عمر عثمان ءِ آزمانکک، آزمان نیوٹرل انت
آزمانکک : آزمان نیوٹرل انت
آزمانکار: عمر عثمان
آزمانکار: عمر عثمان
سرجمیں میتگ چپت ات، ہچ وڑیں گویاکے گوشانی پردہانی مہمان نہ بوت۔ روچ وتی دابءَ میزان میزانءَ جنزان ات۔سہب نیمروچ،نیمروچ ایوار،ایوار عصر،عصر دیگر داں شپ وتی سْیاہیں گورشانءَ ایر دیان یکبرے پدا گندلانی باہوٹ بوت، بلے نِبا کن اِت کہ کچکی ہولاسگے،پشّی ئی کوانژگےءُ مُرگےءِ بانزلانی تراپگ ئے آوازءَ اش بہ کنے۔
اوتاکءَ مِیسّ کشتگ،پنکھا ستکگ،مکسکانی گردوم انت، مجال انت کوپے چاہ دیما بہ کنے،کلہے حیال ٹگل ات،بزاں چاہ تئی نہ بوت،مگسکے اوژناہ انت۔آتراپءِ آپانی سانءَ ءُ لچءُ گٹرئے آرءَ ڈن ترّگی نہ انت۔بدیں بو گْواتءِ دستءَ کانکڑوءَ لوگ پہ لوگ لوٹکی کنگا انت۔بدبو سہبءِ ارزبندءَ ،نیمروچءِ سبارگءَ ءُ شپءِ شامءَ چو سلادءَ گون انت۔
بلے۔۔۔۔ زندمان نہ اوشتیتءُ کسی ودارءَ نہ کنت۔
لس مہلوک ہمک روچی کارءُ چلوپگاں گندءُ گسڑاں مان دیان انت،روچاں تیلانک دئیگے توجیل ساچگءَ انت۔اوتاکءِ در دگی دمکےءَ پچ انت۔دیما گوازی پڑءِ چار دیوالی انت۔دمکءَ منولانی دپ چو ہپتارءَ پچ انت۔منول گٹرے آپءَ چکار انت،مگسک،کرمءُ وڑوڑیں لیلک گردی جنگل انت۔مہلوک پہ کہیبے پاداں چست کنانءُ گوزان انت،بلے گٹر انت کہ کسءَ بےبہر نہ کنت، کسےءِ شلوارانی پادگ،کسے پینٹءُ پتلونءِ لمبے الم گنداں گوں گوازی کنت۔مہلوک گیشے منولءُ گٹراں نہ انت،ابیلءِ بلڈنگءَ چے بوہگا،ہمساہگے لوگءَ ورگ یا آپ ہست کہ نیست،کسے گمانءَ نہ انت۔مَرگءُ عاروس ایوکا گوں ذاتءَ بندوک انت۔
ہورءَ گورت یا حاموش ات،جمر سرا چوکیداریءَ اتنت، اگاں کلہے روچءَ دریگءَ چہ سر کش ات،مہلوکءَ روچ دستانی دلءَ زرت،،، بلے روچ ات کہ دست دئیگے پیما نہ ات۔مہلوکے چم آزمانءَسک اتنتءُ آزمانءَ ہچ کارا کار نیست ات۔آزمان نیوٹرل ات۔