بلوچی وانگ پرچا المی انت ۔ زاھدہ رئیس راجی
گوشتانک: بلوچی وانگ پرچا المی انت (گوشتانک)
زاھدہ رئیس راجی
ھما وھد ءَ کہ من ایم فل بلوچی ءَ اولی کلاس زورگ ءَ شال ءِ مزن شاہ دربرجاہ ءَ شُت آں، یک مزنیں اگدہ ءِ مردمے ءَ من ءَ جُست کُت کہ تو آٹی ءِ پڑءِ مردمے ئے ۔ ھمے پڑءِ کار ءَ ترا شریں تجربہ یے ھم گون انت پرچا تو بلوچی گچین کُتگ ۔ اِے ترا لاپ دات نہ کنت ءُ نام ترا چَہ پیسرءَ رس اِتگ ، پرچا وتی سَندی یا اکیڈمک وانشت ءَ اِے پڑ ءَ دیم ءَ برگ ءَ ئے ؟
لھتے وھد گوزگ ءَ رند یک دگہ زانتکارے ءَ سوجے دات کہ تو باید ایم اے اردو بہ کن ئے ءُ یک الکاپیں کارے ماں ٹیچنگ ءِ پڑءَ دست بہ گرئے کہ بلوچی ءَ انچو ڈولی نہ نشتگ کہ پہ سُرنائی ءَ بھر بہ بیت ۔
ایم فل کورس ورک ءِ گُڈسرءَ یک دِگہ بلوچی پولکار ءُ ندکارے ءَ سکین دات کہ دوبر وتی آئی ٹی ءِ پڑءَ واتر بہ کن کہ بلوچی ءَ ترا جاہ نہ رس ایت ۔
بلوچی اکیڈمک وانگ ءَ گوں ھمگرنچیں اِے گپانی گوشدارگ ءَ پد مَن دل ءَ یک گپے الم جیڑ اِت کہ بلوچی زبان ءُ لبزانک ءَ ما ستر ایم فل ، پی ایچ ڈی بہ کن ایں ، مارا آ دابیں سوبے نہ دنت کہ انگریزی ، اردو ، فارسی ، عربی ءُ دگہ بازیں زبانانی اکیڈمک وانگ مارا دات کنت ۔ بلے اگں مئے لوٹ تھنا کارءِ دست گرگ اِنت ، گُڑا ما بلوچی پرچہ گچین کُتگ ؟
اگں وتی بہ گوش آں گُڑا پِڑ یا شعبہ وَ منی گورءَ سائنس ءِ ھم بازیں سبجیکٹس ءِ بیتگ ، آئی ٹی ءِ جند ءِ ھم بیتگ، گُڑا پہ اسپیشلائیزیشن ءَ بلوچی ءِ گچین کنگ پرچہ المی بوت کہ اےوھد ءَ من ھمشی ءِ سوب ءَ پشومان بہ باں؟
زاناں اے گپ من ءَ پیسرءَ مالوم نہ بیتگ کہ بلوچی ءَ سرکاری سرپرستی ناں اے مُلک ءَ است ، نے آ دوئیں مُلکاں کہ بلوچ چَہ بُندرءَ جاہ مننداَنت؟
اگں چوشیں چیزے بوتگ اَت گُڑا ھما داب ءَ کہ کثیر لسانی صوبہ سندھ ءَ ، سندھی زبان ، دِگہ زبانانی تہ ءَ گپ جنوکانی سرءَ مُشگ بیت، بلوچستان ءَ ھم انچوش بوتگ اَت ۔
پدءَ ھما بلوچی زبان کہ ماہر ِ لسانیات یا زبان زانتاں اینڈویورپین زبانانی ایرانی گروہ ءِ کُھن تریں زبانے نشان کُتگ ، وھدے چوشیں زبان ءَ وتی جند ءِ مُلک ءَ یک نیمگے ءَ کسانیں بولی یا لہجہ یے ءِ نام دیگ بِہ بیت ءُ دومی نیمگ ءَ فارسی ءِ کرپٹ گالوارے پیشدارگ بہ بیت، شمئے ھیال ءَ چوشیں جاھاں بلوچی زبان ءُ لبزانک ءَ انچیں بستارے رِس ات کنت کہ مارا شمارا لاپ دات بہ کنت ؟
