ہڈ پیرگھنگ

نبشتہ کار: شعیب شاداب
…………….
اے یک براہوئی گالبندے ءُ دورءِ جہالتءِ یک رسمے کہ درقومانی قوم ءِ بد ل کنائینگءِ حاطرا ادا کنگ بیت۔ماں کلیں دنیاءَ اے رسم تہنا براہوئی اسپوکن قبیلہانی تہا است اِنت ۔اے رسمءِ رِدا اگاں درقومءِ مردم براہوئی اسپوکن قبیلہے ءِ تہا وتارا شمار کنگ یا آئیءِ رسمانی ردا زندگی گوازینگ بلوٹیت گڑا قبیلہءِ سردار دراہیں مردماں لوٹاہینیت ہما درقومءِ مردم اوں ہوار بیت، اے یک پسے کُشنت ، کباب کن اَنت ۔ پدا ہمے دراہیں مردم ہمے پتکگیں پسءِ سرا پررِچنت ہرکس پہ وت کشگءِ جہدءِ کنت،پسءِ ہڈچہ بندءُ بوگاں سداَنتءُ ہرکسی دستءَ چُنڈے چُنڈے کپیت۔بزاں نوں آمردمءِ ہڈچہ وتی قومءَ سستگءُ براہوئی گشوگیں قبیلہءَ پترتگ۔ہمے رسمءِ ادا کنگءَ پدہما درقومءِ مردم براہوئی اسپوکن قبیلہءِ باسکءِ جوڑ بیت ءُ ماں ہما قبیلہءَ سورکت کنتءُ ہما قبیلہءَ فرقہ یا مذہب ءَ قبول کنت۔ ہمیشیءَ گشنت ’’ہڈپیرگھنگ‘‘ ۔نوں اے رسم ایوکءَ ماں تاریخءِ تہا دست کپیت قدیم زمانگءَ عملی دروشمءَ است بوتگ۔ بوت کنت کہ نوکیں نسلءِ ورناہیں براہوئی اسپیکنگاں ایشیءِ بابتءَ معلوم مہ بیت بلئے کوہنیںءُ مزنیں عمرءِ مردم اے رسمءِ بابتءَ سرپد اَنت۔ اے رسم آغاگلءَ وتی یک ناولےءِ تہا نبشتہ کتگ ءُ حوالہ داتگ اَت کہ اے یک براہوئی زبانءِ قبیلہانی رسمے۔ من پدا ہمے رسمءِ بابتءَ آئیءَرا جست کت گڑا آئیءَ منءَ سرپدی دات۔

اگاں ما نگدی چمشانک بدیاں گڑا دنیاءِ کلیں قوماں وہدے چاراں گرا مارا ہچ قومءِ کرا چُشین رسم گندگءَ نئیت کہ پہ پسے کُشگ ءُ آئیءِ چیلینگءُ بہرکنگءَ دگہ قومےءِ انسانےءِ جینزءُُ جبلت یا ڈی این اے بدل بہ بیتءُ ماں دگہ قومےءِ تہا کنورٹ بہ بیت۔ پمیشکہ اے یک غیرسائنسی ءُ غیر عقلی عملے لیکگءُ رد کنگ بیت۔ ماں گوستءَ قبائلی مردماں درقوم چہ وت کمتر لیکتگ اَنت پمیشکا کسے وتی ہم درور لیکگءِ واستہ ہمے شرط ایر کتگ ، اے یک غیر حقیقی عملے چریشیءَ چہ انسانءِ جبلتءُ جینزچہ وتی قومءَ بدل نہ بیتءُ دگہ قومےءِ تہا کنورٹ نہ بیت۔پرچاکہ اگاں ما چہ ’’ہڈپیرگھنگ‘‘ءِ رسمءَ چہ گوازینتگیں ہمے نوکیں مردءِ ڈی این اے ءَ ٹیسٹ بہ کنیں گرا حبر گیشیت کہ چرے رسمءَ اے مردءِ تہا ہما براہوئی گوشوکیں قبیلہءِ ہچ مردمءِ ڈی این اے یک نہ بیت بلکہ ہمے مردءِ ڈی این اے وتی خاندانءَ گوں یک بیت ءُ آئیءِ تہا فرق نئیت۔ ءُ ناں کہ آئیءِ جبلت ءُ جینزگوں ہمے قبیلہءَ یک بوت کن اَنت۔ پمیشکہ ادا ہمے آسر دیما کیت کہ پہ رسمءِ اداکنگءَ ہچ کسی قوم بدل نہ بیت۔

