بُرتگیں مات ءُ گھارءُ زھگانی نام. ءَ..
بُرتگیں مات ءُ گھارءُ زھگانی نام. ءَ..
گریتگ سگار سنجیں زھیرّانی اے اھد ءِ ڈیواں
استین ءِ ھور گورتیں شگاپیں کیلّگاں
گریتگ منی اھدءِ گبار ھدّانیں مات کوھیں زِھاں
بے تھبلی
زُلمانی آتراپیں منی ھر میتگ ءُ ھر جُلگھاں
زھگانی لیبوک پروشتگ اَنت وھدءِ لجّوزیں رستراں
گریتگ پدءَ پہ بے وسی انگارتگیں اوپارگاں
ھیسکارگاں
گریتگ منی ماتیں زمین ءَ بزگی
گریتگ منی زگرین دل ءَ تاں کہ سھار تاں بام سار
گریتگ رگامیں گیدی یے دلبندءَ ھونانی شلّے
دست بستگاں
لٹّ شاپتگاں
کُدَک منی
ناڑی منی
مات ءُ گھار
گریتگ کہ بے وس بوتگاں
چو بے وس ءَ دست بستگیں
گریتگ شگانے شھم کتگ گوگائی ءَ
گریتگ کہ نیکورءُ شگان زھگے بہ جنت یا چوری ئے
یا کہ سلاہ بستے پہ مات ءَ در پہ در
چُک بستگاں ،
زالبول من بندیں سانکلاں بندیگ ءُ زیندان بوتگ انت
دل سُپتگیں نیکوراں دل زیمی کتگ
چے من کناں!
چے بیت گومن بے وس آں
چے بیت کہ لجّانی منی پاسپاں نھینگ ءَ برتگ انت
یکے من آں .
کہ لاپ جت ایں گژنّ ءَ من درملک رپتگاں
یاکہ لجوز من بوتگاں
کے پہ کلوہ ساٹیت وتی لجّانی توپانیں دْرداں
بس چے کناں گالے ندّا درشاں کناں
گریوان پدءَ زردءَ وتی وشاں کناں
ٹپاں سگاریں روھبر ءِ درمان کناں
پہ واد ،ُ زیماں دراہ کناں
لج برتگیں زھگاں ھوار مات ء گھار مئے برتگاں
زمزیل ءُ کیدان بستگاں
وھدءِ لجوزین رستران
گوں تیل ءُ ریزاں بستگاں
لٹّ چُپتگاں
گپوردرملکی