کمبر تو منءَ کمبرءَ چہ گیشتر گیر کائے۔ تاج بشیر
کمبر تو منءَ کمبرءَ چہ گیشتر گیر کائے
سال 2005 ات ماہ من ءَ یات نہ انت۔ بیگاہ ءِ وھد ات من صدر ءِ پُشتی راہءَ چہ دیم پہ کراچی پریس کلب ءَ روگءَ اتاں کہ ھودءَ لہتیں بلوچ لیڈرانی ھوار جنگ ءِ ھلاپ ءَ زھر شانی بوھگا ات من ءَ سنگتےءَ ٹلیفون کُتگ ات کہ بیا زھرشانی ءَ ھوار بی گوں من وھدے زینب مارکیٹ ءِ نزیکءَ سر بوت انت داں من دیست یک بچکے گوں تیزیں گاماں پیداک ات من ھمئے گمان کُت کہ اے بچک من پیسرءَ دیستگ وھدے کمو نزیک تر اتک گڈا
من چار اِت کہ بچک ءِ دپ سُرگا انت انچو گمان بوت نرْونڈگ ءَ ایں۔ وھدے سک نزیک اتک گڈا من دیست اے وا کمبرقاضی ایں۔ من لوٹ ات کہ سلامے دیانے بلے منی سلام دئیگءَ پیسر من ءَ گُشتے بریں واتر کن من جُست کُت تو من ءَ پجّا آورت زاناں ؟ گوں بچکندے ءَ منءَ پسّوئے دات کہ من دنیگہ اینچو اوں کور نہ انت، من ترا دیرءَ چہ پجّا آورتگ۔ من پدا جُست کُت احتجاج زاناں ھلاس بوت۔۔۔پسَوئے دات اناں انگت بندات نہ بیتگ۔۔۔۔۔گڈا بریں ھور بئیں۔۔۔۔۔نلوٹی کمبرءَ زھرءَ زھر من ءَ پسّو دات سیاست بس انت کہ منی ءُ تئی پتءَ کُتگ۔۔۔ھمدءَ رکشہ ے دستے دات منءَ جُستے کُت تئی لوگ گارڈنءَ ایں؟۔۔۔۔ھو۔۔۔۔ما دوئیں رکشہءَ سوار بوتیں دیم پہ گارڈنءَ رھادگ بوتیں۔۔۔۔کمبر رکشہءِ تہا ھچ نہ گُشگا ات بس دل ءِ تہا نرْونڈگءَ ات ۔۔۔۔من ھیران اتاں۔۔۔۔اے منی گوں کمبرءَ دومی ملاقات ات۔ پیسرءَ یکرندے ما لیاقت لائیبریریءَ یک دیوانےءَ دُچار کپتگ اتیں ما ھمودءَ یک دومیءَ پجاروک بوتیں وھدے دیوان بندات بوت گڈا من ءَ گُشتے تو منی کرا بنند ھمئے دیوانءِ تہا من کمو گپ جت گڈا کمبرءَ منی گوشاں ھلوت کُتءُ گُشتے تو اوں گپ زان ءِ، من گُشت وللہ من گپ نزاناں ما دوئیناں کند ات، گڈا دیوان ءِ یک سربراہےءَ مئے نیمگا زھرءَ زھر چار ات گڈا من کمبرءَ گُشت be serious کوچرائی مکن کمبرءَ گُشے منی اے گپّءِ سرا گیشتر کندگ اتک۔۔۔۔۔۔۔۔درستیں راہ ے ھاموشی ءَ رند ما گارڈن گیٹ ءِ دپءَ سربوتیں گارڈن گیٹءِ دیما ھوٹلے است ات کہ آئیءِ دیما لہتے تھت ایر ات ما دوئیں شُتیں یک تھتےءِ سرا نشتیں ءُ چاہ ءِ آڈر دات ۔۔۔۔۔کمبر ھاموش ات منی دلءَ ات کہ گپے بُگوشاں بلے نزانت چے بگوشاں۔۔۔۔منءَ اے ھاموشی پرْوشگی ات۔۔۔۔من جُست کُت کمبر نزاناں چے بوتگ تو چو زھرءَ پُرّءِ ؟ تو منءَ احتجاج ءِ اٹینڈ کنگءَ اوں نشت۔۔۔۔۔۔۔تو بل یار شیَرے بوان، سیاست بس انت کہ قاضی ءُ بیدارءَ کُتگ کمبرءِ موڈ کمو شرتر بوتءُ من ءَ پسوئے دات۔۔۔۔۔