ھمے کراچی کہ ٹیم فیرل ءَ دَہ سال پیسر وتی پولکاری ءِ رپورٹ ءَ کراچی ءِ تہ ءَ دَہ لکھ بلوچی گپ جنوکیں مردم نشان کُتگ اَ تءُ 2017 ءِ مردم شماری ءَ کراچی ءَ یک ھم بلوچی گپ جنوکے نشان کنگ نہ بوت ۔ ایشی ءِ متلب چی اِنت ؟ انگت بلوچی ءِ وانگ مارا لاپ دات کنت ؟
ھجبر انّاں۔
وھدے ما زان ایں کہ بلوچی لاپ دات نہ کنت گُڑا بلوچی پہ لاپ ئیگی گچین کنگ مئے شمئے مستریں ردی یے ۔
بلوچی کہ بلوچ ءِ پجّارے ، بلوچ ءِ دودمان ءُ ربیت ءُ بُندپتر ءِ چیدگ اِنت ، بلوچی کہ گار بیت ، دود ءُ ربیت ءِ گار کنگ ھچ بلائیں گپے نَہ اِنت ءُ وھدے دود ءُ ربیت کہ گار بیت پدءَ راج ھم پشت نہ کپ ایت پرچہ کہ آ چَہ وتی جند ءَ شموشکار بیت ۔
مارا دیر روگ ءِ زلورت نہ ایں کہ انونگیں وھد ءَ کراچی بہ بیت، اگں نہ سندھ ءِ بازیں بلوچانی ھند ءُ دمگ بہ بنت ، اگں نہ بشکرد بہ بیت کہ بلوچ ءَ وتی زبان ءِ پھر یلہ داتگ ءُ سندھ ءِ بلوچ گوں پھر گوش ایت کہ من ءَ پنچ سد سال انت کہ من سندھی آں ۔ بزاں زبان وَ مٹ بیتگ بلے نوں راج ءِ پجار اوں مٹ بوت۔ چوشکہ پنجاب ءِ سرائیکی گپ جنوک بازینے وَت ءَ بلوچ نہ زانت، خیبر پختونخواہ ءِ بازیں بلوچ وت ءَ پٹھان زان انت ، بشکرد ءِ بلوچ وت ءَ بلوچ نہ من ایت ، براھوی کہ دوسد سال پیسر بلوچے بوتگ ، زبان ءِ بنیاد ءَ آ ھم چَہ بلوچ ءَ دیر کنگ ءِ نیمون سازگ بیت ۔
اے جاورانی توک ءَ بلوچی ءِ وانگ ءَگوں لاپ ءَ ھمگرنچ بوھگ نہ لوٹ ایت ۔ پہ لاپ ءِ کشّگ ءَ دِگہ مضمونانی وانگ باز انت ۔
بلوچی ءَ وانگ پمشکا المی اِنت کہ ما وتی بُندپتر ءَ زانت بہ کن ایں ، وتی زگریں بلوچی ءِ گوں ھمساھیگیں زباناں پہ زور ھور تہ ھور کنگ ءِ توجیل ءُ سوب ءَ زانت بہ کن ایں ، مردم شماری ءِ فارم ءَ پہ زور بلوچی زبان ءِ سندھی ءَ گوں مٹینگ ءِ سَوَب ءَ زانت بہ کن ایں ۔ سندھ لینگویج اتھارٹی ءِ چاپ بوتگیں کتابے ءَ کیچ ءِ زبان ءَ بلوچی ءِ جاہ ءَ سندھی نامینگ ءِ پندل ءَ زانت بہ کن ایں۔