ماں جدید ءُ سائنس دوستیں چاگرداں ہرکجام قومءِ مردمے ابید رسمءُ رہبندءُ ابید مذہبءِ بدل کنگءَ گوں دگہ قومءِ مردماں سورءُ سانگ کت کن اَنت۔ پرے عملءَ اگاں جنک یا بچکءِ رسمءُ مذہب چہ سور ءَ پد اوں دگردگر بہ بنت ہچ فرق نہ کنت۔۔مذہب یک عقیدہے کہ فلسفہ ایشیءَ یک دورء جہالتءِ قبول کتگیں نظریہے لیکیت۔ نظریہ یا مذہب بدل کنگ بیت۔ بلئے انسانءِ جینزیا جبلت بدل نہ بیت، پمیشکہ قوم دوستی چہ مذہبءَ دیما تراِنت۔قوم دوستی پیسرا اِنت ءُ مذہب چہ قوم دوستیءَ دومی حیثیتءِ چیزے، ہمے حاطرا قوم دوستیں مردم قومءِ خلافءَ ہچ برداشت نہ کنت بلئے مذہبءِ حاطرا برداشت کنت۔ مذہب پرست، قوم دوستیءَ دومی حیثیت دئینتءُ مذہبءَ پیسرگشنت ہمے حاطرا آ مذہبءِ خلافءٗ ہچ برداشت نہ کن اَنت وہدے کہ قومءِ خلافءَ وت بہ بنت آہانی خیالءَ ہش مسئلہ نہ اِنت۔ پرے درگتءَ مذہب پرستانی ہیال اِنت کہ انسان اللہءَ وتی عبادت ءُ مذہبءِ دیمروئیءِ حاطرا پیداک کتگ۔ پمشکہ مذہب قومءِ دیما دومی بستارے داریت یا کہ ہچ بستار نہ داریت۔ وہدے کہ لبرل ازم مذہبءَ فلسفیانہ نقطہ نظرءَ دؤرءِ جہالتءِ یک نظریہے گشیت ءُ آئیءَ ارزشت نہ دنت بلئے ہر مذہبءِ مردمانی حقانی پہازگءِ سکینءَ دنت۔ لبرل ازم تہنا انسانءَ انسان بجّا کاریت ءُ ہر وڈیں انسانی آزادیءُ آئیءِ ہمک رنگیں حقاں منیتءُ دراہیں قوماں برابر سرپدبیتءُ قومانی رسمانی منگءِ پابند نہ اِنت۔

بازیں رَبیَت دوستیں مردمانی خیال اِنت کہ پہ رسمءِ ادا کنگءَ انسانءِ جینزبدل بیتءُ آدگہ قومے جوڑ بیت۔ یک افریقی یے تُری ہزار رسم ادا بہ کنت، انگیریزءِ دراہیں رسماں دربہ بارت ءُ وتی زندگی ءَ اوں ہما رنگءَ بہ گوازینیت آ کدی انگریزجوڑ نہ بیتءُ انگریزگشگ اوں نہ بیت۔پرچاکہ چرے رسماں نہ کسےءِ خارجی ءُ فطری ساخت بدل بیت بلکہ آوتی داخلی جذباتاں بدل کت کنت وتی جینزءَ بدل کت نہ کنت۔آ بس رسمانی رداگوں انگریزءَ نندیت وتی زندگیءَ گوازینیت۔ ہمے رنگءَ آ دگہ درقومیں مردم اوں پہ رسمءِ ادا کنگءَ دگہ قوم جوڑ بوت نہ کن اَنت۔ من گشتگ کہ پسءِ کُشگءُ چیلینگءِ رسم کہ چرائیءَ انسانانی قوم بدل بنت اے دگہ قومانی تہا نیست۔ رَبیَت دوستیں مردمانی خیال ہمیش اِنت کہ اگاں فارسی یے بیئت پسے بہ کشیت ہمے رسمءَ ادا بہ کنت آ بلوچ جوڑ بیت۔ علمءِ بشریات مردمءِ ہڈانی تجربگءَ چہ آزان اَنت کہ اے کجام قومءِ مردم بوتگ۔پمشکہ پہ رسم اداکنگءَ قومءِ بدل بوہگءِ تصور سائنسی نہ اِنتءُ اے یک روایتی ءُ غیرفطری عملے گشگ بیت۔

اے غیرعقلی ءُ غیرسائنسی عمل اَنت کہ چریشانی ادا کنگءَ انسانءِ سرا ہچ فرق نہ کپیت۔ تہنا وتی ذہنءَ ہمے سکون دئیگ بوت کنت کہ رسم ادا کنگ بوتگ من بدل بوتگاں۔ بلئے حقیقتءَ ہمے رسم انسانءِ تہا ہچ رنگیں بدلی نیاریت۔ اے یک رسمی ضرورتے ءُ غیرفطری عملے چریشیءَ چہ قوم بدل نہ بیت۔اے وڑیں رسمانی ادا کنگءَ ابید اوں کسے دگہ قومانی رسمانی تہا زندگی گوازینت کنت، سور کت کنت بلئے وتی جینزءَ بدل کت نہ کنت۔ بایدفطری عملءُ غیرفطری عملءِ فرق کنگ بہ بیت۔دنیاءِ تہا قوم ہزاررنگیں غیر سائنسی رسم ءُ روایتانی سرا یقین کن اَنتءُ آہاں راست لیک اَنت۔ ضروری نہ اِنت کہ ہماہانی ضرورتءِ ردا آہاں روشن خیالی، فلسفہءُ سائنس اوں حقیقت بہ لیک ایت۔