دستونک
زاھدہ رئیس راجی

انچوش بہ زِیر درد ءِ توان ءَ، سما بِہ بیت
دو ٹکر ءَ اِنت تِیر، کمان ءَ سما بِہ بیت

اُمرے بِبا دیان ایں، دَمان ءَ سما بِہ بیت
جند ءِ ردی ءِ، جنگ ءِ میان ءَ، سما بِہ بیت

کرنانی کرن ءِ داد پَہ مئے کاسگ ءَ نہ کپت
باریں کدی زمین ءُ زمان ءَ سما بِہ بیت

بل تراولانی ارس دل ءَ ایر بُک ات اَنت
سیتاں بہ پُرس، زپت ءِ زیان ءَ سما بِہ بیت

آسے کپ ایت نہ زانت کدی ترّ ءُ ھُشکی ءَ
ھورءَ تَہ گون اِنت ھار، گدان ءَ سما بِہ بیت

دود ءِ نگاہ مرچی کہ چاریگ انت ملپدءَ
ورنائی ءَ پَہ پیرءُ کسان ءَ سما بِہ بیت

گوں بے سمائیں رپکاں چِتگ بے دری پَہ وت
بے منزلانی کشکے، روان ءَ سما بِہ بیت

ھردیں کہ زند ءُ مرگ ءِ تماھاں الس کُتگ
مئے کوپگ ءَ انت تیر، نشان ءَ سمابِہ بیت

راجی اگں اے وھد، کس ءَ ھمبلے کُتگ
نپت یے بہ بیت کہ بِیر، جَھان ءَ سمابِہ بیت

رمز: 14 جنوری 2020
٭٭٭٭٭٭٭