پوئی ۔ رجانکار : زاھد دشتی
( رجانک,, پوئی،، زاھد دشتی )
گْوستگیں وھد ءِ کسّہ اِنت کہ برطانیہ ءِ جنینآدمے سوئزر لینڈ ءِ تَر ءُ گرد ءَ شُت، اود ءِ رسگ ءَ رند آئی ءَ یک کوٹی یے ءِ زلورت کپت، آئی ءَ اود ءِ ھندی ڈاکیا ءَ کوٹی ءِ بابت ءَ جست گپت، ڈاکیا ءَ جنینآدم ءَ را ھوٹل ءِ دْراھیں کوٹی آنی سئیل کنائینیت- کوٹی ءِ دوست کنگ ءَ رند ھمے جنینآدم وتی ھلک انگلینڈ ءَ شُت، چیزے روچ ءَ رند آئی ءَ ھیال کت کہ آئی ءَ کوٹی ءِ ھمرائی ءَ “w.c” بزاں,, water Closest ” ٹوئیلیٹ نہ دیستگ تہ ھمے گپّ ءِ زانگ ءِ ھاترا آئی ءَ ڈاکیا ءَ کاگدے نبشتہ کت- ڈاکیا ءِ انگلش سکّ نزور ات تہ آ W.C پھمگ ءِ ھاترا سکّ پریشان بوت- تہ ھمے ھاترا آئی ءَ گوں پادری ءَ دزبندی کت ءُ جست گپت کہ w.c ءِ بزانت چے اِنت؟
بازیں مَگزواری ءَ رند آ دوھیں W.C ءِ بزانت ءَ ” Wayside Chapel ” بزاں ھندی چرچے پھم اِت، اے ھبر ءِ پدّرائی ءَ رند آ جنینآدم ءَ کاگدے نبشتہ کت کہ آئی ءَ w.c ءِ سوج گپتگ، ڈاکیا ءِ کاگد اے پیم ءَ ات-
بانُکیں زالبول!
گئی ھاترا اے وشّی ءِ ھبرے کہ w.c یے چہ تئی کوٹی ءَ نوہ میل ءَ دُور ھست انت، دگہ مالومداری ایش انت کہ ایشی نیام ءَ مزنیں ڈولداریں دْرچک آباد انت- اے w.c. ءِ تھا کساس 229 مردم ءِ جاگہ ھست انت، اے ایوک ءَ شمبہ ءُ یک شمبہ ءَ پچ بیت- ایشی تھا گرماگ ءِ ماہ ءَ ابید آ دگہ وھداں ھر وھد ءَ مردمانی آھگ ءُ مُچّی انت- من ترا اے پنت ءَ دیاں کہ زوت بیا، ایشی نزیک گْوراں مزنیں ماڑی اوں ھست، تئی ھاترا دگہ وشّی ءِ ھبرے، پرچا کہ تو ھر وھد ءَ نزیک گْوراں سئیل ءُ ترگ لوٹ ئے-
دگہ ھبرے ایش انت کہ بازیں مردمے وتی آھگ ءِ وھد ءَ سُبارگ اوں کاریت ءُ وتی سرجمیں روچ ءَ ایشی ءِ تھا گْوازینیت، بازیں مردمے وتی موٹر کارانی سر ءَ کیت- تئی ھاترا اے یک وشّی ءِ ھبرے کہ منی جِنکّ ءِ سُور w.c ءِ تھا برجاہ دارگ بوتگ- اے ھما جاگہ انت کہ منی جنکّ ءُ لوگ واجہ گند ءُ نند کن انت، دہ مردم ءِ ھاترا یک سیٹے ھست انت- وھدے اگاں یک مردمے اے سیٹ ءَ گیپت تہ آ سکّ وشّ ءُ گَل بیت-
ایشی تھا دیمی نیمگ ءَ یک ٹِلینگوکے دْرتکگ ات-اے ھما وھد ءَ توار کنت کہ مردمے ایشی تھا کیت- ایشی نزیک گْوراں یک نیادی یے اوں ھست تانکہ مردماں پلش سیٹ پُجاّرینگ بہ بیت- پرچا کہ اے مردمانی دیریگیں واھگے-
منی لوگ بانُک نازرُکیں جنینے پمشکہ آ ھر روچ w.c ءَ ترّ ءُ تاب کت نہ کنت- ماھے یک رندے آ w.c ءَ رؤت- اے پمّن وشّی ءِ ھبرے بیت کہ تئی ھاترا ھاسیں سیٹے بہ گراں- بلے وھدے کہ تو ھبر ءِ سرا وشّ ءُ منّوک بہ بئے- پرچا کہ من لوٹاں کہ تو w.c ءَ یک جُتائیں جاگہے ءَ بہ بئے، تانکہ چُکّ ءُ چوریگ ترا شِزار مہ کن انت-
دگہ…. ھیر ءُ وشّ انت-
من تئی ھاترا ھر وھد ءَ ساڑی آں تئی گُشتگیں گپّانی منّوک:
ڈاکیا-