے کہ اِے رَهدربریں گالاں چہ زبهر اِنت
وتکٌوش اِنت ءُ وتکٌوش اِنت ءُ وتکٌوش اِنت ءُ وتکٌوش

ماں پانزده سَدی ءَ تو پہ سَرداری ءَ مِنّ ئے
زار پہ چوشیں هوش ءَ مَزن هوشانی مزن هوش

مٌورے هم نہ وارت گٌوش ءَ تئی گٌوش کپت اَنت شِلنگ ءِ
بشکُرّ اِت اَنت پہ بے بُنیں باوستے کئی گوش

گزّانی نوان ءَ ئے ، گدْروشانی میار ئے
گار بوت گُلیں گْدروشیا ، مَنت بے گُلیں گْْدروش

سَنٹ اِنت تئی سَما گٌورم ءُ سسّا ءِ رَمگ رُنگ
هُشک اِنت تئی گالکاسَگ ءِ نُکّ ، دٌوش سَتر دٌوش

لُوڑانی جکیں رهت ءِ میار اِنت تئی بُنبار
سوبانی گُلیں زیداں نہ بیت مَهری تئی شیمّوش

کم زانتی ءُ کَم دیدی ءُ بَد گِندی ءُ هیزی
بیگْواهی ءِ پیژ راه اَنت اِے هیلاں چہ وت ءَ پْروش

کئی منّت اِنت سَر کونڈاں گوں مان اتکگ اَنت سینگ
کئی کُنّت ءَ سَکّ اَنت منی پهناتاں تئی سْروش

تْرمپے پہ تو زنداپ ، چہ آریپی ءِ تاساں
کَستانی زِراں تِنگ ئے نہ رَوت اِنت تئی هلاهوش

چَہ گَندگیں سسّایانی تئی زِرد ءَ زهین ایت
بْیا پْیالهے چہ کیهویں گالانی زِر ءَ نوش …

هِچ باج نہ بارت اَچ من ءَ گُپتار ءِ سکندر ،
من کوروشاں گالانی ، نَـیاں پْرُشتگیں داریوش

بوهیریں سـیدؔ اَنگریں گالاں وتی گْونڈ گِر …
بَد زِرد ءِ جَگر بْرتکگ ، سَما سُتکگ ءُ پیلّوش

کراچی

٢۴،اگست١٩٧۴

٭٭٭٭

گوں واجہ اسماعیل ممتاز ءِ منہ واری ءَ