بُتکگ اَنت سَنج کہ تئی رنگی ئیں چادر تاپ اِنت
شاعر: کریم دشتی
۔۔۔۔۔
بُتکگ اَنت سَنج کہ تئی رنگی ئیں چادر تاپ اِنت
تئی اھوال کہ باگ ءِ دْرھیں پُلّاں چاپ اِنت
من ءَ لرزینگ ءَ گِپتگ او منی زِند ءِ اُمیت!
من ءَ اَمباز کہ تئی بخملیں سینگ باپ اِنت
بیا کہ گُڈّی بر ءَ سنگلؔ ترا گِندُک بکناں
بیا کہ ساہوں منی پہ درکَپگ ءَ اِشتاپ اِنت
تئی نْدراں اگاں پہ تژن شہارئے دستے
ہر کُجام دیما تئی داد ءُ دِہ ءِ اوساپ اِنت
ہمے اھوال کہ تئی نیکیں نظر گوں من اِنت
وشنیتکاں چہ گل ءُ وشّی ءَ دمب ءُ شاپ اِنت
تو کریمؔ ! پونزے یک جْوانیں وتی راج ءَ را دئے
تئی حالت گوں پری رنگاں عجب الکاپ اِنت
٭٭٭