نہ پروشاں من اے دیوال ءَ.شائر: زاھدہ رئیس راجی
بلوچانی ناتپاکی ءِ سرءَ زاھدہ راجی ءِ پربند۔ نہ پروشاں من اے دیوال ءَ ۔ ندر پہ باسک ءِ وانوکاں
لچّہ
نہ پروشاں من اے دیوال ءَ
شائر: زاھدہ رئیس راجی
گمان ءِ ساھگ ءَ نشتگ ، پدءَ ستک ءَ شُھازیگ آں
ھما ستک ءَ کہ مہر ءِ سرزمین ءِ پَھر بندوک اَت
اُمیت ءَ نااُمیتی ءِ سپر وَ دیریں کُٹینتگ
نزاناں چَہ کُجا باریں
دری گوات ءَ کلوھے پمن ءَ گون اَت کہ بیا مرچی،
تئ بے آزمانیں سرزمین ءِ کینگ ءِ کوش ءَ
اجب یک جارے پرینتگ
کہ تئ بُن پیروکی ھند ءَ
مروچی مہرءِ ڈکال انت،
تپاکیں ھمبل اَنت دژمن،
درآمد ماں دل ءِ توک ءَ،
گلامیں پگر ءِ واجہ ئ
سما ءُ سُدّ ءِ ڈُکّالی
تپر بے دستگ ءَ زٗرتگ
روان اَنت رونگراہاناں
ھمک ھند کہ چم شانک ئے
بہ گندئے دردءِ سرھال اِنت
نگیگیں مہر ءِ اھوال اِنت
اگاں زورئے منی گپاں!
وتی اوستانی دیوال ءَ
یلا دئے بیا منی ھمراہ
نہ مارئے کینگ ءِ آسے ،
نہ گندئے کست ءِ کاٹارے
کہ دُنیا ءِ بَھِشت ءَ
زندمان ءِ داب نوکین اِنت
“
دمانے ھُشک ءُ ھیرانی ،
دل ءَ گوں ترکگ ءَ جیڑات
منی اے مُھریں دیوالے
ستر آھُنڈ لرزان اِنت،
نہ پروشاں من اے دیوال ءَ
کہ اے دیوال ءِ پُشتہ زندمان ءِ
واب، آگاہ انت
۲۹ مئ ۲۰۱۴
لہتے گالانی بزانت:
کست = کینگ ، ھسد، انچیں زَھر کہ پہ تاوان ءُ بیرانی ءَ سر بِہ کش اِیت
کاٹار: ھما کارچے کہ آئ ءِ دستگ ءُ جُتک نُگرہ اِنت ) (سالونکانی دست ءَ دینت ئِے )
نُگرہ : چاندی ۔ زرّ ۔ اسپیت