(آزمانک,, توک ءِ مردم،، رخشندہ تاج)
(آزمانک,, توک ءِ مردم،، رخشندہ تاج)
مرچی منا دراہیں کار زوت ھلاس کنگی اَنت، دُکان مھلہ بندکنگی اِنت، چیاکہ باند ءَ ائید انت ءُ ائید ءَ دُکان پچ کنگی نہ انت، درزی ئیگ ءَ ائید ءِ گُد ھم آرگی اَنت، بیبگر ھیال کنان ات وتی دست ءِ گڑیال ئےِ چارِت، شپ ءِ یازدہ کلاک ات، آئی ءَ دُکان بندکت، دیم پہ درزی مراد ءِ دکان ءِ نیمگا شُت، گلّی ءِ تھا مشینانی جَگ جگ ءِ توارات، دو سندھی مزدوراناں یک چادرے سرا ات ءُ نشتگ ءُ سگریٹ کشّگا اتنت، بیبگر ءَ ھیال کت کہ ایشاناں ائید ءِ ھچ پکر نیست، اے نزانت کہ باندا ائید انت، آھیالاں گوں دُچار ات کہ دزدی مراد ءِ دکان سر بوت، درزی مراد ءَ را سیاہ چاہ ءِ چاہ دانی دیما ات ءُ K2 سگریٹ ءِ دراجیں دَم کشّگا ات، بیبگر شت دکان ءِ تھا ڈیکّی ءِ سرا نشت ءُ درزی مراد ءَ را گشت ئےِ مراد! ڈے تو منی گُد تیار کتگ انت؟ درزی ءَ چاہ ءِ گُٹّے وارت ءُ گشت ئےِ ھوڈے! تئی گُد تیارانت من تراچوں بے گُد کناں ائید ءَ، آئی ءَ نندگی جاگہ ءَ دُکان ءِ بچکّ ءَ را توارجت بچا پُھلی! ھما اسپیتیں تیلا ءَ بیبگر ءَ را بدئے، پُھلی ءَ اسپیتیں تیلا بیبگر ءَ را دست ءَ دات، بیبگر ءَ گُد دست گیپت اَنت، ءُ گشت ئےِ:
اڑے مراد! گاج شَرجتگ اَنت، من گشتگ کہ آستونکاں بٹن پر مکن من ایشاں بلاہیں بٹن جناں، ءُ دگہ ھبرےکناں منا بلے انّوں پیسہ گون نیست، درزی مراد ءَ سگریٹ ءِ تھا چرسے پر کت ءُ گشت ئےِ ڈے! مسلائےِ، تئی زَرّ کدی گار نہ بنت، پشت کپت تئی گُدانی اسٹائیل گڑا من سرپد آں ھما وڑا کہ تو گشتگ ھما وڑ کتگ انت-،،
بیبگر ءَ گدانی تیلا زرت دیم پہ وتی لوگ ءِ کشک ءَ رھادگ بوت، آوتی ھیالاں گوں گام جنان ات، بیبگر کہ چوک ءِ سرا کہ سر بوت، کشک ءِ سرا ستکگیں ٹیرانی پُر کپتگ اتنت، کشک ءِ سرا پروشتگیں کانچ ءُ ڈنگر کپتگ ات، دیوالانی سرا شہیدانی عکس جلواہ ناک اتنت، آیک عکسے ءِ کرّا شت، چارت ئےِ عکس ءَ را چارت ٰئےِ وتی دست ءِ گُدان ءَ، سر ئےِ جھل کت، دیما رھادگ بوت، آئی ءِ ھیال ءَ آئی رند ءَ رُمبے مردم کپتگ، آئی ءَ چَکّ جت بلےکس ندیستگ ات، دور دور ءَ داں کشک ءِ سرا کس نیست ات، بیبگر ھید ات، آئی ءِ کوشانی تھا زندگ بات ءُ مردگ بات ءِ توار ات، آ کمّو اوشتات گْوش ئےِ داشت انت بلےاے توار کجا پیداک انت اےزانگ نہ بوّگا ات، آکہ دومی گلّی ءَ کہ پُترت گڑا توار گیشتر بوت انت ،بیبگر