قاضیءُ بیدارءَ کدی سیاست کُتگ ؟ منی ھمئے گپّءَ کمبرءَ بلاھیں کندگے جت ءُ گُشتے دے تال یار۔۔۔۔۔۔۔بلے جلدی کن شیَرے بوان۔۔۔۔۔کمبر من شائرے نیاں۔ من شیَر نزاناں، سیاسی گپّے جنیں ۔۔۔۔۔کمبرءِ موڈ پدا ھراب بوتءُ زھرءَزھر گُشتے ھَو تو مزنیں سیاستدانے ءِ ۔۔۔۔۔۔بچار کمبر شائری مکن زاناں بیدارا ءُ قاضیءَ کُجام کٹ کُتگ کہ شائریءِ کُتگ کہ نوں منی ءُ تئی باریگ ایں؟۔۔۔۔۔۔۔کمبر منی اے ھبراں سک ھیران بوت۔۔۔۔۔کمبر تو فراق گھورکپوریءَ زان ءِ ؟۔۔۔تو زانءِ آئی ءَ پرچہ شائری کُتگ پرچیکہ آ سیکس ءَ چہ مھروم بوتگ آ وتی جن ءَ اوں وتی کرا وپسگءَ نشتگ۔۔۔۔کمبرءَ گوں بچکندگےءَ گُشت تو زاناں آئی ءِ لوگءَ گون بیتگءِ؟۔۔۔۔ھاھاھاھا۔۔۔۔۔۔شرّیں غالبءَ بچار آئی ءَ چے کُتگ بہادرشاہ ظفرءِ دیوان ءَ قصیدہ ونتگے پدا وظیفہءِ سرا زندے گوازینتگ اے نوں ھالے شرّیں کارے بُکتینیں جنءُ چکّاں شرّیں زندے گوازینتگ ات ۔۔۔۔۔کمبرءَ پدا پہ کندگ گُشت غالبءَ چینچو چُک بیتگ؟ کمبر be serious۔۔۔۔یار عطاشادءِ وڈیں مردمے من چرسءِ کشگءَ دیستگ ، جی آر مُلا۔۔۔۔۔اشاں بل من اے اوں اشکُتگ کہ فیض احمد فیض ءَ اوں چرس کش اتگ ۔۔۔۔۔یار اے شائر درست سیکس ایڈکٹ انت یا نشہاھانی آماچ انت چُشیں زندءَ چے فائدہ یار۔۔۔۔۔۔۔۔کمبرءَ گوں ھیرانیءَ پسّو دات تاج تو درستیں شائراں زانءِ بلے تو شائری نزانءِ ۔۔۔ تو منءَ ھیران کُت، تو بیدارءِ چُکے ناں؟ ھیر روچے کئیت تو وت سرپد بئے انوں دگہ جنّے تئی سرا سوار انت من بس ھمینچو گُشاں شائری زندءِ بھرے نئے بلکیں زندگی انت ۔۔۔۔گوشدار۔۔۔۔کمبرءَ دراجیں شیَرے ونت ۔۔۔۔بلے منی دلگوش گوں وتی فون ءَ ات کہ باربار مسیج پیداک اتاں کہ بیا پریس کلبءَ احتجاج بندات بوتگ۔۔۔۔۔۔۔۔کمو دیراں رند کمبر منءَ گُشت مرچی بلکیں مئے آخری ملاقات ایں من روگا آں کوئٹہءَ ۔۔۔۔آخری پرچہ کمبر جان پدا دُچار کپیں۔۔۔۔۔کمبرءَ گوں بزگیں دابےءَ گُشت باریں زندگی کُجا سرکنت۔۔۔۔۔۔۔
کمبر یار من ھماھاں شائرانی بابتءَ وانگءَ انت وتی منّاں پرْشت ءُ پروشیں شائری اوں کنگءَ انت، شائری زندگی انت یا زندگیءِ بھرے اے جُستءِ شوھازءَ کتابانی تہا سرسر جنگءَ آں ،زندءِ ھرتکءُ پہناتانی تہا شوھازءَ آں، دریگتیں ترا پدا بدستیں ترا جُست بکتیں کہ شائری چتور زندگی ایں آروچی تو لوٹ ات کہ تو من ءَ بُگشءِ گوں بلے من گوش نداشت ۔۔۔۔۔منءَ براتے اوں است ات کہ آئی ءِ نام اوں کمبر ات آ اوں ھما راھاں شُت کہ تو شُتے۔۔۔۔بلے آئی ءَ چہ گیشتر منءَ تو گیر کائے۔۔۔۔۔۔۔۔۔۔۔۔۔۔۔۔۔۔۔۔۔۔۔