چِراگ اِنسران بنت گُباراں ماہ کپان بیت
دستونک
شائر: آصف شفیق
شائر: آصف شفیق
چِراگ اِنسران بنت گُباراں ماہ کپان بیت
تھاریں دمکاں دل منی خیالے ءَ اڈان بیت
من چِنچو تھنا بوتگاں اے مردُمانی جنگل ءَ
مئے شھر ءِ ایوکیں چِنال ھمے گَماں مِران بیت
اے چونیں بدگُمانی یے کہ واب ھم درامداَنت
نہ سورتانی ماہ بَلِیت نہ اَرسے مِھربان بیت
تو دیدگاں گمی مکن ھمے رواج کسمت اِنت
چِراگے روک بیت مِریت دلے کہ بیت پُْرشان بیت
ھمے کہ شام ءِ کدہ ءَ ابیتکیں رنگ ایر کپ اَنت
توار ھُشکیں تاکے ءِ مئے کِسّہ ءَ گُشان بیت