ءِ ھیال ءَ دور زار ءُ پریات ءِ توار انت، زانسر ءُ سینگ ءِ ٹپگ انت، گونڈیں زھگانی توار انت، کہ آ ابّا ابّا! کنگ ءَ اَنت، شپ ءِ ساھگ آئی ءَ را ھم مات ءَ مارت کہ وتی بیگوائیں بچّ ءِ عکسے گون انت، آدومی گلّی ءَ کہ سربوت آئی ٰءِ ھیال ءَ زھیرونک ءِ توار انت، کہ گُھار پہ وتی ھملّیں براتاں زھیرونک پربندان اتنت، بیبگر ءِ سر پتروکی ورگ ءَ ات، آئی ءَ دست سرا کت ءُ نشت، شرّیں ساھتے ءَ نشت، آئی ءَ ھیال کت کہ پرچا منا چوشیں ھیال پیداک انت، من گنوک نیاں، من شرّیں ساریں مردمے آں بلے منا چوشیں ھیال چیا پیداک انت، من پرچا چو دل تپرکہ آں، من چون بہ کناں؟ آئی ءِ دستانی پسّو ءَ آئی ءِ توک ءِ مردم ءِ سر چست کت ءُ گشت ئےِ: تئی ماتانی ارس انگت ءَ ھشک نہ انت، تئی شہیدانی کبرانی ھاک انگت ءَ تک تازگ انت، تئی گوھارانی سریگانی سرا دری آنی چمّ انگت تک سکّ انت، تئی گل زمین ءِ سرا شھیدانی ریتکگیں ھون انگت تر انت، تئی بیگوائیں ورناہ انگت تک وتی لوگاں واتر نہ بوتگ انت، تئی گلامی ھلاس نہ انت-،،
بیبگر ءِ توک ءِ مردم ھاموش ات، بیبگر ھم ھاموش ات، آئی ءِ توک ءِ مردم ءَ ساھتے ءَ ودار کت ءُ پدا گشت ئے: نوگیں گداں گْورا کن ئے، روئے لاش ءِ چست کنگ ءَ چورھانی گریوگ ءُ ماتانی تلوسگ ءِ چارگ ءَ؟؟، ٹاپ ءَ رندئے، زباداں مال ئےِ راج ءِ دکترانی زار ءُ پریات ءِ چارگ ءَ؟؟؟
بیبگر ھیران ات گوں وت ءَ جست ئےِ کت، بلےجست ءِ پسّہ ءِ دیگ ءِ بدل ءَ آ واتر بوت، دیم پہ درزی مراد ءِ دکان ءَ رھادگ بوت، درزی مراد ءَ بیبگر ءَ را دیست گڑا ھیران بوت، بیبگر ءَ دکان ءِ ڈیکّی ءِ سرا وتی ائید ءِ گد ایر کت انت ءُ پُشت ئےِمان دات، بلے درزی مراد ءِ اُپار نہ شت توار ئےِجت:
بچا بیبگر! چون بوت تو گد واتر پرچا کت انت؟ ترا بے ائید بوھگی انت؟، بیبگر ءَ چَک نہ ترینت ءُ پسّہ دات ھون ءِ زر ءِ وشیانی کٹیان ءَ تاچیت، پرسیگیں لوگ ءَ دُھل ءُ سُرنا نہ بیت، موتک ءِ بدل ھالو نہ بیت، درزی مراد چیزےسرپد بوت چیزے سرپد نہ بوت K2 سگریٹ ئےِ بُن دات سُٹ ماں سٹ ئےِکت، بیبگر ءَ گشت ءُ شت، آ کشک ءَ روان بوت ھاموش ات،آئی ءِ توک ءِ مردم ھم ھاموش ات، آئی ءِ ھیالاں ءَ سرجمیں تاھیر رستگ ات-بیبگر گُشاد گشاد ءَ دیم پہ لوگ ءَ رھادگ ات، آئی ءَ را زوت لوگ ءَ سر بوھگی ات چیاکہ باند ءَ آئی ءَ مھلہ دکان پچ کنگی ات-
٭٭٭٭٭٭٭٭٭
باسک ایف بی گروپ ءَ ایر کنوک : طارق پِیشوکانی