یکے بئیت بہ گوش ایت کہ بلوچی ءِ جیڑہ رسم الخط ئیگ اِنت پمشکا اے وانگ جاھاں وانینگ نہ بیت ۔بلے اگں ما بلوچی ءَ بہ وان ایں گُڑا گوں منّاک ءَ ایشی ءِ پسّہ ءَ دات کن ایں کہ رسم الخط ءِ جیڑہ زاناں اردو ءَ نیست اِنت ؟ کہ اردو ءِ ذال ءُ ز ءُ ظ ءُ ض ءِ توار یک انت بلے کسے نہ گوش ایت کہ رسم الخط سرجم نہ انت ۔بلکل ءَ بالکل نبشتہ کنگ ءَ کس جاک سلوات نہ کنت کہ سیاھگ باید توار ءِ ھساب ءَ بہ بیت ۔ اردو ءِ کاکی کو ءِ بُنرھبند ءَ آ ھم الکاپی ءَ گشینت نہ کن اَنت کہ آھاں چَہ کلاس اوّل ءَ بہ گرتاں چاردہ ءُ شانزدہ بزاں بی اے ءُ بی ایس سی ءُ بی کام ءَ لازمی سبجیکٹ ءِ دروشم ءَ ونتگ۔ بلے کس اے گپانی بُنیاد ءَ اردو ءَ ایر نہ جَنت۔
سندھی ءِ رسم الخط یا سیاھگی رَھبند وَ مئے پتانی کسانی ءَ دگرے بیتگ چو ھِندی زبان ءِ وڑ ءَ، انوگیں دِگر اِنت ، سندھ ءِ تھر علاقہ ء ِ مردمے گوش ایت کہ آھانی گالوار ءِ یک دَرسد گپ ھبر ءِرواج گپتگیں سندھی رسم الخط ھمراھداری کُت نہ کنت بلے ھچ جاہ ءَ ھچ دیوان ءَ ، ھچ کانفرنس ءُ سیمینارءَ سندھی رسم الخط بد سد کنگ نہ بیت ۔
پنجابی کہ پنجاب ءِ تہ ءَ اردوعربی رسم الخط ءَ نبشتہ بوھگ ءَ اِنت ءُ آئی ءِ بازیں توارے اے رسم الخط ءَ مان نیست انت ءُ آھانی زبانزانت گُر مکھی سیاھگ ءِ منّوگر اَنت ، بلے پاکستانی پنجاب ءِ تہ ءَ اردو عربی سیاھگ ءِ گچین رسم الخط ءَ آئی ءَ صوبائی زبان بوھگ ءِ جاہ دیگ ءَ کس چک ءُ پد نہ بیت ۔
بلوچی پمشکا وانگ لوٹ ایت کہ کسے بئیت ترا بہ گوش ایت کہ ھانی ، شے مرید ءُ چاکر ءِ داستان وتساچین َانت ءُ یونانی مھرانکی کارستانی گیگان اَنت ، ترا چَہ بلوچی ءِ وانگ ءَ انچو وَ مالوم بیت اِنت کہ بلوچاں وھدے وتی ھمساھگیں ملکانی پندلانی سُد پانزدھومی کرن ءَ نہ بو تگ کہ سی سالی جنگانی گُڈسرئِے تاوان ھمے پندلانی داتگین اَنت ، آ کُج ءَ رو اَنت ءُ یونانی لبزانک ءِ گیگان ءَ گراَنت؟
بلوچی پمشکا وانگ لوٹ ایت کہ زانت بہ کن ئے کہ تئی زبان ءَ لبزانک ءَ انچیں شئیری مڈی یے گون اِنت کہ یک نیمگے ءَ آ زگریں گال انبار ، چھر ءُ شبین ءُ اکسءَ پیشداریت ءُ دومی نیمگ ءَ بلوچی لبزانک ءِ شئیری صنعت ءَ میان اوستمانی زبانانی لبزانک ءِ کش پہ کش ءَ اوشتارین ایت کہ اے جاہ ءَ بلکیں اِے ملک ءَ دگہ زبان ءِ لبزانکے اوشتات مہ کنت ۔
