کئے وتی زند ءَ ، پہ مہر ءَ وام دنت۔ زاھدہ راجی ء ِ پربند۔ ندر انت پہ باسک ءِ وانوکاں
دستونک

شپ تہاری، کئے گوشیت آرام دنت
روچ ءِ رُژنائ ، تبءَ ھوشام دنت

رُژنے یے واھگ کہ پُرشتگ، تل تل اِنت
کئے تلیں ارواہ ءَ ، زند ءِ نام دنت

جیڑگ ءِ آس ءَ سُچان ءُ بُن گران
زلم ءِ آماچیں دل ءَ ،کئےرَھم دنت

ملکموت سرساھگ انت، ساہ ءِ بدل
کئے وتی زند ءَ ، پہ مہر ءَ وام دنت

کبر ، تاھیریں دلانی جاہ نہ اِنت
پُشتا آیوکاں کسے پیگام دنت

ما چو امروز ءِ تب ءَ زانگ نہ بئیں
زندگی روچے، جتائیں تام دنت

راجی ءِ کسّہ ءُ کاراں چوں کنئے
بے بہاریں نوبتاں ھزام دنت
زاھدہ رئیس راجی