یہ گرانڈِیل ئیں، ورنائیں بل شُذا شہ کانہال ئیں آدمی یے راہے سرا نشتغا اث۔ ہر رووخ آؤخ اگّا دست ڈوئی اثنت ئی۔وثی بدھالی و بدبختی ئے کِسّوا شلغ اث،شُذ ئے ویلانی پَچّارا کنغ اث او پِنڈ لوٹ کنغ اث۔

شف کپتہ۔شل اِثہ،شل اِثہ زوان ریش بیث ئی۔ رَکّ ھُشک بیثغ اَنتٛ ئی ۔ بل دست و لاف ہمانرنگا ہورگ اثنتٛ ئی۔

شفا دیر وختے پاذآتکہ۔ شہرا درا شتہ۔اوذا یہ درشکے شیرا نشتہ رفتہ گریئغا۔شُذ شہ اندرا گشئے کرونڈغ اث ئی۔وثی انڑزی ئیں چماں گوں آزمان پلوا کیال کثہ گوئشت ئی،

“مئیں اللہ۔۔! من بھاگیاآنی گُرا شُث ۔ نوکری لوٹ اِث۔بل منا گوں دنڑتغیں جرّاں دیث تراھ اِث کِشت اِش۔ من سکولانی دروازغ کھڑکینت اَنت بل ہورگ دست بیئغ سوَبٛا منا کسّا پیھغا دہ نہ اِشت۔ چڑو سہ جُنج ئے نغن واستا کارے گولغئے ھیلہ کث اَوں، بل ھچ چی دستا نیاتک اَوں۔ ناھیل بیثہ پِنڈ لوٹ کث اَوں بل تئی بندہ ئاں منا دیث گوئشت،”اے رنگیں دِنگ دیناریں مڑدماں پِنڈغ زیب نہ داث، نہ ایشاں خیراتی چی یے دیئغ روا اِیں۔”

مئیں اللہ! مئیں ماثا منا پیدا کثہ۔۔۔۔اےتئی ھکم اث۔۔۔۔نی اے دنیا منا شہ وختا پیشا پھ زور تئی گُرا دیم دیئغا باڑا اِیں۔۔۔۔!

دِلا خیالے آتک ئی۔ دیم رنگ مَٹ اِث ئی۔چمّ سوجلا بیثغ اَنت ئی۔

درشکی لامبے بورینتہ یہ لٹّے گھڑ اِث ئی۔ شہر پلوا زَھٛمی شہارثہ ھکّال داث ئی،”من ار شا نغنی چانغے لوٹ اِثہ بل شا منا نہ داثہ۔ نی من وثی بانزکانی زورا ارشا نغن زِناں۔

من مہر و مھبت ناما ارشا زمبے دو لوٹ اِثہ۔بل کَسّا دلگوش نہ داشتہ۔ نی من زُلم و زوراخی ناما ارشا نغن لوٹاں۔ گِندآں کئے منا جواو داث۔۔۔۔!”

وخت گُزانا شتہ۔آں ورنا یہ رہزنے،یہ قاتلے او ارواہانی ماڑیانی بورینوخے ناما مشہور بیثہ۔ آنہیا وثی ہر دژمن بورینتہ۔ بے اندازہ مال مڈی مُچ کث ئی۔

آنہی ئے ہم پیشغاں آں وثی سر چمّاں زُڑت۔سرکاری آدمیاں آنہی نام کہ اشکث لڑزغ بُتک اِش۔ ہر کسا شانہیا تڑس اِث۔آنہی ئے مال، مڈی و مخلوک دل نیاما آنہی ئے تراس دیثہ بادشاہا آں وثی کاردار گشین کثہ او شہرئے ھاکم جوڑینت ئی۔

بادشاہ ئے ناپوہیں کارداراں دہ آنہی رندگیری کثہ۔ہر ہندا مزیں مزیں سرکاری عہدہ دُز و رہزنانی دستا کفتغ انت۔

دزی و رہزنی ئے پُشت پناہی شروع بیثہ۔ زوراخاں گوئزورانی سرا قہرانی گوارینغ شروع کثہ۔ بے نِرواری و ناروائی عام بیثہ۔ جہانا زُلم بیّان دیث، تماشہ کث۔ وثی دل وھش کث او راہی بث شتاں۔

آدمیانی حڑص و بے پراہی بےوسّاں ڈوھدار او امن پسنداں قاتل جوڑین اِیث۔
یہ آدمی یے ئے دڑدانی درمان مہ بیث تہ آں دڑد ہزار ہمانکر بنت جہان سرا کاینت۔