شگر واناں چہ ربّ ءِ یزدانی
منتگ اَنت دَور ءُ کوڈہ اِنت فانی
خالق گوں قُدرتّاں( وت ) مانیت

(میراث تاکدیم 108)

اِدءَ اگاں ما ( وت ) ءِ اصل توارینک ءَ بچاریں گُڑا آ بالکل اے وڑ نہ اِنت کہ اے شعر ءَ کارمرزگ بیتگ..
پہ دَرور اے چندیں شعراں بچار اِت کہ

آ جلب چُک کہ کینگاں سوتکگ
اے دگہ روچءَ بورئِِے شُورینتگ
گُنگ چرے احوالاں سہی بیتگ
توارے پہ دھکان ءَ گزب کُرتگ
پرچہ مئے بور پہ تردّگ ءَ اِشتگ
ٹیھ جوابے پہ سر دمگ داتگ
من نہ شورینتگ ( وت ) گنوک بیتگ

(میراث تاکدیم 196)

نی اگاں ما اے دوئیں شعری دروراں بچاریں گڑا مارا ہمے گندگ ءَ کئیت کہ دومی درور داتگیں شعر ءَ ( وت ) ءِ لبز وتی اصل توارینک ءَ کارمرزگ بیتگ کہ اے لبز ءِ اوّلی آب ءَ حرکتے مان ءُ دومی آب ساکن اِنت ‘ بلئے بیا کہ اے اوّلی درور داتگیں شعر ءِ اندر ءَ قصّہ جدا اِنت کہ اِد ءَ دومی آب بزاں کہ ” ت ” ءَ یک حرکتے دیگ بیتگ’ بزاں کہ ” ت ” ءِ توار گوں روایتی آبی موسیقی ءِ ردا دراج کش کنگ ءُ شعر موزوں کنگ بیتگ……چوشیں چنداں مثال مارا وتی عہدی شاعری ءَ دست کپ اَنت کہ یکّیں شعر ءِ اندر ءَ یکّیں لبز دو جدائیں جُدائیں حرکتاں کارمرزگ بیتّگ..

لبز ( من ) ءِ چندے دَرور:

(من) چدا مردی توکلے کرتیں
(من) سوار بیتّیں وشرہیں زین ءَ
(من) شُتاں گَور ءِ ڈیکّی ءِ دیم ءَ

(میراث تاکدیم 427+426)

پدا ہمے یکیّں شعر اِنت کہ روان اِنت ءُ دیمترا ( من ) وتی اصل لبزی توارینک ءَ گسر کنت ءُ دوئیں آباں حرکتے مان بیت..

پہ درور بچار
شالی ءُ دمبگّ ئِِے روان دات اَنت
نے ( من ) وارت اَنت نے منی دوست ءَ

(میراث تاکدیم 433)

مئے بُزرگاں وتی شعر موزوں کنگ ءِ حاترا آبانی گیر ءُ دار ءَ یک سلاہے ٹاہینتگ بیتگ ءُ آ ہمے آبی موسیقی ءِ پُر اثریں سلاہ بیتگ…..

میرساگر
کتاب (عہدے گوں پُلّ ءُ ٹِیٹُکاں)