بلوچی ترا پمشکا وانگ لوٹ ایت کہ تو وتی جند ءِ راج ءِ تب ءُ نفسیات ءُ دود ءُ ربیت ءَ زانت بہ کن ئے ۔ زانت بہ کن ئے کہ من کے بیتگ آں ءُ مروچی کے آں ءُ کُج ءَ سر آں۔ بلوچی ءِ دامن انچو ھالیکءُ ھورک نہ انت بلے تو کہ بلوچی ءَ وان ئے ، ترا وتی زمہ واری ءِ اھساس بیت کہ منی زبان ءِ گار ءُ بیگواھی ءِ پُشت ءَ جاھے نہ جاھے منی جند ءِ اوں دست ھور اِنت کہ من وتی زبان ءَ آ بستار ءِ جند نہ داتگ کہ آ کرزایت ۔
بلوچی ءِ وانگ ترا اے ھم سرپدی ءَ دنت کہ وھدے ھژدھومی کرن ءَ برتانیہ پہ وتی فاروڈ پالیسی ءِ ردءَ بلوچانی سرزمین ءِ نیمگ ءَ آھگ ءِ جُھد ءَکنت ، آ پیسرءَ بلوچی ءَ دربرگ ءِ جُھد ءَ کنت پرچا کہ بلوچی زبان آئی ءَ تئی تب ءِ شری ءُ بدی ءُ نزوری ءُ زرنگی دراھین ءِ سرپدی ءَ دنت ۔آئی ءَ تئی زبان ءِ وسیلہ ءَ گوں تو پندل سازاِتگ ، ترا پروش داتگ ، ترا بھر کُتگ ، ترا چَہ وتیگ ءَ درآمد کُتگ ، تئی زبان ءِ نبشتہ کنگ ءِ پَھر وَت زُرتگ، بلوچی ءِ پولکاری ءِ پَھر ھم آئی ءَ وتی کوپگاں لڈ اتگ ،بلے اگں تو بلوچی بہ ونت انت ترا ایشانی اے کار ءُ کرد ءِ مول ءُ مراد ھم مالوم بوتگ ات ءُ اے ھم مالوم بوتگ ات کہ بلوچی ءِ اولی اسکرپٹ انگریزاں نبشتہ نہ کُتگ ، بلوچانی جند ءَ کُتگ تُری آ عربی فارسی اسکرپٹ بہ بیت کہ چہ ایشاں یک کتابے اوتمان کلمتی ءِ ماں برٹش میوزیم ءَ دزگرگ بیتگ۔
وھدے بلوچی ءَ وان ئے ترا اے ھم مالوم بیت انت کہ مکتبہ دُرخانی ءَ چون ایسائی تبلیگیانی پندلانی دیم دارگ ءَ پاک تاک ءُ احادیث ما ں بلوچی ءَ رجانک کنگ ءَ گوں بلوچی ءِ تہ ءَ رجانکاری ءِ بنیاد ایر کُتگ ات ۔ ترا اے ھم مالوم بیت انت کہ بلوچاں ھچ چیز پہ ھلو ھالو نہ رس اتگ ۔ اے بلوچ ءِ زمہ واری انت کہ بلوچی ءَ پمشکا بہ وان ایت کہ آئی ءِ جند گار مہ بیت ۔
مروچی کہ ما ٹیکنالوجی ءِ دور ءَ زندگ ایں ۔ سندھی زبان گوگل ءَ ھوار انت ، پشتو ھوار انت ، پنجابی ھوار انت بلے بلوچی نہ انت ۔ پرچا کہ بلوچ ءَ بلوچی ءِ سُد ءِ جند نیست ۔
اگں مارا سُد بوت انت ما وتی بلوچی زبان ءِ دیمروی تھنا گوں لبزانک ءَ ھمگرنچ نہ کُتگ ات ۔ لبزانک ءُ دین زانتی زبان ءِ دو پھنات اَنت بلے ٹیکنالوجی ءِ دور ءَ گوں ھمگامی چَہ ترا سائنسی دیمروی ھم لوٹ ایت ، دنیا ءِ دراھیں پڑانی ھمگرنچی ھم لوٹ ایت ۔
