جے کے جلالی ءِ لچّہ
کولواہءِ ڈکّالءِ نامءَ
][
من شت آں سیلءَ کوچگءُ ھلکاں
شادھیں کولواہءِ گلیں ھنداں
کولواہ پلیں پیرکءِ ملک مئے
کولواہ ڈیھ ئنت شاہ مزارانی
سیل کتءُ گشت آں من درھیں ھلکاں
من چداگردانءَ شتاں دیما
دات منا ازت دیدگیں براتاں
سنگتءُ سیاداں ماہ مڈاہ داریں
برات منی ساہ انت دیدگیں کومءِ
رند چرے گندءُ چہ گداریاں
مجلسءُ نیاداں نرمزاریاں
شانک اتاں دیدگ پہ گلیں ڈیھءَ
چہ وتی ھستءَ من ھلاس بوت آں
ستکگ انت کوہءُ برتکگئنت ڈل دیم
مرتگ انت زردیں آچگردی پُل
چم کپیت وھدے کوچگءُ ملکاں
چم جتا ارسءُ دل جتا گریتیں
ناں کنر بُرّءُ نہ کہیر ٹلّیں
نئیکہ مئے کوھاں بڈلءُ دازے
ھرگؤرءَ گنداں جُمبئتگ ڈکّال
چہ سگکءَ ءُ داں بُرو آشال
چے منی ڈنڈارءُ بلورءِ ھال
مرتگ انت درچکءُ چُلّرئنت کانیگ
چو بہ بیت ڈکّال چے ادا مانیت
شاہ سریں گیشکورءُ آوارانءَ
بیگہءُ سُہبءَ گؤز تو چارانءَ
ھالتءَ دھکانءِ بدیں گندئے
دل نہ سگّیت تو دیدگاں بندئے
بزگیں دھکانءِ کجام ھال انت
پہ وتی چُنڈے نانءَ بدھال ئنت
تو گُلی وھدے کولواہ بیائے
گلہی آبوساں دلءَ کارئے
دورسریں کُرمءُ گُوالگاں شکّیں
زگزگیں زیکءُ ڈلسرءُ مالار
ھر گورءَ پاکیں دیدگاں بالار
نئے جُگر سبزیں نہ کلیر گندئے
ناں بُلند ڈیلیں کبّڈءُ ڈیڈار
سر مرہ سرشم لئےلڈی لاڈی
کس نہ ئنت بےگم لئےلڈی لاڈی
کہر سریں ڈکّال ھر کُجا تالاں
ماشیءُ نیابت واجہءِ بیدی
شائرءَ بکشئنت داستاں گیدی
کنجلیں ڈنسر شادھیں تیرتیج
ھورءُ بے آپءَ سیاہیں سیاہ گزّی
ما کجا گپتگ ھال بزدادءِ
پرک کجا زانتگ وشیءُ شادءِ
تُستگئنت گُؤنگءُ نوکجوءِ لیمبو
بیا بچار ڈکّالءِ تبءَ اینگو
گزّیءُ میرءِ چمبُرءَ آدیم
گندگءَ کیتیں مُرگی ءِ زیارت
اِشکنئنگ بیتیں ھمّلءِ چوگان
ھمّلءِ چوگانءُ زگر سُہبءِ
شاھی ءِ مچّاں کمّی ے کپتگ
نیوگاں پٹؤکءِ ستاہ کرزیں
اے منی ڈیھ ءِ تاجگیں ھال ئنت
چہ مِرئنت تنّءَ مُرگ برز بالیں
اے منی دُواہ گوں کُدرتیں اللہہ
ڈیھ منی بات چو سرپتگیں پُلءَ
ھر گؤرءَ وشّانی بہ بات سہرا
رِد کناں شیئرے من جلالی ایں
پہ وتی کومءُ پہ وتی راجءَ
پہ وتی شیرءُ گنگلیں دوستاں
پہ وت ڈیھءَ سد ستاہ کرزیں
پہ وتی ڈیھءَ سد ستاہ کرزیں