کلیر۔۔۔ گوستگیں وہد ءِ دنزاں عکسے
چندن ساچ
بلوچی لبزانک ءَ کلیر یک نوکیں گدارے (ناولے)۔ اِے گدار ذکریانی (ذگریانی) چاگردی زند ءِ باروا یک سرپدی یے۔ آ چوں زیارت ءَ رؤنت ءُ زیارت کننت۔ آیانی سور ءُ سانگ ءِ وڑ ءُ پیم، مردگ ءِ کل ءُ کسارت ءِ وڑ ءُ پیم۔۔۔۔۔ اے درستیں چیز گدار ءِ تہا سادگیں وڑے ءَ پیش دارگ بوتگ انت۔ گدار نویسوک عصا بجار اِنت۔ آ وت ہمے پرکہ ءِ مردمے۔۔۔ آئی ءَ تچک ءَ ذگریانی چاگردی زند بیان کُتگ۔ گدار ءِ تہا چشیں مزنیں کسہے مان نہ انت۔۔۔ بلکیں ہمے بگشیں کہ گدار ءِ تہا کسہ ءِ جند نیست۔ ہم دروگے نہ بیت۔ دنیا ءَ اینٹی سٹوری گدار ءُ آزمانک ہم نبیسگ بوتگ۔ انچو گمان بیت کہ یک مردمے ءَ کیمرہے گون اِنت۔ آ مردمانی ہمک روچی زندگی ءَ گوں ہمے کیمرہ ءَ ویڈیو کنگ ءَ اِنت۔ مردماں اے سما ہم نیست کہ کسے ءَ کیمرہے گون اِنت ءُ مارا ویڈیو کنگ ءَ اِنت۔ درست انچو پہ دیم وتی وڑا زندگی کنان انت۔۔۔ کیمرہ مین ءَ وتی کیمرہ زرتگ ءُ آیانی تہا گون اِنت۔۔۔۔۔۔ بلوچ ءِ زندگی ءِ یک رنگے۔۔۔۔۔ کوچگ بلوچستان ءِ کوچگے۔۔۔۔ بزانکہ ۔۔۔ گرکانی سیچی اِنت۔۔۔۔ ہما زبان کہ گدار ءِ مردمانی زبان اِنت۔۔۔۔ سکیں وش ءُ شیرکنیں زبانے کہ گدار ءِ مستریں جوانی ہمیش اِنت۔۔۔
گدار ءَ دیر اِنت کہ نبیسگ بوتگ۔ آ وہد ءِ وڑ ءُ پیم دگہ بوتگ انت ءُ مروچی ئیں وہد ءِ دگہ۔۔۔۔ آ وہد ءَ ما کسان اتیں۔۔۔۔ مئے نزینکیں میتگ کلگ کلانچ ات کہ اودا ذگریانی سید ءُ مُلائی نشتگ اتنت۔ یک سہبے ما واب ءَ کہ بُست داں ٹوپانی توار اِنت۔ مئے میتگ ءِ کُچک، پس مرغ، مردم درست ترس ءُ بیم ءِ تہا اتنت۔ کُچکاں دِرک زرت ءُ لہتیں دیم پہ کوچگ ءَ شُت ءُ لہتیں کُچک کوہانی نیمگ ءَ۔۔۔۔۔ مئے تیوگیں میتگ یکجاہ ات۔۔۔۔ درست دعا کنگ ءَ اتنت۔۔۔ داں یک مزنیں دنزے کلگ ءِ روڈ ءَ چست بوت۔۔۔۔ مُلایانی گاڑی یے ات۔۔۔۔ گاڑی سک تیزی ءَ گوں پیداک ات۔۔۔ مئے میتگ ءِ یک ءُ دو مردم گاڑی ءِ دیما شت کہ کلگ ءِ حالے بہ گرنت۔۔۔۔ بَلے گاڑی ءِ ڈرائیور ءَ گوں دست ءَ اشارہ کُت ءُ پہ کوکار گشت کہ کلگ ءَ تباہی اِنت۔۔۔۔۔۔۔ ما وہدے کہ اے گپ اش کُت، مئے ترس گیش بوت۔۔۔۔ داں دیراں ٹوپانی توار ات۔۔۔ پدا ٹوپانی توار تم اِت۔۔۔۔۔ اے بمب ءُ ٹوپاں کس نہ مرت۔۔۔۔ بَلے اے بمب ءُ ٹوپانی تواراں مارا یک بیمے ءِ تہا دؤر دات۔۔۔۔ پدا مئے شپانی واب گار بوت۔۔۔ آ وہد ءَ گاڑی کم ات۔۔۔ موٹرسائیکل ہم نیست ات۔۔۔۔ اگاں شپے ءَ گاڑی یے ءَ لائٹ دات یا موٹرسائیکلے ءِ لائٹ گندگ بوت گڑا میتگ ءَ واب حرام ات۔۔۔۔ لہتیں مردمانی گورا تُپنگے تُپنگے ہست ات۔۔۔۔ بَلے بمب ءُ ٹوپانی دیما اے تُپنگ ہچ نہ اتنت۔۔۔۔
وہد ءَ بدل بوہگی انت۔۔۔ وہد بدل بوت۔۔۔۔ مردم پدا نزینک آیان بوت انت۔۔۔ بلوچ پدا زوت چشیں چیزاں بے حال کنت۔۔۔۔۔ مئے ترس ہم وہد ءِ ہمراہی ءَ ہلاس بوت۔۔۔۔۔ اے گدار ہما وہد ءِ کسہ اِنت۔۔۔۔ مروچی بگندئے آ وہد یک تہلیں یاتے ءِ وڑا لہتیں مردماں انگت گون بہ بیت۔۔۔۔۔ اے گدار آیاں مروچی ہم وتی گوست ءِ ساچان ءَ برت کنت۔۔۔۔
من ءَ دیر اِنت کہ کراچی ءِ وڑیں شہرے ءَ یاں۔۔۔ اے شہر ءَ ۔۔۔۔۔ مردم گری ءِ وتی وڑ ءُ پیم اَنت۔۔۔۔ بَلے ادا آ رنگ نیست انت۔۔۔۔ کہ مئے کوچگی زندگی ءَ بوتگ انت۔۔۔۔ گند ءُ گسڑانی تہا، تنکیں لوگانی تہا، گٹر ءُ سِلیں آپانی تہا۔۔۔۔۔ ادا زندگی ءَ دگہ ہر نامے کسے دات کنت، بہ دنت۔۔۔۔ بَلے ادا زندگی ءَ را زندگی گُشگ بوت نہ کنت۔۔۔
چشیں جاورانی تہا مردم ءَ وتی گوستگیں وہد ءُ باری یات کاینت۔۔۔۔ پمیشکا کسے اگاں کوچگی زندگی ءِ کسہاں کاریت۔۔۔۔ من اش گوش داراں۔۔۔۔ کسے کہ آیاں نبشتہ کنت۔۔۔ من اش واناں۔۔۔۔۔ پرچا کہ من ءَ ہما وشی اے شہر ءِ تہا نہ رسیت۔۔۔ ہمے کسہانی تہا رسیت۔۔۔۔۔ ۔۔۔۔
دگہ برے۔۔۔۔۔ کوچگی زند ءِ سرا نبشتہ بوتگیں گدارانی سرا چیزے نبیساں۔۔۔۔۔ ۔۔۔ اے وہد۔۔۔۔ فیسٹیول ءُ دودمان ءِ نام ءَ دیوانانی برجم دارگ ءُ وتی منارینگ ءِ وہد اِنت۔۔۔۔۔ کسمانکانی وہد ءَ کسمانکی کارست حرید کارنت۔۔۔۔۔۔۔۔ نہادی ءِ وتی ندارگے