گوگل تھنا پہ پٹیشن ءَ تئی زبان ءَ گوگل ءِ بھر نہ کنت کہ گوگل وَ تئی نکان \ مواد \کونٹینٹساں چارایت ۔ آ چارایت کہ تئی چُنت لبزبلد یا ڈکشنری ماں نیٹ ءَ ایر اَنت ۔ آ چارایت کہ تئی زبان ءِ گرامر یا بُنرھبند ءِ تھر ءُ بھراں گوں ھمدپیں ڈکشنری چُنت اَنت ۔ تئی زبان ءِ ساچشت ما چُنت زباناں رجانک بوتگ اَنت داں آ ایشانی وسیلہ ءَ تئی زبان ءَ وتی ڈیٹابیس ءَ جاہ دات بہ کنت ۔
آ چارایت کہ تئی زبان ءِ سرءَ کارکنوکاں ھلکی ، مُلکی ءُ جھانی سیاست ءِ تک ءُ پھنات ماں بلوچی ءَ چے پیم ءَ جاہ داتگ انت ۔ آ چارایت کہ میان اوستمانی صحت ءُ جان سلامتی ءِ کجام کجام وانشتی ءُ زانشتی پھنات ماں بلوچی ءَ درشان کنگ بیتگ انت؟
اگں بلوچ بلوچی ءَ پہ الکاپی ءَ بہ وان ایت۔ آئی ءَ انچو اھساس وَ الم ءَ بیت انت کہ اگں من انشورنس ءِ پڑءَ کارءَ یاں ، ٹکٹنگ ءِ پڑءَ کارءَ یاں ، فائینانس ءُ اکاؤنٹس ءِ پڑءَ کارءَ یاں ، ایڈورٹائیزمنٹ ، سیلز ءُ مارکیٹنگ ءِ پڑءَ کارءَ یاں ، کریٹیو رائیٹنگ یا سساساچ ءِ پڑءَ کار ءَ یاں ، وتی ازم ءُ زانش ءَ ماں بلوچی ءَ نبشتہ کنگ ءِ جُھدءَ بہ کن آں ۔ من ءَ وانوکے است کہ نیست ، منی بلوچی زبان ءِ ھچ پھنات ھُرک ءُ ھالیک مہ بیت کہ ٹیکنالوجی ءِ ٹھیکیدار من ءَ شگان مہ جن انت کہ بلوچی ءَ است انت چے کہ ما پہ ٹیکلنالوجی ءِ زبان بوھگ ءَ دلمانگ ایں۔
بلوچی وانگ پمشکا المی انت کہ ما زبان ءِ بستار ءَ وت ھم بزان ایں ءُ وتی لوگ ءِ مردمانی دل ءَ ھم ایشی ءِ شرپ ءُ بستار ءَ ایر کنگ ءِ جُھد بہ کن ایں۔ کہ زبان ءِ گاری ، زبان ءِ واھندءِ گوں ایشی ءَ بے دلگوشی ءَ بیت ۔ زبان زندگ کنگ ءَ زبان الم وانگ لوٹ ایت کہ گلوبلائیزیشن ءِ جاورانی ارتچاریں زانتکاراں اے جار پرینتگ ءَ دنیا ءِ بازیں زبانے آیوکیں پنجاہ سالانی تہ ءَ گار ءُ بیگواہ کنگ ءِ نیمگ ءَ بران اِنت ۔ اگں بلوچ ءَ بلوچی نہ ونت ، پہ بلوچی ءِ دیمروی ءَ وتی دست ءَ دیم ءَ نہ کنز ین ایت بلوچی وَ گار بیت بلے بلوچ ھم نہ مان ایت ۔
اُمیت انت منی اے لھتے گپاں شما دلگوش دئیت ءُ جیڑ ات ۔ اگں کسے ءَ اے بُن گپ ءِ سرءَ جُستے ھبرے است انت ۔ گوشت کن اِت ۔
منتوار
29 جنوری 2022
مُلا فاضل لائبریری لیاری کراچی