اکرم اکرار ءِ ارواہ ءِ تلب۔ دیدانک : جمیل مھراب
اکرم اکرار ءِ ارواہ ءِ تلب
دیدانک : جمیل مھراب
زندمان ءِ روچ ءُ شپانی تہ ءَ چینچو گال گُشگ ءُ نبیسگ بیت۔ چینچو گال گار بیت ءُ چینچو در کپان کنت۔ شائر ھمے گالاں وتی داب ءَ کمائیت ءُ ردانک نبیس ھمشاں وتی وڑ ءَ رد ءُ بند دنت ءُ زندگی بکش ایت۔ اکرم اکرار ءِ شائری ءَ سک دیر انت آ ھما آزمانگ ءَ لبزانک ءِ سپرءَ رھادگ بیتگ آئی ءِ دل ءَ گوں گالاں تاھیر زرتگ ھمے دور ءَ پل آباد ءِ تہ ءَ لبزانکی چاگردے ردوم زورگ ءَ بیت۔ ھمے واستا آئی ءِ شائری ءِ بنداتی شئیرانی تہ ءَ اوں مارا شریں ازم دست کپ ایت۔بلے وھدءِ گوزگ ءَ گوں آئی ءَ وتی ازم آ ھد ءَ سر نہ کتگ کہ اینچو آ بودشت داریت۔ بلے آئی ءِ زیک ءُ مرچیگیں شئیرانی تہ ءَ ھما زیبائی گندگ بیت کہ ھمک تب ءِ وانوک وتی دل ءَ چاڑ ءُ تاھیر ءَ سر کت کنت۔
سپر سپر کن ، سپر سپر بیا مساپرے آں
روان انت منزل ، روان کنت راہ مساپرے آں
منارا کرنانی کرنی ھوشام چادر ءَ انت
ماں کوپگاں زرتگ گژن ءِ ارواہ مساپرے آں
اکرم ءِ کر ءَ جمالیات ءِ ھمراھی ءَ کم ءُ باز چھر ءُ شبین اوں شوکیں رنگے ءَ دست کپ ایت۔ بلے آ گیشتر شئیر ءِ تہ ءَ ندارگ سازی کنت، پد ءَ بازیں جاگہاں آئی ءِ شئیر وجودیت ءَ اوں نزیکی کن انت۔
درد زرتیں تئی گم ءِ کسہ کتیں
دل ھما سھت ءُ دم ءِ کسہ کتیں
تو گوں مسکاں سر بہ ششتیں بیگھی
ما گوں گوات ءَ موسم ءِ کسہ کتیں
دور گیابان درچک نازینکے گوش انت
سِستگیں مرگاں رم ءِ کسہ کتیں
اکرم اکرار ءِ کتاب ءِ ارزشت پہ مئے گل ءَ سک باز انت۔ یکے ایش کہ اکرم ھما مردماں ھوار انت کہ آیاں “ملا اسمائیل لبزانکی گل پل آباد” ءِ بن ھشت ایر کتگ دومی آ یک شر ءُ جوانیں شائرے، پد ءَ مارا دیرانت اکرم پہ ھمے کتاب ءِ چاپگ ءِ واستا گوشتگ کہ آ مرچاں انچو نشہ آماچ انت کہ آ وتی ھمے نزآورتگیں گالاں گار مہ کنت۔ کتاب ءِ سر ءَ ھبر رند ءَ بیت ءُ اکرم ءِ شائری ءِ سر ءَ اوں ایراد ءُ توسیپ باز بیت کنت بلے اے نوں وانوکانی کار انت، آ اکرم ءِ شائری ءَ کجام رنگ ءَ چارانت ءُ چوں دوست دار انت۔
14/10/2021
******